គិតមកត្រឹមថ្ងៃនេះ ក្រសួងសុខាភិបាលកម្ពុជាបានរកឃើញអ្នកផ្ទុកកូវីដ-១៩ ចំនួន ៣៧ នាក់ ហើយ ដែលភាគច្រើនជាករណីនាំចូលពីក្រៅប្រទេស លើកលែងតែករណីបុរសខ្មែរម្នាក់នៅសៀមរាបប៉ុណ្ណោះ ។
ទន្ទឹមនឹងការព្រួយបារម្ភជាខ្លាំងនេះ រាជរដ្ឋាភិបាលបានសម្រេចផ្អាកសាលារៀន កន្លែងកម្សាន្ត ហាងខារ៉ាអូខេ និងរោងភាពយន្តទូទាំងប្រទេស ដើម្បីចូលរួមទប់ស្កាត់ការពារការរីករាលដាលនៃជំងឺកូវីដ១៩ ។
ស្របជាមួយនឹងចរាចរណែនាំខាងលើរបស់រដ្ឋាភិបាល ក្នុងនោះបងប្អូនប្រជាពលរដ្ឋដែលគ្រោងរួចស្រេចសម្រាប់ពិធីមង្គលការ ជប់លៀង ខួបកំណើត ពិធីបុណ្យផ្សេងៗ ត្រូវបានសង្កេតឃើញថា បានរំសាយអស់ជាច្រើនរោងរួចហើយ ដើម្បីចូលរួមទប់ស្កាត់ជំងឺនេះទាំងអស់គ្នា ។
កាលពីថ្ងៃទី១៩ ខែមីនា ឆ្នាំ២០២០ រដ្ឋបាលរាជធានីភ្នំពេញ ក៏បានចេញសេចក្តីអំពាវនាវដល់ម្ចាស់អាជីវកម្មចុងភៅ ម្ចាស់អគារ ម្ចាស់ភោជនីយដ្ឋាន ម្ចាស់មជ្ឈមណ្ឌលសម្រាប់ជួលរៀបចំពិធីទាំងអស់នៅក្នុងរាជធានីភ្នំពេញ កុំកាត់លុយ ឬយកលេសទាមទារសំណងនៃការខូចខាតពីម្ចាស់កម្មវិធីដែលកក់ប្រាក់ សុខចិត្តពន្យារពេល ឬលុបចោលនូវការរៀបចំពិធីផ្សេងៗ ដើម្បីស្ម័គ្រចូលរួមក្នុងការបង្ការ និងទប់ស្កាត់ការរីករាលដាលនៃជំងឺកូវីដ-19 នៅក្នុងរាជធានីភ្នំពេញ ក៏ដូចជាទូទាំងប្រទេសកម្ពុជាទាំងមូល។
ដោយឡែកចុងភៅមួយនៅស្រុកអន្លង់រមៀង ខេត្តកណ្តាល បានធ្វើឲ្យមហាជនកោតសរសើរជាខ្លាំង បន្ទាប់ពីគាត់បានបើកចិត្តទូលាយ មានការយល់ដឹងពីកាលៈទេសៈ ដោយលោកបានប្រកាសនៅលើបណ្តាញសង្គមថា ចំពោះភ្ញៀវ ឬអតិថិជនណា បានកក់លុយយកចុងភៅរបស់លោក ហើយអាក់ខានកម្មវិធីវិញដោយសារខ្លាចករណីកូវីដ១៩ អាចពន្យាពេលថ្ងៃខាងមុខបាន ឬឆ្នាំក្រោយបាន ដោយមិនមានការកាត់ថ្លៃសំណងអ្វីនោះទេ។
នេះបើតាមគណនីហ្វេសប៊ុកឈ្មោះ “ចុងភៅ ចិនសួង” បានបញ្ជាក់ឲ្យថា៖ «សួស្ដីបងប្អូននិងអតិថិជន(ម៉ូយៗ)ដែលបានជ្រើសរើសយកសេវាកម្មខ្ងុំបាទ ដោយសារតែមានជំងឺ(កូរ៉ូណា)ទើបធ្វើការអាក់ខានកម្មវិធីនីមួយៗ សំរាប់បងប្អូនដែលយកសេវាកម្មចុងភៅ(ចិន សួង)ថ្ងៃខាងមុខនេះ ហើយបងប្អូនបានកក់លុយ ហើយលុយកក់របស់បងប្អូនអាចពន្យាទៅថ្ងៃខាងមុខ រឺឆ្នាំក្រោយបាន ដោយសារយើងខ្ងុំឃើញសភាពជាក់ស្ដែង ដែលកំពុងតែកើតឡើងលើប្រជាជនខ្មែរយើងនិងបណ្ដាប្រទេសផ្សេងៗ» ៕ ដោយ៖ លឹម ហុង