ក្មេងស្រីអាយុជាង១ឆ្នាំ បានត្រូវរលាកដៃគួរឲ្យអាសូរ ។ ប៉ុន្តែ អ្វីដែលធ្វើឲ្យយើងគ្រប់គ្នាស្លុតរន្ធត់ និងស្ទើរតែទប់កំហឹងពុំបាននោះ គឺនៅពេលម្តាយរបស់ក្មេងស្រីរងគ្រោះបានឆែកមើលកាមេរ៉ាសុវត្ថិភាព រកឃើញថា ស្ត្រីអ្នកបម្រើបានយកដៃកូនរបស់នាងជ្រលក់នឹងទឹកក្តៅ ដែលកំពុងចម្អិនអាហារ។
ហេតុការណ៍នេះ បានកើតឡើងនៅ Block 992B Buang Kok Link ប្រទេសសិង្ហបុរី។
ម្តាយក្មេងស្រីរងគ្រោះឈ្មោះ Liu Meiliang បានផុសនៅលើគណនីហ្វេសប៊ុករបស់នាងឲ្យនាងថា ស្ត្រីអ្នកបម្រើដែលចិត្តដ៏ឃោរឃៅនេះ បាននៅមើលថែកូនស្រី២នាក់របស់នាង។ នៅថ្ងៃកើតហេតុ កូនស្រីរបស់នាងអាយុ ៨ ឆ្នាំ ទូរស័ព្ទប្រាប់ថា កូនស្រីពៅរបស់នាងត្រូវរលាកទឹកធ្ងន់ធ្ងរ។
នាងសរសេររៀបរាប់បន្តថា ប្តីរបស់នាងបានយកកូនស្រីពៅរងគ្រោះ ទៅព្យាបាលនៅគ្លីនិកក្បែរផ្ទះ ប៉ុន្តែ គ្លីនិកបានប្រាប់ឲ្យបញ្ជូនទៅកាន់ពេទ្យធំ។ គ្រូពេទ្យនៅទីនោះ បានប្រាប់ថា របួសនៅលើដៃកូនស្រីរបស់នាង គឺរលាកក្នុងកម្រិតទី២។
បន្ទាប់មក ពួកគេបានសួរទៅកាន់ស្ត្រីអ្នកបម្រើ ប៉ុន្តែ នាងបានប្រាប់ថា វាបានកើតឡើងដោយចៃដន្យ ដោយបានពន្យល់ថា ខណៈនាងកំពុងពក្នុងអំឡុងចម្អិនអាហារ កូនស្រីតូចនេះបានយកដៃទៅលូកចូលក្នុងទឹកក្តៅដោយខ្លួនឯង ហើយនាងពុំអាចរារាំងទាន់ពេលវេលា។ អូខេ នៅពេលនោះ ពួកគេក៏បានជឿសម្តីរបស់ស្ត្រីអ្នកបម្រើរូបនេះ។
ប៉ុន្តែ ដោយមិនអស់ចិត្ត ពួកគេក៏បានសម្រេចចិត្តឆែកមើលកាមេរ៉ា និងបានរកឃើញថា ស្ត្រីអ្នកបម្រើនេះ ពិតជាមានចេតនាចាប់ទាញដៃកូនស្រីតូចរបស់នាង ជ្រលក់នឹងទឹកក្តៅចំនួន ៤ លើក ដែលធ្វើឲ្យនាងស្រែកយំគួរឲ្យអាសូរខ្លាំងបំផុត។
ម្តាយក្មេងស្រីរងគ្រោះ បានរាយការណ៍ពីហេតុការណ៍ដ៏រន្ធត់នេះទៅប៉ូលីស ហើយនៅថ្ងៃបន្ទាប់ ស្ត្រីអ្នកបម្រើអាយុ ៣០ ឆ្នាំ រូបនេះ ក៏ត្រូវបានចាប់ខ្លួន៕
ប្រែសម្រួល៖ លឹម ហុង (ប្រភព៖ singaporeuncensored)
