វីដេអូមួយ ដែលទើបត្រូវបានចែករំលែកនៅលើបណ្តាញសង្គមថ្មីៗនេះ បានធ្វើឲ្យយើងទាំងអស់គ្នា បានដឹងពីល្បិចថ្មីមួយទៀតរបស់ចោរដែលធ្វើឡើងជាបក្ខពួក យកទ្រព្យសម្បត្តិអ្នកលក់ដោយគ្មានបង្កការរំខានអ្វីឡើយ។
តាមរយៈវីដេអូកាមេរ៉ាគ្រប់ជ្រុង បានបង្ហាញឲ្យឃើញប្តីប្រពន្ធ១គូ បានឈប់ម៉ូតូចូលទិញទំនិញផ្ទះស្ត្រីអ្នកលក់មួយកន្លែង ដោយស្ត្រីម្នាក់នោះ (ចោរ) បានធ្វើជាទិញឥវ៉ាន់ជាច្រើនដើម្បីជាទុកឱកាសឲ្យបក្ខពួកខ្លួន ងាយស្រួលចូលប្រមូលលុយ។ ជាក់ស្តែងណាស់ បន្ទាប់ពីទិញរួចរាល់ហើយ ស្ត្រីនោះក៏បានដើរទៅកាន់ម៉ូតូប្តីដែលកំពុងរង់ចាំនៅកណ្តាលផ្លូវ ហើយឲ្យស្ត្រីអ្នកលក់លើកអីវ៉ាន់តាមក្រោយ និងធ្វើការគិតលុយនៅលើផ្លូវ។
ពិតជារន្ធត់ចិត្តណាស់ ខណៈកំពុងគិតលុយ សម្រាប់មុខទំនិញយ៉ាងច្រើននោះ ជាហេតុធ្វើឲ្យបុរសម្នាក់ជាបក្ខពួក មានឱកាសល្អ លបចូលទៅប្រមូលលុយក្នុងផ្ទះខ្ទេចតែម្តង ខណៈអ្នកបិទគូទម្នាក់ទៀតបានត្រៀមម៉ូតូនៅលើផ្លូវរួចស្រេច។
បើទោះជាហេតុការណ៍នេះ គេពុំបានបញ្ជាក់ពីទីកន្លែងដែលបានកើតឡើង តែនេះជាល្បិចថ្មីមួយ របស់ពួកចោរធ្វើសកម្មភាពជាក្រុម ដែលអាជីវករលក់ដូរតាមផ្ទះទាំងអស់គួរប្រុងប្រយ័ត្នខ្ពស់ ជាពិសេសការគិតលុយ គឺត្រូវតែធ្វើឡើងនៅក្នុងផ្ទះ ទើបជាការល្អប្រសើរ៕
ដោយ៖ លឹម ហុង
