ក្រសួងសុខភិបាលតាមរយៈការឯកភាពពីរាជរដ្ឋាភិបាល បានសម្រេចប្រើប្រាស់សណ្ឋាគារ Great Duke (អតីតសណ្ឋាគារអាំងទែកុងទីណង់តាល់) ជាមន្ទីរពេទ្យសម្រាប់ពិនិត្យ ថែទាំ និងព្យាបាលជំងឺកូវីដ១៩ នេះបើយោងតាមផេកក្រសួងសុខាភិបាលនៃព្រះរាជាណាចក្រកម្ពុជា ចុះផ្សាយកាលពីប៉ុន្មាននាទីមុននេះ (ថ្ងៃទី១៧ ខែមីនា ឆ្នាំ២០២០) ។
ក្នុងនោះ ក្រសួងក៏បានបញ្ជាក់ឲ្យដឹងផងដែរថា បើទោះបីជំងឺកូវីត១៩នេះរាតត្បាតជាសកល ប៉ុន្តែក្នុងពេលនេះ កម្ពុជាមិនទាន់មានការរាតត្បាតក្នុងសហគមន៍របស់យើងនៅឡើយទេ។ ហើយករណីទាំងអស់សុទ្ធជាករណីនាំចូលពីក្រៅប្រទេស។
ដើម្បីបញ្ចៀសនូវការចម្លងក្នុងសហគមន៍ជាយថាហេតុ រាជរដ្ឋាភិបាលបានឲ្យក្រសួងសុខាភិបាលសហការជាមួយកងកម្លាំងសុខាភិបាលនៃកងយោធពលខេមរភូមិន្ទរបស់ក្រសួងការពារជាតិ និងកងកម្លាំសុខាភិបាលនៃនគរបាលជាតិរបស់ក្រសួងមហាផ្ទៃ ដើម្បីរួមសហការគ្នាប្រយុទ្ធនឹងជំងឺកូវីដ១៩ ឲ្យកាន់តែមានប្រសិទ្ធិភាពខ្ពស់៕ ដោយ៖ លឹម ហុង
