តាកែវ៖ប្រធានមន្ទីរអប់រំយុវជននិងកីឡាខេត្តតាកែវ ណែនាំឲ្យគ្រូជំនាញជួយបង្ហាត់បង្រៀនសិស្សថ្នាក់ទី១២ តាមអនឡាញ ដើម្បីពង្រឹងពីសមត្ថភាពរបស់សិស្ស ជាពិសេសត្រូវតែចុះស្វ័យសិក្សាជាមួយសិស្ស ដល់ផ្ទះ ដើម្បីបង្កើនការទំនាក់ទំនងគ្នា តាមប្រព័ន្ធអនឡាញ លើការបង្រៀន និងរៀននៅតាមផ្ទះ របស់សិស្សថ្នាក់ទី១២ទាំងអស់ នៅទូទាំងខេត្តតាកែវ និងចូលរួមផ្សព្វផ្សាយនៅវិធីបង្ការ និងទប់ស្កាត់ជំងឺកូវីដ១៩ ពីការចេះធ្វើអនាម័យលើខ្លួន។
ជុំវិញវិធានការក្នុងការជំរុញឲ្យលោកគ្រូអ្នកគ្រូបង្រៀនថ្នាក់ទី១២ ត្រូវតែបង្រៀនដល់សិស្សថ្នាក់ទី ១២ លោក ឡោ វីរិទ្ធ ប្រធានមន្ទីរអប់រំយុវជននិងកីឡាខេត្តតាកែវ បានប្រាប់ភ្នាក់ងារព័ត៌មានស៊ីអ៊ីអិន ដឹងនៅព្រឹកថ្ងៃទី៧ ខែមេសា ឆ្នាំ២០២០នេះថា មន្ទីរចង់ឲ្យប្អូនៗដែលសម្រាកពីការងាររៀនសូត្រនៅផ្ទះ យកពេលទំនេរ និងពេលវេលាខ្លះមករៀន ជាមួយនឹងគ្រូជំនាញតាមមុខវិទ្យាផ្សេងគ្នា តាមប្រព័ន្ធអនឡាញជាមួយនិងគ្រូ មួយទៀតគឺតម្រូវឲ្យគ្រូ និងនាយកសាលាទាំងអស់ ត្រូវចុះទៅដល់ខ្នងផ្ទះតែម្តង ដើម្បីស្វ័យសិក្សាជាមួយនិងសិស្សឲ្យពួកគាត់រៀនគិត រៀនធ្វើនៅផ្ទះរបស់ខ្លួនរួចផ្ញើឯកសារ វិលត្រឡប់មកឲ្យគ្រូត្រួតពិនិត្យ តាមប្រព័ន្ធអនឡាញស្មាតហ្វូន ហើយតម្រូវឲ្យគ្រូជំនាញឆ្លើយតបក្រោយពេលត្រួតពិនិត្យរួច ដើម្បីចង្អុលបង្ហាញបន្ថែម និងជួយជ្រោមជ្រែងដល់ពួកគាត់ នៅក្នុងឆ្នាំសិក្សាប្រឡងសញ្ញាបត្រទុតិយភូមិនេះ ឲ្យមានលទ្ធផលល្អប្រសើរ ខណៈដែលប្រទេសកម្ពុជា របស់យើងត្រូវបាន បើកបវេសនកាលតូចមួយ ដោយឲ្យសិស្សឈប់សម្រាកមុនកាលកំណត់ មួយរយៈសិន ធ្វើឲ្យការបង្រៀន និងរៀនរបស់ពួកគាត់មានការយឺតយ៉ាវ ដោយសារតែ ការចូលរួមទាំងអស់គ្នា ទប់ស្កាត់ការរីករាលដាលនូវជំងឺរលាកសួតថ្មី ហៅថា កូវីដ១៩ ដែលកំពុងកើតឡើងនៅលើសកលលោក និងបានកំពុងតែគំរាមកំហែងដល់អាយុជីវិត របស់មនុស្សជាច្រើន ដោយសារតែប្រភេទនៃជំងឺកូវីដ១៩នេះ នៅមិនទាន់មានថ្នាំព្យាបាល ណាឲ្យបានច្បាស់លាស់ ដោយមានការទទួលស្គាល់ពីអង្គការសុខភាពពិភពលោកនៅឡើយ។ ក៏ប៉ុន្តែប្រទេសកម្ពុជារបស់យើង បើតាមសេចក្តីរបស់ក្រសួងសុខាភិបាលកម្ពុជា គិតត្រឹមម៉ោង ៧ព្រឹក ថ្ងៃទី៧ ខែមេសា ឆ្នាំ២០២០នេះ មានអ្នកកើតនៅជំងឺកូវីដ ១៩នេះ ចំនួន ១១៥ករណី ហើយមកទល់ពេលនេះ គឺកម្ពុជារបស់យើងបានធ្វើការបានជាសះស្បើយចំនួន ៥៨ករណី បើគិតជាភាគរយ ស្មើនិង ៥០,៤៣% បើធៀបនឹងចំនួន អ្នកកើតនូវវីរុសកូវីដ១៩ ៕ដោយ៖ តាកែវ
