ភ្មំពេញ៖ ស្ថានទូតកម្ពុជានៅសិង្ហបូរី ជួយសម្របសម្រួលដល់ប្រជាពលរដ្ឋខ្មែរចំនួន ៤រូប (នារី២រូបនិងបុរស២រូប ) ដែលបានជាប់នៅព្រលានយន្តហោះ Changi ប្រទេសសិង្ហបូរី បន្ទាប់ពីពួកគេបានធ្វើការជាបុគ្គលិកកាស៊ីណូនៅក្នុងប្រទេសហ្កាណា ហើយកាស៊ីណូត្រូវបិទ ដោយសារបញ្ហាវីរុសកូវីដ១៩ ទើបត្រឡប់មកកម្ពុជាវិញ តែជាប់គាំងនៅសិង្ហបុរី នេះបើតាមការផ្សាយព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៧ខែមីនា ឆ្នាំ២០២០នេះ។
អាស្រ័យដោយមានការសម្របសម្រួលពីស្ថានទូតកម្ពុជាប្រចាំសិង្ហបូរី និងកិច្ចសហការពីក្រសួងការបរទេសសិង្ហបុរី អាជ្ញាធរអាកាសចរណ៍ស៊ីវិលសិង្ហបុរី (CAAS) និងតំណាងក្រុមហ៊ុនអាកាសចរណ៍អេស្យូពី បានជួយរកជើងហោះហើរសម្រាប់អ្នកទាំង៤ ដោយទិញសំបុត្រជាថ្មីមកកម្ពុជា ពីសិង្ហបុរី និងដោយត្រូវឆ្លងកាត់ទីក្រុងដូហា និងហូជីមិញ តាមជើងយន្តហោះអាកាសចរណ៍កាតា (Qatar Airway)។ ដោយចេញដំណើរពីសិង្ហបុរី នៅវេលាម៉ោង ២០:២៥ ក្នុងយប់ ថ្ងៃ២៦ មីនា ពលរដ្ឋខ្មែរទាំង៤នាក់ គ្រោងមកដល់កម្ពុជានៅព្រឹកព្រហាមថ្ងៃទី២៨ ខែមីនានេះ។
ដើម្បីឲ្យពួកគាត់មានអារម្មណ៍កក់ក្តៅ ឯកឧត្តមឯកអគ្គរាជទូត ងួន សុខវេង និងលោកទីប្រឹក្សាស្ថានទូត បានទៅជួបសំណេះសំណាលជាមួយពួកគាត់នៅព្រលានយន្តហោះ រហូតដល់គាត់ចេញដំណើរទៅ។ ក្នុងឱកាសនោះ ឯកឧត្តមឯកអគ្គរាជទូត បានផ្តល់ជូនទឹកអនាម័យសំអាតដៃ និងម៉ាស ព្រមទាំងណែនាំឲ្យពួកគាត់អនុវត្តអនាម័យឲ្យបានខ្ជាប់ខ្ជួន ទាំងក្នុងយន្តហោះ និងក្នុងព្រលានដែលត្រូវឆ្លងកាត់។
សូមបញ្ជាក់ផងដែរថា បងប្អូនខ្មែរទាំង៤នាក់នេះ បានធ្វើការជាបុគ្គលិកកាស៊ីណូអស់រយៈពេល ១០ខែមកហើយ នៅក្នុងប្រទេសហ្កាណា។ ដោយកាស៊ីណូត្រូវបិទ ដោយសារបញ្ហាវីរុសកូវីដ១៩ ពួកគាត់ត្រូវត្រឡប់មកកម្ពុជាវិញ ហើយបានជាប់គាំងនៅសិង្ហបុរីតែម្តង៕ដោយ៖កូឡាប