ក្មេងមួយចំនួនចូលចិត្តប្រព្រឹត្តិកំហុសផ្តេសផ្តាស ដែលធ្វើឲ្យឪពុកម្តាយឈឺក្បាល ឬមានបញ្ហាដោយសារតែពួកគេ។
ចំណែកក្មេងប្រុសអាយុ ៥ឆ្នាំម្នាក់នេះ បានបើកឡានឪពុកម្តាយរបស់គាត់ ដើម្បីមកទិញឡានប្រណិត ខណៈខ្លួនមានលុយត្រឹម ៣ដុល្លារប៉ុណ្ណោះក្នុងហោប៉ៅ។
ប៉ុន្តែក្មេងប្រុសដ៏ព្រហើននេះ ត្រូវបានប៉ូលីសក្នុងរដ្ឋ Utah សហរដ្ឋអាមេរិចបញ្ឈប់គាត់ ពេលកំពុងបើកបរលើដងផ្លូវ។
ប៉ូលិសមានការភ្ញាក់ផ្អើលយ៉ាងខ្លាំង នៅពេលពួកគេឃើញក្មេងប្រុសម្នាក់ កំពុងអង្គុយនៅកន្លែងបើក។ ក្មេងប្រុសនោះនិយាយថា ខ្លួនចង់ទិញឡានម៉ាក Lamborghini។
គាត់និយាយប្រាប់ប៉ូលិសថា គេបានចេញពីផ្ទះ ក្រោយពេលម្តាយគេ មិនព្រមទិញឡានប្រណិតឲ្យខ្លួន ដែលជាប្រភេទឡានមានតម្លៃប្រហែល ១៨០.០០០ដុល្លារ ដូច្នេះគេក៏បានឈ្លោះគ្នាជាមួយម្តាយ។
ប៉ូលិសយាមល្បាតម្នាក់ថ្លែងថា “ក្មេងប្រុសនោះសម្រេចចិត្តយកឡានបើកទៅរដ្ឋ California ដើម្បីទិញឡានដែលខ្លួនចង់បានខ្លួនឯង។ ប៉ុន្តែក្មេងនោះប្រហែលមិនអាចទិញបានឡើយ ដោយសារតែគាត់មានលុយត្រឹម ៣ដុល្លាប៉ុណ្ណោះក្នុងកាបូប”។
ក្មេងប្រុសនោះបានអង្គុយនៅចុងកៅអី ដើម្បីអាចឲ្យជើងដល់ជ្នាន់បាន។ គេត្រូវបានប៉ូលិសបញ្ឈប់ ក្រោយបើកចេញពីផ្ទះបានប្រហែល ៥នាទី។
ជាសំណាងល្អ មិនមាននរណាម្នាក់មានគ្រោះថ្នាក់អ្វីឡើយ។ សារពត៌មានក្នុងតំបន់បានរាយការណ៍ថា ហេតុការណ៍នោះទុកឲ្យព្រះរាជអាជ្ញាធ្វើការសម្រេច ថាតើត្រូវចោទប្រកាន់ឪពុកម្តាយក្មេងនោះឬយ៉ាងណា។
ពេលមានហេតុការណ៍នោះ ឪពុកម្តាយក្មេងព្រហើននោះកំពុងធ្វើការ ហើយក្មេងនោះបាននៅជាមួយនឹងបងប្អូនម្នាក់ នៅពេលគាត់យកឡានទៅបើក។
ប៉ូលិសក៏បានចេញសេចក្តីក្រើនរំលឹកដើម្បីឲ្យប្រាកដថា សោឡានមិនគួរត្រូវយកបានដោយស្រួលៗនោះឡើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
