ខេត្តកណ្ដាល៖ បុរស២នាក់ ផឹកស៊ីឌៀមដាមពាក្យសម្ដីដាក់គ្នា បង្កជាករណីហិង្សា រងរបួសធ្ងន់ម្នាក់ ខណៈពេលក្រុមជនរងគ្រោះ និងក្រុមជនសង្ស័យ បាននាំគ្នាមកផឹកស៊ីវង់ផ្សេងគ្នា ពេលផឹកស៊ីមានការ ឌៀមដាមពាក្យសម្ដីដាក់គ្នា ហើយក្រុមជនសង្ស័យបានពូថៅ និងកាំបិតខ្វែវ បានដេញកាប់ក្រុមជនរងគ្រោះ។ ហេតុការណ៍នេះបានកើតឡើងនៅត្រង់ចំណុច ដំរីស្រុត ភូមិព្រែកលួង ឃុំព្រែកលួង ស្រុកខ្សាច់កណ្តាល ខេត្តកណ្តាល កាលពីវេលាម៉ោង ២០និង២០នាទី ថ្ងៃទី២២ ខែមីនា ឆ្នាំ២០២០ ។
មន្ត្រីនគរបាលស្រុកខ្សាច់កណ្តាល បានឲ្យដឹងថា ជនរងគ្រោះមានគ្នា៣នាក់ ១/.ឈ្មោះ លី កុសល់ ភេទប្រុស អាយុ២២ឆ្នាំ ជនជាតិខ្មែរ មុខរបរ បុគ្គលិក (ក្រុមហ៊ុនតាំងប៊ុន) រស់នៅ ភូមិលើ ឃុំស្វាយជ្រំ ស្រុកខ្សាច់កណ្តាល ខេត្តកណ្តាល (របួសក្បាល១កន្លែង) ។ ២.ឈ្មោះ កែវ សុណាន់ ភេទប្រុស អាយុ១៦ ឆ្នាំជនជាតិខ្មែរ មុខរបរ កម្មករអនាម័យ នៅភូមិ ជាមួយគ្នា (ខូចខាតម៉ូតូ) ។ ៣.ឈ្មោះម៉ោង តុលា ភេទប្រុស អាយុ ២២ឆ្នាំជនជាតិ ខ្មែរ មុខរបរកសិករ នៅភូមិជ្រោយខ្សាច់ ឃុំបាក់ដាវ ស្រុកខ្សាច់កណ្តាល ខេត្តកណ្តាល (ខូចខាតម៉ូតូ) ។ ចំណែកឯជនសង្ស័យមានគ្នា២នាក់ ១.ឈ្មោះ ផាន ផាន់ឈី ភេទប្រុស អាយុ១៩ឆ្នាំ ជនជាតិ ខ្មែរ មុខរបរកីឡារត់ម៉ារ៉ាតុង រស់នៅ ភូមិព្រែកក្របៅទី៣ ឃុំព្រែកអំពិល ស្រុកខ្សាច់កណ្តាល ខេត្តកណ្តាល (រត់គេចខ្លួន) ។ ២.ឈ្មោះ ភី ពិសី ភេទប្រុស អាយុ ២១ឆ្នាំ ជនជាតិខ្មែរ មុខរបរកសិករ រស់នៅ ភូមិស្វាយជ្រំ ឃុំស្វាយជ្រំ ស្រុកខ្សាច់កណ្តាល ខេត្តកណ្តាល (រត់គេចខ្លួន) ។
វត្ថុតាងរួមមាន៖ ម៉ូតូគ្រឿង២ ៖ ម៉ាក់C១២៥ ពណ៌ខ្មៅ ស៊េរី២០១៧ ពាក់ផ្លាកលេខភ្នំពេញ ១GR ០៩៦៨ បណ្តាលឲ្យបែកកុងទ័រ និង១គ្រឿងទៀតម៉ាកC១២៥ ពណ៌ខ្មៅ ស៊េរី២០១៩ (ជារបស់ជនរងគ្រោះ) ។
ក្រោយពីមានហេតុការណ៍កើតឡើង ជនរងគ្រោះ ត្រូវបានក្រុមគ្រួសារ បញ្ជូនទៅព្យាបាលរបួសនៅមន្ទីរពេទ្យ២៤ម៉ោង អរិយ៍ក្សត្រ ។ ចំណែកក្រុមជនសង្ស័យ កម្លាំងប៉ុស្តិ៍ និងកម្លាំងផ្នែកជំនាញអធិការដ្ឋាន កំពុងស្វែងរកចាប់ខ្លួន ដើម្បីបន្តអនុវត្តតាមនីតិវិធី ៕ដោយ៖កូឡាប
