នៅពេលទៅកាន់ប្រទេសចិន អ្វីដែលល្អបំផុតដែលត្រូវធ្វើ គឺការទទួលទានអាហារនៅតាមចិញ្ចើមផ្លូវ និងកំដរភាពរីករាយជាមួយស្រាបៀរថោកៗរបស់ពួកគេ ។ ជាការពិតណាស់ ស្រាបៀរនៅក្នុងប្រទេសចិន ត្រូវបានគេទទួលស្គាល់ថាមានតម្លៃ «ថោកបំផុត» នៅជុំវិញពិភពលោក ។ ទោះយ៉ាងណា ឥឡូវនេះ យើងដឹងពីមូលហេតុរបស់វាហើយ… ។
អ្នកចូលចិត្តស្រាបៀររាប់ពាន់នាក់ ត្រូវបានដឹងថា ពេញចិត្តនឹងស្រាបៀររបស់ចិន ព្រោះតែតម្លៃរបស់វាថោក ។ ប៉ុន្តែ បន្ទាប់ពីវីដេអូនេះត្រូវបានបែកធ្លាយជាសាធារណៈ, អាជ្ញាធរបានធ្វើការព្រមានដល់សាធារណជន ឲ្យប្រាកដថាអ្វីដែលពួកគេផឹក គឺជា «របស់ពិត» ។
នៅក្នុងវីដេអូនេះ ត្រូវបានគេជឿថា បានថតនៅក្នុងរោងចក្រក្រោមដីមួយ នៅក្នុងទីក្រុង Dongguan, ខេត្ត Guangzhou ។ ក្នុងនោះ កម្មករស្រីៗត្រូវបានឃើញច្រកវេចខ្ចប់ស្រាបៀរប្រភេទ Budweiser «ក្លែងក្លាយ» ដែលប្រហែលត្រូវបានលក់ទៅកាន់អតិថិជនពុំដឹងយ៉ាងច្រើនមកហើយ ។
កម្មករស្រីៗត្រូវបានឃើញយកកំប៉ុង ទៅច្រកស្រាបៀរផលិតហើយនៅក្នុងធុង ទាំងដៃទទេស្អាត (គ្មានអនាម័យ) មុនពេលបញ្ជូនទៅកាន់ម៉ាស៊ីនបិទគ្របជាចុងក្រោយ ។
នៅពេលអាជ្ញាធរក្នុងតំបន់ឆ្មក់ចូលក្នុងរោងចក្រផលិតស្រាបៀរនោះ ពួកគេពិតជាមានការភ្ញាក់ផ្អើលជាខ្លាំង ខណៈរកឃើញបរិមាណស្រាបៀរក្លែងក្លាយត្រូវបានផលិតរួច ។ កេសស្រាបៀរកំប៉ុងក្លែងក្លាយ ដែលបានរកឃើញនៅក្នុងរោងចក្រនោះ មានចំនួនរហូតដល់ ៦០០,០០០ កេស ។
បន្ទាប់ពីត្រូវបានផ្តល់ដំណឹងគួរឲ្យភ្ញាក់ផ្អើលនេះ តំណាងក្រុមហ៊ុន Budweiser បានរាយការណ៍ទៅកាន់កាសែតភាសាចិនមានមូលដ្ឋាននៅហុងកុង Ming Pao ថា ក្រុមហ៊ុនបានរាយការណ៍ពីបញ្ហានេះទៅកាន់ប៉ូលីស និងកំពុងស្វះស្វែងរកសកម្មភាពស្របច្បាប់ ចំពោះហេតុការណ៍នេះ ៕ ចន្ទី
