មន្ត្រីប៉ូលិសម្នាក់នៅក្នុង Islington ទីក្រុងឡុងដ៍ ត្រូវបានព្យួរពីការងារ និងម្នាក់ទៀត ត្រូវដកចោល បន្ទាប់ពីវីដេអូដ៏ព្រៃផ្សៃមួយ បានបង្ហាញប៉ូលិសទាំងពីរបានយកជង្គង់សង្កត់កបុរសម្នាក់ ដែលបង្ករលកកំហឹងខ្លាំងក្លាជាថ្មីនៅលើបណ្តាញសង្គម។
តាមរយៈវីដេអូ បានបង្ហោះមន្ត្រីរងការចោទប្រកាន់ទាំងពីរ បានបង្ក្រាបទៅលើបុរសស្បែកខ្មៅម្នាក់អាយុ ៤៥ ឆ្នាំ ដែលគេជឿថាកំពុងកាន់កាំបិតនៅក្នុងដៃ នៅទីសាធារណៈ ត្រូវបានគេមើលឃើញថា ជាទម្រង់ដូចគ្នា (Copy) ទៅនឹងការបង្ក្រាបយ៉ាងសាហាវព្រៃផ្សៃទៅលើបុរសឈ្មោះ George Floyd រហូតដាច់ខ្យល់ស្លាប់ ដែលបានកើតឡើងកាលពី២ខែមុននេះ បង្កឲ្យផ្ទុះកំហឹងទូទាំងពិភពលោក។
នៅក្នុងវីដេអូដដែល គេក៏បានឮបុរសរងគ្រោះ ដែលកំពុងដេកដួលនៅលើដី ក្រោមការគ្រប់គ្រងរបស់ប៉ូលិសទាំងពីរ បានស្រែកឡើងថា «ដកជង្គង់ចេញពីកខ្ញុំទៅៗ!!»។
ទោះយ៉ាងណា នៅទីបំផុត គាត់ត្រូវបានដោះលែងពីជង្គង់ និងក្រោកអង្គុយនិយាយហេតុផលខុសត្រូវ ជាមួយមន្ត្រីម្នាក់ ខណៈមន្ត្រីម្នាក់ទៀតដែលបានយកជង្គង់សង្កត់កគាត់ ត្រូវប្រឈមមុខនឹងអ្នកដំណើរ ដែលចូលមកជួយអន្តរាគមន៍។
សាក្សីដែលបានឃើញហេតុការណ៍នេះផ្ទាល់ បានចាប់ផ្តើមប្រឈមមុខនឹងពួកមន្ត្រីទាំងពីរ ដោយបាននិយាយថា៖ «ខ្ញុំពិតជាមានការព្រួយបារម្ភថា គាត់នឹងត្រូវបានសម្លាប់ ដូចទៅនឹងករណីរបស់ George Floyd អ៊ីចឹង ណាលោក!»។
និយាយទៅកាន់អ្នកសារព័ត៌មានទូរទស្សន៍ BBC សាក្សីទាំងនោះបានបន្ថែមថា៖ «ប្រសិនបើគ្មានហ្វូងមនុស្សបានឃើញ និងថតហេតុការណ៍នេះទេ នោះប៉ូលិសទាំងពីរនឹងអាចធ្វើឲ្យបុរសម្នាក់នេះថប់ដង្ហើម ឬ អាចបាក់កក៏អាចថាបាន»។
យោងតាមស្នងការរងប៉ូលិស លោក Sir Steve House បានឲ្យដឹងថា បច្ចេកទេសនៃការលុតជង្គង់ និងគៀបករបស់នរណាម្នាក់ មិនត្រូវបានបង្រៀននៅក្នុងការបណ្តុះបណ្តាលប៉ូលិសនោះទេ។
ជាលទ្ធផល មន្ត្រីម្នាក់ត្រូវបានព្យួរពីការងារ ហើយមន្ត្រីម្នាក់ទៀតត្រូវបានដកចេញពីកាតព្វកិច្ចប្រតិបត្តិការ ប៉ុន្តែ មិនត្រូវបានផ្អាកនៅពេលនេះទេ ដោយការសម្រេចចិត្តនេះនឹងត្រូវបានពិនិត្យឡើងវិញ៕ ដោយ៖ លឹម ហុង
Absolutely disgusting, my sister is in this video witnessing police brutality and them kneeling on this black man’s neck. He is clearly not a threat and is in cuffs. Please share this video for awareness.#BLM #BlackLivesMatter pic.twitter.com/xLS1h6Ficx
— axax_shockz (@RealAiRavish) July 16, 2020
