ភ្នំពេញ៖ គ្រោះថ្នាក់ចរាចណ៍ គឺជាបញ្ហាដ៏ចម្បងមួយ ដែលកំពុងកើតមានឡើងបណ្តាលឲ្យមនុស្សស្លាប់ និងរបួសធ្ងន់ស្រាលជារៀងរាល់ថ្ងៃ និងកាន់តែកើនឡើងគួរឲ្យកត់សម្គាល់ ដោយគ្រោះថ្នាក់នេះភាគច្រើនបានកើតឡើងនៅពេលយប់ ដោយសារតែការបើកបរលឿនៗមិនប្រយ័ត្ន។
ដោយឡែក កាលពីយប់ថ្ងៃទី២២ ខែកក្កដា ឆ្នាំ២០២០ គ្រោះថ្នាក់ចរាចរណ៍នេះបានកើតឡើងមកនារីស្រស់ស្អាតម្នាក់ ដែលគេដឹងថាជាក្មួយស្រីរបស់លោក ម៉ា ដូណា ត្រូវរថយន្ត១គ្រឿងបើកបុក និងរត់គេច បណ្តាលឲ្យនាងរងរបួសធ្ងន់ធ្ងរដែលគ្រូពេទ្យបញ្ជាក់ឲ្យដឹងថា ប្រេះថ្លើម និងឈាមកកក្នុងថ្លើម។
សូមបញ្ជាក់ថា ក្មួយស្រីលោក ម៉ា ដូណា ដែលមានឈ្មោះ រីយ៉ា ខណៈកំពុងជិះម៉ូតូ ស្រាប់តែរថយន្ត១គ្រឿង បើកបុកយ៉ាងពេញទំហឹង បណ្តាលឲ្យរងរបួសធ្ងន់ធ្ងរ ស្ថិតនៅចំណុចនៅជិតស្តុបសេរីភាព ផ្សារថ្មី។
នេះបើយោងតាមគណនីហ្វេសប៊ុកលោក ម៉ា ដូណា (Madona Cutee) បានបង្ហោះឲ្យបងប្អូនបានដឹង និងក៏ដូចជាសារទៅកាន់រថយន្តបង្កឲ្យចូលខ្លួនមកដោះស្រាយជាបន្ទាន់យ៉ាងដូច្នេះថា៖ «សូមម្ចាស់ឡានដែលបើកបុកយប់មិញ នៅជិតស្តុបសេរីភាព ផ្សារថ្មី បើបានឃើញការបង្ហោះហើយ ជួយមកដោះស្រាយផង នៅកាល់ម៉ែតអគារថ្មីជាន់ទី៣ បន្ទប់ 9315 កុំឲ្យឆែកកាំម៉ារ៉ាឃើញឡានបង្ហោះទាន់សូមឲ្យឆាប់ជាក្មួយ»។
បើតាមការបង្ហោះរបស់លោក ម៉ា ដូណា នៅពេលនេះ ក្មួយស្រីរបស់លោកកំពុងសម្រាកព្យាបាល នៅក្នុងមន្ទីរពេទ្យកាល់ម៉េត ដោយត្រូវធ្វើការវះកាត់ សម្រាប់របួសប្រេះថ្លើម និងឈាមកកក្នុងថើ្លម៕ ដោយ៖ លឹម ហុង