ភ្នំពេញ៖ ពាក្យពេចន៍ផ្តាំផ្ញើមួយពីកូនស្រី មុនពេលចូលកេង សរសេរទុកជូនឪពុកជាមន្ត្រីប៉ូលិសម្នាក់ ក្រោយវិលត្រឡប់ពីចុះបំពេញការងារសន្តិសុខពេលយប់ បានធ្វើឲ្យគ្រប់គ្នានៅលើបណ្តាញសង្គមក្តុកក្តួលរំជួលចិត្ត ស្ទើរស្រក់ទឹកភ្នែក។
នេះបើយោងតាមគណនីហ្វេសប៊ុកបងប្រុសប៉ូលិសខាងលើដែលមានឈ្មោះ Mech Phy Run ដែលជាបុរសពោះម៉ាយ មិនដឹងថាប្រពន្ធរបស់គាត់ស្លាប់ចោល ឬ ក៏បែកបាក់គ្នាយ៉ាងណា តែបានបន្យល់ទុកកូនស្រីជាទីស្រឡាញ់ម្នាក់នៅជាមួយគាត់ បានសរសេររៀបរាប់ពីសំបុត្រផ្តាំផ្ញើរបស់កូនស្រីទាំងអារម្មណ៍អួងដើមកថា៖ «មកពីចុះជាតិស្រវឹងវិញកូនសសេរសំបុត្រទុកឲ្យ មានអារម្មណ៍ថានឹកដល់ម្តាយរបស់កូន មិនគួរកូនកើតមកកំព្រាសោះ» ។
គាត់ក៏បានឲ្យបងប្អូននៅក្នុងបណ្តាញសង្គមបានដឹងថា ពុំមែនតែកូនស្រីរបស់គាត់ទេ ដែលកំព្រាម្តាយ គឺមានកូនក្មួយរបស់គាត់៣នាក់ទៀត ក៏កំព្រាដូចគ្នាដែរ គឺសុទ្ធតែជាក្មេងអភ័ព្វ។ ហើយកូនស្រីរបស់គាត់ម្នាក់នេះ កំព្រាម្តាយតាំងពីនាងមានអាយុ ៣ ឆ្នាំ មកម្លេះ៕
ដោយ៖ លឹម ហុង
