ភ្នំពេញ ៖ សាលាដំបូងរាជធានីភ្នំពេញបានប្រកាសលើកពេលសវនាការលើសំណុំរឿង លោក កឹម សុខា តាមពាក្យសុំរបស់មេធាវីការសិទ្ធិ និងមេធាវីតំណាងភាគីរដ្ឋប្បវេណី (មេធាវីរាជរដ្ឋាភិបាល) រហូតដល់មានការជូនដំណឹងថ្មី ដោយមូលហេតុ ទប់ស្កាត់ការរីករាលដាលនៃជំងឺ covid -19។
លោកកូយសៅប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ បានចារឯកភាព តាមពាក្យសុំ ដោយឲ្យពន្យារពេលរហូតដល់មានការជូនដំណឹងកាលបរិច្ឆេទសវនាការជាថ្មី។
បើតាមមេធាវីចេង ប៉េងហាប់ ជាមេធាវីតំណាងដោយអាណត្តិឱ្យរាជរដ្ឋាភិបាលកម្ពុជាបានស្នើសុំប្រធានសាលាដំបូងរាជធានីភ្នំពេញសុំពន្យារពេលសវនាការលើសំណុំរឿងលោកកឹម សុខាដែលនឹងប្រព្រឹត្តទៅនៅថ្ងៃទី 25 – 26 ខែមីនា ឆ្នាំ 2020 ទៅពេលក្រោយសិន។ បើតាមលោកមេធាវី ដោយពេលបច្ចុប្បន្ននេះ គឺកំពុងស្ថិតក្នុងស្ថានភាពផ្ទុះជំងឺរីករាលដាលកូវីដ១៩ ដែលជាជំងឺកាចសាហាវ និងមានភាពងាយស្រួលក្នុងការឆ្លង រាជរដ្ឋាភិបាលកម្ពុជា និងបណ្ដាលប្រទេសទូទាំងសកលលោក កំពុងរួមគ្នាយ៉ាងយកចិត្តទុកដាក់ ប្រយុទ្ធប្រឆាំងនឹងការរីករាលដាលនេះ ដោយក្នុងនោះមានការដាក់បម្រាមហាមឃាត់មិនឲ្យមានការជួបជុំគ្នាច្រើនឡើយ។ ហើយម្យ៉ាងទៀត នៅក្នុងបន្ទប់សវនាការ គឺមានភាពតូចចង្អៀត ដែលមិនអាចអង្គុយឲ្យឃ្លាតពីគ្នា ក្នុងចម្ងាយ 2ម៉ែត្រ ដូចតាមការណែនាំរបស់ក្រសួងសុខាភិបាលបាននោះទេ។ ដូច្នេះដើម្បីចៀសវាង ក្នុងការឆ្លងនិងកុំឲ្យប៉ះពាល់ ដល់ផលប្រយោជន៍របស់កូនក្តី យើងខ្ញុំសូមលោកប្រធាន មេត្តាយោគយល់និងអធ្យាស្រ័យ ក្នុងការពន្យារពេលសវនាការ ក្នុងសំណុំរឿងនេះទៅថ្ងៃក្រោយសិន។
ចំណែកលោកមេធាវី ចាន់ ចេង ដែលជាសហមេធាវីការពារក្តីជូនលោកកឹម សុខា ក៏បានសរសេរលិខិតមួយច្បាប់ ស្នើសុំប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ សុំលើកពេលសវនាការទៅថ្ងៃក្រោយ ដើម្បីសុវត្ថិភាពនិងសុខភាព សម្រាប់ទាំងអស់គ្នា ក្នុងបន្ទប់សវនាការពាក់ព័ន្ធនឹងជំងឺឆ្លងបច្ចុប្បន្ន។ លោកមេធាវីចាន់ ចេង បានលើកឡើងថា ដើម្បីសុវត្ថិភាពសុខភាព នៅក្នុងបន្ទប់សវនាការពាក់ព័ន្ធនឹងជំងឺឆ្លងបច្ចុប្បន្ននេះ ដែលរាជរដ្ឋាភិបាលកម្ពុជា និងពិភពលោកទាំងមូល កំពុងរួមគ្នាប្រយុទ្ធប្រឆាំង និងការរីករាលដាលជំងឺឆ្លង ដ៏អាក្រក់នេះ យើងខ្ញុំជាសហមេធាវី សូមស្នើលោកប្រធានក្រុមប្រឹក្សា ពិចារណាចូលរួមទប់ស្កាត់ ជាមួយរាជរដ្ឋាភិបាល លើករណីនេះ ដោយលើកពេលសវនាការទៅថ្ងៃក្រោយ៕ ដោយ៖កូឡាប