សៀមរាប៖ នៅព្រឹកមិញនេះ ថ្ងៃទី១៥ ខែមិថុនា ឆ្នាំ២០២០ មានហេតុការណ៍មួយបង្កឲ្យមានការភ្ញាក់ផ្អើលយ៉ាងខ្លាំង នៅក្នុងមន្ទីរពេទ្យរដ្ឋមួយកន្លែង នៅក្នុងខេត្តសៀមរាប ដោយសារតែកូនក្រពើ១ក្បាល បានបង្ហាញខ្លួននៅក្នុងមន្ទីរពេទ្យមិនដឹងតាំងពីពេលណាមក បន្ទាប់ពីល្ងាចម្សិលមិញនេះ មានភ្លៀងធ្លាក់ស្ទើរគ្រប់កន្លែង លាយឡំនិងខ្យល់ផងដែរ។
ភ្លាមៗនោះ គេក៏ពុំបានដឹងថា កូនក្រពើ១ក្បាលនេះ បានឡើងចេញពីអាងចិញ្ចឹមណាមួយ នៅក្នុងតំបន់នោះទេ។ នេះបើយោងតាមគណនីហ្វេសប៊ុកគ្រូពេទ្យម្នាក់ឈ្មោះ Sanin Sy បានបង្ហោះស្វែងរកម្ចាស់លេងសើចថា៖ «ដំណឹងស្វែងរកសាច់ញាតិ បើបងប្អូនណាដែលបានបាត់សាច់ញាតិដូចនៅក្នុងរូបនេះសូមអញ្ជើញទំនាក់ទំនងតាមរយៈហ្វេសប៊ុកនេះ» ។
ទោះយ៉ាងណា រហូតមកទល់ពេលនេះ កូនក្រពើនេះកំពុងត្រូវបានរក្សាទុកនៅក្នុងមន្ទីរពេទ្យនៅឡើយ ខណៈរង់ចាំម្ចាស់ចិញ្ចឹម ឬ មន្ត្រីជំនាញផ្នែករដ្ឋបាលជលផល ចុះមកពិនិត្យ និងទទួលយកទៅព្រលែងនៅកន្លែងសុវត្ថិភាពវិញ៕ ដោយ៖ លឹម ហុង
