សារព័ត៌មានថៃ Thai Rath បានចុះផ្សាយកាលពីថ្ងៃទី៩ ខែកក្កដា ឆ្នាំ២០២០ ឲ្យដឹងថា Siriporn Kerdsuchon ដែលជាឈ្មួញទុរេនម្នាក់ និង ជាម្ចាស់ Dao Kaset Pa La-U បានកំពុងពិចារណាស្វែងរកទីតាំងស្តុកថ្មី បន្ទាប់ពីសត្វដំរីឈ្មោលមួយក្បាល ចូលមកអុកឡុក និងវាយបំបែកទ្វារ ដែក និងបានស៊ីទុរេនអស់ជាង ១០ ផ្លែ នៅក្នុងឃ្លាំងរបស់នាង។
អ្នកស្រី Siriporn អាយុ ៤៧ ឆ្នាំ បាននិយាយថា «ខ្ញុំបានចំណាយប្រាក់ចំនួន ១២,០០០ បាត ដើម្បីដំឡើងទ្វារដែកថ្មី កាលពីថ្ងៃទី៧ ខែកក្កដា ប៉ុន្តែ ដំរីនេះបានចូលមក ហើយបានវាយកម្ទេចវាឡើងខ្ទេចតែម្តង»។
មានអ្នកដាំទុរេនជាច្រើនទៀត ក៏កំពុងត្រូវប្រឈមនឹងបញ្ហានេះផងដែរ ប៉ុន្តែ ពួកគេត្រូវទទួលយកវាជាដំណោះស្រាយនៃជីវិត។
អ្នកដាំទុរេនម្នាក់បានឲ្យដឹងផងដែរថា «ខ្ញុំបានរស់នៅទីនេះអស់រយៈពេលជាង ១៥ ឆ្នាំហើយៗ ដូចជាអ្នកដាំទុរេនដទៃទៀតដែរ ខ្ញុំបានឆ្លងកាត់ បទពិសោធន៍ជាច្រើនរួចហើយជាមួយដំរីទាំងនេះ»៕ ដោយ៖ លឹម ហុង
