កំពង់ស្ពឺ៖បើទោះជាមានព្រះជន្ម ៨០ ឆ្នាំ ទៅហើយក្តី តែលោកយាយដ៏កម្សត់រស់នៅឯកា គ្មានកូនជាទីពឹងនឹងគេ ពុំលើកដៃសុំទានគេនោះទេ ដោយបានខិតខំតស៊ូដើម្បីបន្តជីវិតទៅមុខទៀត ជាមួយមុខរបរធ្វើកន្ទេល ទួលដើរលក់តាមភូមិជិតខាង ដើម្បីបានប្រាក់គ្រាន់ទិញអង្ករហូបនិងសេសសល់បន្តិចបន្តួចទុកធ្វើបុណ្យទាន សន្សំកុសលកុំឲ្យជាតិក្រោយអភ័ព្វដូចជាតិនេះទៀត។
បើតាមបងប្អូនដែលជាអ្នកប្រើប្រាស់បណ្តាញសង្គមហ្វេសប៊ុក បានចែករំលែកឲ្យដឹងថា «មេត្តាជួយស៊ែរផង គាត់អាយុ ៨០ ឆ្នាំ ទៅហើយ តែគាត់ត្រូវដើរទូលលក់កន្ទេលតាមផ្លូវម្នាក់ឯង។ គាត់គ្មានកូនជាទីពឹងទេ ហេតុនេះគាត់មានតែប្រឹងប្រែងដើម្បីក្រពះ និងសល់លុយកាក់បន្តិចបន្តួចពីការលក់កន្ទេលទុកគ្រាន់ធ្វើបុណ្យទាន។ គាត់នៅភូមិត្រពាំងប្រិយ ឃុំពោធិអង្គ្រង ស្រុកបរសេដ្ឋ ខេត្តកំពងស្ពឺ។ សូមបងប្អូនទាំងអស់គ្នា មេត្តាជួយទិញលោកយាយផង»។
បន្ថែមពីនេះ យើងក៏សូមអំពាវនាវដល់សប្បុរសជនទាំងក្នុង និងក្រៅស្រុក ដែលតែងបង្ហាញនូវទឹកចិត្តសប្បុរសធម៌ ចំពោះជនទីទ័លក្រជាច្រើន មេត្តាជួយឧបត្ថម្ភ ដែលក៏ទុកជាការធ្វើបុណ្យសម្រាប់ដំណើរជីវិតចុងក្រោយរបស់លោកយាយខាងលើផង៕ ដោយ៖ លឹម ហុង