ស្ពានកញ្ចក់វែងជាងគេបំផុត នៅលើពិភពលោក ត្រូវបានបើកឲ្យដំណើរការហើយ នៅក្នុងប្រទេសចិន ដែលស្ពាននេះឆ្លងកាត់ពីលើទន្លេ Lianjiang ក្នុងទីក្រុង Qingyuan ខេត្ត Guangdong ។
ស្ពានកញ្ចក់នេះដែលមានប្រវែង ៥២៦ ម៉ែត្រ បានតភ្ជាប់ផ្នែក២នៃ Huangchuan Three Gorges ដែលជាឈ្មោះបុរាណនៃទន្លេ Lianjian ។ នេះបើយោងតាមកាសែត South China Morning Post ។
វាត្រូវបានចំណាយពេលអស់រយៈពេល ៣ ឆ្នាំ ក្នុងការសាងសង់ ហើយមានតម្លៃ ៣០០ លានយ័ន (ស្មើនឹង ៤៣ លានដុល្លារអាមរិក) ។ ជាមួយគ្នានេះផងដែរ កំណត់ត្រាពិភពលោក Guiness ក៏បានប្រគល់វិញ្ញាបនប័ត្រដល់រដ្ឋាភិបាលក្នុងតំបន់ ក្នុងអំឡុងពេលបើកសម្ភាធកាលពីថ្ងៃទី១៨ ខែកក្កដា ឆ្នាំ២០២០ ។ នេះបើយោងតាម LADbible។
នៅក្នុងវីដេអូបានបង្ហាញឲ្យឃើញថា ស្ពានកញ្ចក់នេះអាចទប់ទល់នឹងរថយន្តតូច២គ្រឿង បើកបរឆ្លងកាត់ ហើយមនុស្សរាប់សិបនាក់មកចូលរួមការបើកបង្ហាញដ៏អស្ចារ្យនេះ។ បើយោងតាមបុគ្គលិកនៃតំបន់នេះ បានបញ្ជាក់ប្រាប់ឲ្យដឹងថា ស្ពាននេះនឹងអាចផ្ទុកភ្ញៀវទេសចររហូត ៥០០ នាក់ នៅក្នុងពេលតែមួយ។ ពួកគេក៏បានឲ្យដឹងទៀតថា ភ្ញៀវទេសចរអាចលោតលេង ឬ អាចប្រើប្រាស់ស្ពាននេះដើម្បីថតបង្ហាញម៉ូដផងដែរនៅលើកញ្ចក់ថ្លា ៩៩,១៥% ត្រូវបានផលិតចេញពីស្រទាប់ដែលមានកម្រាស់ ៤,៥ សង់ទីម៉ែត្រ។
គួរបញ្ជាក់ផងដែរថា ចិនបានបើកសម្ពោធស្ពានកញ្ចក់ប្រហែល ២.៣០០ កន្លែង នៅក្នុងប្រទេស នៅក្នុងរយៈពេលប៉ុន្មានឆ្នាំនេះ។ តែទោះយ៉ាងណា អាជ្ញាធរក៏បានបិទស្ពានកញ្ចក់អស់មួយចំនួនផងដែរ ដោយសារបារម្ភពីបញ្ហាសុវត្ថិភាព៕ ដោយ៖ លឹម ហុង