បាត់ដំបង ៖ បុរសម្នាក់បានយកកាំបិតខ្វាវនិងដំបងឫស្សី វ៉ៃទៅលើប្រពន្ធរងរបួសធ្ងន់ រហូតដល់ស្លាប់ កាលពីថ្ងៃទី២៩ ខែមករា ឆ្នាំ២០១៨ វេលាម៉ោងប្រហែល ១៤ នៅចំណុចអូរតាម៉ុន ក្រុមទី៩ ភូមិគំនរបេង ឃុំសិរីមានជ័យ ស្រុកសំពៅលូន ខេត្តបាត់ដំបង ។ បន្ទាប់ពីកើតហេតុ សមត្ថកិច្ចបានចាប់ខ្លួនជនសង្ស័យ។
សមត្ថកិច្ចនគរបាលស្រុកសំពៅលូន បានឲ្យដឹងថា ជនសង្ស័យឈ្មោះ ហ៊ឺ ញ៉ាញ់ ភេទប្រុស អាយុ៥៨ឆ្នាំ មានទីលំនៅស្នាក់នៅបណ្តោះអាសន្នចំណុចកើតហេតុខាងលើ មុខរបរកម្មករ។ ចំណែកប្រពន្ធ ដែលស្លាប់ ឈ្មោះ ជ្រុន ហ៊ន អាយុ៤២ឆ្នាំ។ ជនសង្ស័យបានយកកាំបិតខ្វាវមានដងឫស្សី វ៉ៃប្រពន្ធ និងបានចាប់អូសទាញឡើងទៅលើផ្ទះ បណ្តាលឲ្យធ្លាក់ពីលើផ្ទះ និង បានបន្តមកកាប់ខ្សែអង្រឹងចងជនរងគ្រោះ។ ក្រោយពេលហេតុកើតរួច ជនរងគ្រោះជាប្រពន្ធដែលមានរបួសធ្ងន់ធ្ងរ ពុំបានទៅមន្ទីរពេទ្យព្យាបាលជំងឺទេ គឺសម្រាកព្យាបាលនៅផ្ទះ លុះដល់ម៉ោងប្រហែល១យប់ ឈានចូលថ្ងៃទី៣០ ខែមករា ឆ្នាំ២០១៨ ជនរងគ្រោះក៏ដាច់ខ្យល់ស្លាប់។
ជនសង្ស័យត្រូវបានកម្លាំងជំនាញ កសាងសំណុំរឿងបញ្ជូនទៅតាមនីតិវិធី ៕ ដោយ៖បញ្ញាស័ក្តិ
