ទីបំផុតទៅកូរ៉េខាងជើង បានសម្រេចបញ្ជូនគណប្រតិភូពិសេសមួយ ឲ្យធ្វើដំណើរទៅកាន់កូរ៉េខាងត្បូង ដើម្បីត្រួតពិនិត្យ ទីតាំងសម្តែងសិល្បៈ និងការប្រកួតកីឡា អូឡាំពិករដូវរងារ។ គណប្រតិភូពិសេសនេះ ដឹកនាំដោយ តារាចំរៀងប្រជាប្រិយ របស់កូរ៉េខាងជើង គឺនាង យ៉ុន សុងវ៉ុល។
ការមកដល់របស់គណប្រតិភូកូរ៉េខាងជើង នៅលើទឹកដីកូរ៉េខាងត្បូងនេះ គឺជារឿងកំរណាស់ ហើយឱកាសនេះ ត្រូវបានរដ្ឋាភិបាលកូរ៉េខាងត្បូង រៀបចំបំផុសបំផុល ព្រោះវាជានិមិ្មតរូប បង្ហាញពីសញ្ញាណ នៃមិត្តភាព រវាងប្រទេសបងប្អូនកូរ៉េខាងទាំងពីរនេះ។
នៅព្រឹកថ្ងៃអាទិត្យនេះ ទូរទស្សន៍កូរ៉េខាងត្បូង សឹងតែគ្រប់ប៉ុស្តិ បានផ្សាយបន្តផ្ទាល់ នូវរូបភាពនៃការមកដល់របស់គណប្រតិភូកូរ៉េខាងជើង។ គេឃើញ រថយន្តមួយគ្រឿង ដឹកសមាជិកគណប្រតិភូនេះ ចំនួន៧នាក់ បានបើកឆ្លងព្រំដែន ឆ្ពោះទៅកាន់ស្ថានីយ៍រថភ្លើងនៅទីក្រុងសេអ៊ូល។ មួយម៉ោងក្រោយមក នៅស្ថានីយ៍នោះ ដែលមានអ្នកយាមការពារសន្តិសុខរាប់រយនាក់ គេបានឃើញគណប្រតិភូទាំង៧នាក់ ដែលដឹកនាំដោយតារាចំរៀងស្រីកូរ៉េខាងជើង នាង យ៉ុន សុងវ៉ុល (Hyon Song Wol) បានចុះពីរថយន្ត ហើយឡើងរថភ្លើង ឆ្ពោះទៅកាន់ ទីក្រុង Gangneung ស្ថិតនៅភាគខាងកើតកូរ៉េខាងត្បូង។គណប្រតិភូនឹងចុះទៅពិនិត្យទីតាំងប្រកួតកីឡា និងទីតាំងសម្តែងសិល្បៈ នៅទីក្រុង Gangneung ហើយនៅថ្ងៃចន្ទ គណប្រតិភូ និងធ្វើដំណើរទៅកាន់ទីក្រុង Pyeongchang។ ទីក្រុងទាំង២នេះហើយ ដែលនឹងទទួលរៀបចំ កីឡាអូឡាំពិករដូវរវាង ចាប់ពីថ្ងៃទី ៩កុម្ភៈ ទៅ។ គណប្រតិភូនេះ នឹងត្រលប់ទៅវិញ នៅព្រឹកថ្ងៃអង្គារ។ ដោយឡែក ក្នុងសប្តាហ៍ក្រោយនេះ នៅមានគណប្រតិភូកូរ៉េខាងជើងផ្សេងទៀត ដែលនឹងចុះមកត្រួតពិនិត្យ ទីតាំងហ្វឹកហាត់កីឡាជិះស្គីទឹកកក នៅភាគខាងជើងកូរ៉េខាងត្បូង។
ចំណែកភាគីកូរ៉េខាងត្បូងវិញ ក៏នឹងបញ្ជូន គណប្រតិភូទៅកាន់កូរ៉េខាងជើងដែរ ដើម្បីត្រួតពិនិត្យទីតាំងហ្វឹកហាត់ ព្រោះតាមការគ្រោងទុក ក្រុមកីឡាករទាំងពីរប្រទេស នឹងត្រូវហ្វឹកហាត់រួមគ្នា។
នៅមានចំណុចផ្សេងច្រើនទៀត ដែលភាគីទាំង២បានព្រមព្រៀងគ្នា។ កូរ៉េខាងជើង និងខាងត្បូង បានធ្វើកិច្ចព្រមព្រៀងពិសេសមួយ ដោយបានស្នើទៅកាន់គណកម្មការកណ្តាលកីឡាអូឡាំពិក នៅទីក្រុងឡូហ្សានប្រទេសស្វីស។ កាលពីថ្ងៃសៅរ៍ ទី២០ មករា គណកម្មការអូឡាំពិក បានអនុម័តយល់ព្រមលើកិច្ចព្រមព្រៀងនេះហើយ។
តាមការកំណត់ កូរ៉េខាងជើង នឹងបញ្ជូនកីឡាករ ប្រុសស្រី ចំនួន២២នាក់ ឲ្យចូលរួមប្រកួតកីឡាចំនួន៣ប្រភេទ គឺ ទីមួយ កីឡាជិះស្គីទឹកកក ទីពីរ កីឡាហុកគី ឬកីឡាវាយហ្គោលលើទឹកកក និងទីបីគឺរបាំលើទឹកកក។ សរុបទៅទាំងក្រុមប្រុសនិងស្រី គឺកូរ៉េខាងជើងចូលរួមទាំងអស់ ៥វិញ្ញាសារ។ ចំណុចមួយដែលពិសេសលើកនេះ គឺក្រុមកីឡាការនីវាយហ្គោលលើទឹកកក របស់កូរ៉េខាងជើង និងខាងត្បូង នឹងច្របាច់ចូលគ្នាជាក្រុមតែមួយ ដើម្បីប្រកួតជាមួយដៃគូរផ្សេង ក្នុងវិញ្ញាសារនេះ។
ថ្ងៃបើកសម្ភោធ គណប្រតិភូកីឡាទាំងពីរប្រទេស នឹងដើរបង្ហញក្បួនរួមគ្នា ក្រោមទង់តែមួយ ដែលជាទង់ពិសេស តំណាងឲ្យឧបទ្វីបកូរ៉េរួបរួមគ្នា។
ព្រឹត្តិការណ៍ ដែលកំពុង និង កើតឡើងក្នុងពេលខាងមុខ ទាំងអស់នេះ គឺជាព្រឹត្តិការណ៍ដ៏កម្រណាស់ សម្រាប់ប្រទេសបងប្អូនកូរ៉េទាំងពីរ។ នេះសបង្ហាញថា ការជានាគ្នា ចាប់ដៃគ្នា កំពុងតែបោះជំហានទៅមុខ ក្នុងសុទិដ្ឋិនិយម។ តែយ៉ាងណា អ្វីៗនៅពិបាកស្មានណាស់។
សម្រាប់រដ្ឋាភិបាលកូរ៉េខាងត្បូងឯណោះវិញ យើងឃើញថា គេបានដាក់កាយដាក់ចិត្ត ធ្វើរឿងនេះឲ្យបានសម្រេច។ លោក ប្រធានាធិបតី មូន ជាអ៊ីន ចង់ឆក់ឱកាសនេះ ផ្តល់ក្តីសង្ឃឹម ដល់ប្រជាជនកូរ៉េទាំងសងខាង ថាគ្មានអ្វីប្រសើរជាងការរាប់អានគ្នា អត់ឱនគ្នា… ៕ សូយន
