Wednesday, January 26, 2022

ត្រូវ​ស្ទាវ​កាប់ ៣ ដាវ​សា​ម៉ូ​រ៉ៃ របួសធ្ងន់ ពេល​បើក​ម៉ូតូ​បណ្តើរ​ក្មេងស្រី​២​នាក់

បន្ទាយមានជ័យ ៖ កំពុង​បើក​ម៉ូតូ​បណ្តើរ​ក្មេងស្រី​២​នាក់ ត្រូវ​យុវជន​ស្ទាវ​ម្នាក់​ស្ទុះ​ចេញ​មក​កាប់​៣​ដាវ​សា​ម៉ូ​រ៉ៃ បណ្តាលអោយ​របួស​ធ្ងន់ធ្ងរ ។ ជនសង្ស័យ​អាចជា​គូប្រជែង​ដណ្តើម​ស្នេហ៍​គ្នា ។ ហេតុការណ៍​នោះ​កើតឡើង​កាលពី​ម៉ោង​១០​យប់ ថ្ងៃទី​៣១​ខែ​មករា​ឆ្នាំ​២០១៧ ស្ថិត​នៅ​ចំណុច​ភូមិ​ថ្នល់​ដាច់ ឃុំ​ភ្នំ​ដី ស្រុក​ភ្នំស្រុក ខេត្ត​បន្ទាយមានជ័យ​។​

លោក​វរសេនីយ៍ យ៉​ត សុផល អធិការនគរបាល​ស្រុក​ភ្នំ​ស្រុក​បានឲ្យដឹងថា ៖ ជនរងគ្រោះ ឈ្មោះ​រឿន ស៊ីម៉ាក់ ភេទ​ប្រុស អាយុ​២០​ឆ្នាំ រស់នៅ​ភូមិ​កំពីង​ពួយ ឃុំ​ភ្នំ​ដី ស្រុក​ភ្នំស្រុក ខេត្ត​បន្ទាយមានជ័យ​។ ក្រោយ​ធូរស្បើយ​បន្តិច ជនរងគ្រោះ ប្រាប់​សមត្ថកិច្ច​ថា ៖ មុនពេល​កើតហេតុ ខ្លួន​បាន​បើកបរ​ម៉ូតូ​១​គ្រឿង បណ្តើរ​ក្មេងស្រី​ចំនួន​០២​នាក់ ដែល​បាន​បើក និង​ជិៈ​ម៉ូតូ​១​គ្រឿង​ដែរ​។​

ពេលមកដល់​ផ្លូវបត់​ចូល​ក្នុង​ភូមិ​ថ្នល់​ដាច់ ក៏​ស្រាប់តែ​មាន​យុវជន​មិន​ដឹង​គ្នា​ប៉ុន្មាន​នាក់ ជិៈ​ម៉ូតូ​០១​គ្រឿង មិន​ស្គាល់​អត្តសញ្ញាណ​បានជិៈ​តាម​ពីក្រោយ ហើយ​បាន​ពួយ​កាប់​ទៅ​លើ​ខ្លួន​ដោយ​គ្មាន​មេត្តា បណ្តាលអោយ​របួស​ធ្ងន់ធ្ងរ​ត្រង់​ក្បាល ផ្នែក​ខាងក្រោយ​០១​កន្លែង , របួស​ក្បាល​ផ្នែក​ខាង​មុខ​០២​កន្លែង​។​ ត​មក ខ្លួន​សន្លប់​បាត់ស្មារតី ហើយ​ត្រូវ​គេ​បញ្ជូន​ទៅកាន់ មន្ទីរពេទ្យ​ខេត្ត​មិត្តភាព​កម្ពុជា​-​ជប៉ុន មង្គល​បូរី​។​

លោក​យ៉​ត សុផល និយាយថា ៖ ករណី​ហឹង្សា​ដោយ​ចេតនា​នេះ វា​ទំនងជា​យុវជន​បង្ក​ជា​គូប្រជែង​ដណ្តើម​ស្នេហ៍​ពី​ជនរងគ្រោះ​។ ប៉ុន្តែនគរបាល​បាន​នឹង​កំពុង​ស្រាវជ្រាវ កំណត់​មុខសញ្ញា​នៅ​មិន​ទាន់​សន្និដ្ឋាន​យ៉ាងណា​នៅឡើយ ៕​ ដោយ ៖ បន្ទាយ