ភ្នំពេញ៖ រដ្ឋមន្ត្រីក្រសួងព័ត៌មាន បានអះអាងថា ពាក់ព័ន្ធនឹងជំងឺឆ្លងកូរ៉ូណា (COVID-19) ដែលកំពុងវាយលុកសកលលោក ក៏ដូចជាប្រទេសកម្ពុជាផងដែរនោះ វានឹងរលាយបាត់ក្នុងពេលណាមួយ ប៉ុន្តែអ្វីដែលមិនបាត់ គឺប្រវត្តិសាស្ត្រ នឹងកត់សម្គាល់ចរិតមនុស្សរើសអើង ។
លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានថ្លែងសារលើហ្វេសប៊ុក នៅថ្ងៃទី២១ខែមីនាឆ្នាំ២០២០នេះថា “COVID-19 វាយលុកសកលលោក តែវានឹងរលាយបាត់ អ្វីដែលមិនបាត់គឺប្រវត្តិសាស្ត្រនឹងកត់សម្គាល់ចរិតមនុស្សចិត្តទូលាយ ចិត្តចង្អៀត ចិត្តឫស្យា ចរិតរើសអើង ចង្អៀតចង្អល់ “។
លោករដ្ឋមន្ត្រី បានមានប្រសាសន៍ថា “យើងនៅក្នុងសង្គមតែមួយ យើងចង់រស់ដូចគ្នា បងប្អូនខ្មែរឥស្លាមពេលនេះ ត្រូវយល់ថា យើងមិនមានការបែងចែកទេ មិនត្រូវអស់សង្ឃឹមទេ មនុស្សថោកទាបនឹងប្រឹងបន្ទាបបន្ថោកបងប្អូន តែបងប្អូនមិនត្រូវថោក តាមពួកទាំងនោះទេ !”។
បើតាមផេកហ្វេសប៊ុក Kon Damrey Srok Page Officail បានផ្សាយព័ត៌មាននៅថ្ងៃទី២១មីនានេះថា “ខណៈពេលនេះ បងប្អូនខ្មែរឥស្លាមស្រុកមេមត់ កំពុងសហការធ្វើតេស្តរក Covid19 នៅមន្ទីរពេទ្យបង្អែកស្រុកមេមត់ ដើម្បីចូលរួមទប់ស្កាត់ជំងឺឆ្លងមួយនេះ និងបំបាត់ចម្ងល់ ដែលបង្កើតឲ្យការរើសអើង ពីជនមួយចំនួន ។ ខ្ញុំសូមគោរពថ្លែងអំណរគុណ ដល់បងប្អូនខ្មែរកាន់សាសនាឥស្លាម មួយចំនួន នៅស្រុកមេមត់ ដែលមានសមាជិកគ្រួសារ ត្រឡប់ពីប្រទេសម៉ាឡេស៊ី ចំពោះការចូលរួមធ្វើតេស្តរក Covid-19 ជាបន្តបន្ទាប់ ក្រោយពីមានការពន្យល់ណែនាំរបស់ក្រុមគ្រូពេទ្យ និងថ្នាក់ដឹកនាំដែលជាប់ពាក់ព័ន្ធ ។ គិតមកដល់ព្រឹកថ្ងៃទី ២០ មីនា ២០២០ នេះ ក្រុមគ្រូពេទ្យ នៃមន្ទីរពេទ្យបង្អែកស្រុកមេមត់ បានធ្វើតេស្តរក Covid19 ចំពោះបងប្អូនខ្មែរ ដែលមានសមាជិកក្រុមគ្រួសារ ទើបត្រឡប់មកពីប្រទេសម៉ាឡេស៊ីនោះ ចំនួន ៦ នាក់ ជាលទ្ធផលឃើញថាអវិជ្ជមានទាំងអស់”។
សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ត្រីក្រសួងមហាផ្ទៃ បានថ្លែង នៅទីស្តីការក្រសួងមហាផ្ទៃ នាព្រឹកថ្ងៃសុក្រ ទី២០ ខែមីនា ឆ្នាំ២០២០ រដ្ឋមន្ដ្រីក្រសួងមហាផ្ទៃ ក្នុងពេលដែលសម្តេច បានដឹកនាំកិច្ចប្រជុំស្ដីពីវិធានការណ៍ការពារ មេរោគវិរុសកូរូណា ឬហៅថា ជំងឺកូវីដ-១៩ (COVID-19)ថា ពាក់ព័ន្ធនឹងការរើសអើង ប្រកាន់ដល់បងប្អូនខ្មែរឥស្លាម ដែលត្រូវបានរកឃើញ មានជំងឺកូវីដ១៩ បន្ទាប់ពីទៅធ្វើពិធីសាសនានៅម៉ាឡេស៊ីនោះ។
សម្ដេចក្រឡាហោម ស ខេង បានមានប្រសាសន៍ថា ច្បាប់ និងគោលនយោបាយរាជរដ្ឋាភិបាលកម្ពុជា ប្រឆាំងដាច់ខាតប្រកាន់រើសអើងនេះ កុំថាឡើយបងប្អូនខ្មែរឥស្លាមយើង សូម្បីតែជនបរទេសផ្សេងទៀត ដែលមានបញ្ហា គឺយើងមើលថែទាំទាំងអស់។
ក្រោយពីជំងឺកូវីដ-១៩ កំពុងមានកំណើន នៃការឆ្លងនៅកម្ពុជា សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានធ្វើការអំពាវនាវ ទៅដល់ប្រជាពលរដ្ឋខ្មែរទាំងអស់ថា កុំមានការរើសអើងបក្ខពួក និងពណ៌សម្បុរ ចំណែកអ្នកបង្ហោះព័ត៌មានមិនពិត ជុំវិញបញ្ហា កូវីដ-១៩ នឹងត្រូវទទួលខុសត្រូវមុខច្បាប់ជាមិនខាន។
ក្រោយបញ្ចប់កិច្ចប្រជុំ ស្ដីពី វិធានការណ៍ការពារជំងឺ កូវីដ-១៩ នាថ្ងៃទី២០ ខែមីនា ឆ្នាំ២០២០ នៅទីស្ដីការ ក្រសួងមហាផ្ទៃ សម្ដេចក្រឡាហោម ស ខេង បានមានប្រសាសន៍ថា នាពេលកន្លងមក រាជរដ្ឋាភិបាល ក៏បានធ្វើការណែនាំ ដល់ប្រជាជនកម្ពុជា មិនត្រូវបែងចែកជាតិសាសន៍ឡើយ ជាពិសេស មិនត្រូវរើសអើងផងដែរ។
ប្រសាសន៍សម្ដេចក្រឡាហោម “សម្ដេចតេជោលោក បានណែនាំថា មិនត្រូវចែកខ្មែរឥស្លាម ខ្មែរនេះ ខ្មែរនោះទេ គឺបងប្អូនខ្មែរ យើងបានផ្សាយហើយ។ ក្នុងសេចក្ដីណែនាំ របស់ក្រសួងមហាផ្ទៃ ទៅតាមខេត្តបញ្ជាក់ចំណុចនេះ ផងដែរ គឺថា មិនត្រូវរើសអើងទេ ហើយមិនត្រឹមខ្មែរឥស្លាមទេ ជនជាតិណាក៏ដោយ ដែលបានមកម្ពុជា ជួបបញ្ហានឹង (កូវីដ-១៩) យើងក៏មិនត្រូវរើសអើងដែរ”។
សម្ដេចក្រឡាហោមបន្ដថា “ដូចខ្ញុំបានបញ្ជាក់ថា នៅក្នុងពេលហ្នឹង ដែលសាកលលោកទាំងមូល កំពុងតែសាមគ្គីគ្នា ដើម្បីទប់ស្កាត់ជំងឺនឹង(កូវីដ-១៩) ហើយខ្មែរយើងក៏ដូចគ្នាដែរ។ ខ្ញុំនៅបន្ដអំពាវនាវថា ទុកដាក់ផលប្រយោជន៍បុគ្គលដោយឡែកទៅផលប្រយោជន៍ ក្រុមបក្ខពួក និងពណ៌សម្បុរដោយឡែកសិនទៅដើម្បីរួមគ្នាសិន”។
ជាងនេះទៅទៀត សម្ដេចក្រឡាហោម ស ខេង លើកឡើងថា ចំពោះអ្នករិះគន់រាជរដ្ឋាភិបាល តាមបែបប្រជាធិតេយ្យ រដ្ឋាភិបាលស្វាគមន៍ និងទទួលយក។ ជាពិសេស អ្នករិះគន់ រដ្ឋាភិបាល និងបង្ហោះព័ត៌មានមិនពិត ជុំវិញបញ្ហា កូវីដ-១៩ នាំឲ្យច្របូកច្របល់សង្គមជាតិ នឹងទទួលខុសត្រូវចំពោះមុខច្បាប់ផងដែរ។
ប្រសាសន៍សម្ដេចក្រឡាហោម “ព័ត៌មានពិត យើងសូមស្វាគមន៍ ព័ត៌មានពិតនេះថា ជួនអីគេប្រឆាំងរដ្ឋាភិបាល ក្នុងក្របខណ្ឌប្រជាធិបតេយ្យ។ រដ្ឋាភិបាលមិនយកចិត្តទុកដាក់ ស្អីៗអីចឹង អាហ្នឹងជាព័ត៌មានពិត។ ប៉ុន្ដែមួយទៀត ព័ត៌មានវាអត់មានទេ រួចហើយគាត់បំផុស អាហ្នឹងខ្ញុំសូមមេត្តាកាត់បន្ថយ ឈានទៅលុបបំបាច់ ដើម្បីយើងរួមគ្នា ការពារជីវិតសង្គមរបស់យើង ប្រជាជនរបស់យើង ឥឡូវនឹងមានបញ្ហា(កូវីដ-១៩) ហើយប្រហែលជាអាចនឹង តាមច្បាប់របស់យើង ជាធរមានអាចថា អ្នកទាំងឡាយណានៅតែប្រើប្រាស់ វោហាស័ព្ទបង្កបញ្ហាច្របូកច្របល់ ទទួលខុសត្រូវចំពោះមុខច្បាប់”។
ជាមួយគ្នានោះសម្តេចក្រឡាហោមបាន អះអាងថា រាជរដ្ឋាភិបាលនឹងបន្ដដោះស្រាយ បញ្ហាប្រឈមការលំបាកពលរដ្ឋ ដោយមិនរត់ចោលពលរដ្ឋ។ ហើយសម្ដេចក្រឡាហោមក៏បានបញ្ជាក់ថា ឥឡូវនេះយកវិធានការធំបំផុត ការពារអាយុជីវិតពលរដ្ឋ ខណៈជំងឺ កូវីដ-១៩ មានការកើនឡើង ហើយរហូតដល់ពេលនេះ មិនមានពលរដ្ឋខ្មែរណាម្នាក់ ស្លាប់ដោយ កូវីដ-១៩ទេ។
ជាងនេះទៅទៀត សម្ដេចក្រឡាហោម ស ខេង រំលឹកថា នាពេលកន្លងមក រាជរដ្ឋាភិបាលហាមឃាត់ ជនជាតិមួយចំនួន ដូចជា អឺរ៉ុប អាមេរិក អ៊ីរ៉ង់ មិនឲ្យចូលស្រុកខ្មែរ។ ដោយឡែក ជនជាតិថៃ រាជរដ្ឋាភិបាលមិនទាន់មានគោលការណ៍ បិទច្រកព្រំដែនឡើយ ខណៈរាជរដ្ឋាភិបាល បានបិទច្រកព្រំដែនជាមួយប្រទេសវៀតណាមផងដែរ។
ក្រសួងសុខាភិបាល បានប្រកាសថា គិតត្រឹមម៉ោង ៩យប់ ថ្ងៃទី២០ ខែមីនា ឆ្នាំ២០២០ នៅកម្ពុជា មានអ្នកកើតជំងឺកូវីដ១៩ ចំនួន ៥១នាក់ ( ស្ត្រី ៤នាក់ ) ក្នុងនោះ មានពលរដ្ឋខ្មែរ៣១នាក់។ ក្នុងចំណោមខ្មែរ ៣១នាក់ ដែលកើតជំងឺកូវីដ គឺមានអ្នកដែលទើបវិលត្រឡប់មកពីពិធីបុណ្យសាសនា នៅប្រទេសម៉ាឡេស៊ីចំនួន២៥នាក់។ រីឯស្ត្រីខ្មែរ ២នាក់ ដែលមិនបានធ្វើដំណើរទៅប្រទេសម៉ាឡេស៊ី គឺជាភរិយា ដែលឆ្លងពីស្វាមី ព្រមទាំងមានបុរសម្នាក់ មិនដែលទៅក្រៅប្រទេស តែមានប៉ះពាល់ជិតស្និទ្ធ និងបានចាប់ដៃជាមួយបុគ្គល ដែលបានវិលត្រឡប់ មកពីការចូលរួមពិធីសាសនា នៅប្រទេសម៉ាឡេស៊ី៕ដោយ៖កូឡាប
