នាយករដ្ឋមន្ត្រីអូស្ត្រាលី Malcolm Turnbull បានប្រកាសនៅថ្ងៃច័ន្ទនេះថា រដ្ឋាភិបាលអូស្ត្រាលីគ្រោងបង្កើតកញ្ចប់ថវិការចំនួន ៣,៨ ពាន់លានដុល្លារអូស្ត្រាលី (៣,១ពាន់លានដុល្លារអាមេរិច) សំរាប់ផ្តល់ជាកម្ចីទៅឲ្យក្រុមហ៊ុនផលិតអាវុធយោធាទាំងអស់ ដែលវាគឺជាផ្នែកមួយសំរាប់ជំរុញឲ្យប្រទេសអូស្ត្រាលី ក្លាយជាប្រទេសមួយក្នុងចំណោមប្រទេសទាំង ១០ដែលនាំចេញអាវុធច្រើនបំផុតក្នុងពិភពលោក។
កាលពីឆ្នាំ ២០១៦ អូស្ត្រាលីបានប្រកាសថា ខ្លួននឹងពង្រឹងវិស័យការពារជាតិដោយគ្រោងចំណាយ ៣០ពាន់លានដុល្លាអូស្ត្រាលី ឲ្យបានមុនឆ្នាំ ២០២១ ដើម្បីទិញ នាវាចំបាំង រថពាសដែក យន្តហោះចំបាំង ដ្រូន និងនាវាមុជទឹកជាច្រើនគ្រឿង ហើយគ្រឿងសព្វាវុធទាំងនេះភាគច្រើន រដ្ឋាភិបាលនឹងធ្វើការទិញពីក្រុមហ៊ុនផលិតអាវុធ ក្នុងប្រទេសតែម្តង។
Malcolm Turnbull ថ្លែងប្រាប់អ្នកសារព៌តមាននៅក្នុងទីក្រុងស៊ីតនីដូច្នេះថា “អូស្ត្រាលីស្ថិតក្នុងចំណោមប្រទេសទាំង ២០ដែលនាំចេញអាវុធច្រើនជាងគេ។ ការបង្កើនថវិការលើវិស័យការពារជាតិ នឹងធ្វើឲ្យពួកយើងមានចំណាត់ថ្នាក់ល្អជាងនេះ។ គោលដៅរបស់គឺចង់ស្ថិតក្នុងចំណោម ១០ប្រទេសដែលនាំអាវុធចេញលក់ច្រើនជាងគេ”។
លោក Christopher Pyne រដ្ឋមន្ត្រីឧស្សាហកម្មការពារជាតិ បានថ្លែងថា អូស្ត្រាលីមានគោលដៅនាំចេញអាវុធលក់ឲ្យអាមេរិច កាណាដា អង់គ្លេស និងញ៉ូវសឺឡែន។
សូមបញ្ជាក់ថា ថវិការសំរាប់ចំណាយលើវិស័យការពារជាតិអូស្ត្រាលីឆ្នាំនេះ គឺ ៣៤,៦ពាន់លានដុល្លារ អូស្ត្រាលី៕ សុភ័ក្ត្រ
