ភ្នំពេញ៖ប្រធានអង្គភាពប្រឆាំងអំពើពុករលួយ បានថ្លែងថា ក្នុងរយៈពេល៣ខែចុងក្រោយនេះ អង្គភាព បានធ្វើលិខិតឲ្យសាមីរងការចោទប្រកាន់ធ្វើការបំភ្លឺចំនួន៥២ បន្ថែមពីលិខិតបំភ្លឺកន្លងមកចំនួន៧៣លិខិត ខណៈពេលដែលពាក្យបណ្តឹងក្នុងខែមីនា មេសា និងឧសភា ត្រូវបានពិនិត្យ និងស្រាវជ្រាវ ស្តាប់ការបំភ្លឺពីសាម៉ីរងបណ្តឹង។
ឯកឧត្តមទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំងអំពើពុករលួយ ( ACU ) បានថ្លែងបែបនេះ ក្នុងកិច្ចប្រជុំលើកទី៥៦ អាណត្តិទី២ នៃក្រុមប្រឹក្សាជាតិប្រឆាំងអំពើពុករលួយ កាលពីថ្ងៃទី២ ខែមិថុនា ឆ្នាំ២០២០ នៅទីស្តីការអង្គភាព។
ឯកឧត្តមទេសរដ្ឋមន្ត្រី បានរាយការណ៍អំពីសកម្មភាពការងាររបស់អង្គភាពប្រឆាំងអំពើពុករលួយ ក្នុងអំឡុង៣ខែកន្លងមក (មីនា មេសា ឧសភា) ។
ឯកឧត្តម យន់ ស៊ីណាត អនុប្រធានអង្គភាពប្រឆាំងអំពើពុករលួយ បានឲ្យដឹងថា ក្នុងរយៈពេល៣ខែចុងក្រោយនេះ ការប្រកាសទ្រព្យសម្បត្តិ និងបំណុល ខែមីនា មេសា ឧសភា ឆ្នាំ២០២០ មានចំនួន ៥៨០នាក់ ក្នុងនោះ មានការប្រកាសទ្រព្យសម្បត្តិ និងបំណុលចុងក្រោយ ចំនួន២៤ ពីមន្ត្រីដែលបានលាឈប់ពីការងារ ចូលនិវត្តន៍ ឬត្រូវបានបញ្ចប់ការពីការងារ។ ឯកសារប្រកាសទ្រព្យសម្បត្តិនិងបំណុល ចំនួន៤ ទៀត ត្រូវបានកំណត់ឲ្យប្រកាសតាមតម្រូវរបស់អង្គភាពប្រឆាំងអំពើពុករលួយ តាមសំណូមពរស៊ើបអង្កេត។
អនុប្រធានអង្គភាព បានបន្តថា ពាក្យប្តឹងក្នុងរយៈពេល៣ខែកន្លងនេះ មានប្រហែល ៥០ពាក្យប្តឹង ក្នុងមួយខែៗ ដោយពាក្យប្តឹងចំនួន៨៩ ត្រូវបានពិនិត្យ ស្រាវជ្រាវ ស្តាប់ការបំភ្លឺ ហើយអង្គភាពប្រឆាំងអំពើពុករលួយ បានឆ្លើយតបទៅម្ចាស់បណ្តឹងរួច ដើម្បីបញ្ចប់ ។ អង្គភាពប្រឆាំងអំពើពុករលួយ បានធ្វើលិខិតឲ្យសាមីរងការចោទប្រកាន់ ធ្វើការបំភ្លឺចំនួន ៥២ បន្ថែមពីលិខិតបំភ្លឺកន្លងមកចំនួន៧៣លិខិត។
របាយការណ៍អំពី ករណីបណ្តឹងអតីតឧត្តមសេនីយ៍ទោ សឿ ស៊ីថា (ដែលត្រូវតុលាការកាត់ទោសពីបទសូកប៉ាន់ និងរំលោភអំណាច) ទៅឧត្តមក្រុមប្រឹក្សានៃអង្គចៅក្រម ពីចៅក្រមដែលកាត់ទោសគាត់។ ករណីអន្តរាគមន៍ទៅតុលាការខេត្តកណ្តាល មិនឲ្យឃុំខ្លួនជនល្មើស ជិប អៀង និង ជា ស៊ីវសរ ។
ឯកឧត្តមតុប សំ ប្រធានក្រុមប្រឹក្សាជាតិប្រឆាំងអំពើពុករលួយ បានថ្លែងថា ក្រុមប្រឹក្សាជាតិប្រឆាំងអំពើពុករលួយ បានយកឱកាសនៃកិច្ចប្រជុំនេះ អរគុណ និងវាយតម្លៃខ្ពស់ដល់អង្គភាពប្រឆាំងអំពើពុករលួយ ដែលបានខិតខំបំពេញការងារ យ៉ាងល្អ តាមផែនការយុទ្ធសាស្ត្រជាតិ ប្រឆាំងអំពើពុករលួយ ២០១៥-២០២០ របស់ក្រុមប្រឹក្សាជាតិប្រឆាំងអំពើពុករលួយអាណត្តិទី២។ ក្រុមប្រឹក្សាជាតិប្រឆាំងអំពើពុករលួយ នៅតែបង្ហាញជំហរស្ថិតនៅជាមួយអង្គភាពប្រឆាំងអំពើពុករលួយ គាំទ្រអង្គភាពប្រឆាំងអំពើពុករលួយ និងរួមគ្នាទទួលខុសត្រូវជាមួយអង្គភាពប្រឆាំងអំពើពុករលួយ ក្នុងការប្រយុទ្ធប្រឆាំងអំពើពុករលួយ៕
ដោយ៖កូឡាប
