ភ្នំពេញ៖ក្រសួង ការបរទេស និងសហប្រតិបត្តិការអន្តរជាតិ នៅថ្ងៃទី៧សីហានេះ បានឲ្យដឹងថា នាព្រឹកថ្ងៃទី០៤ ខែសីហា ឆ្នាំ២០២០ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ បានអនុញ្ញាតឲ្យ ឯកឧត្តម Philippe Kridelka ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្របែលហ្ស៊ិកប្រចាំកម្ពុជា ដែលមាននិវេសដ្ឋាននៅបាងកក ជួបសម្តែងការ គួរសម និងជម្រាបលា តាមទូរស័ព្ទ បន្ទាប់ពីបានបញ្ចប់បេសកកម្មការទូតរបស់ខ្លួន។
ឯកឧត្តមឯកអគ្គរាជទូត បានថ្លែងអំណរគុណចំពោះ ឯកឧត្តមឧបនាយករដ្ឋមន្ត្រី ផ្ទាល់ ក៏ដូចជាក្រសួងការបរទេស និងសហប្រតិបត្តិការអន្តរជាតិ និងស្ថាប័នពាក់ព័ន្ធផ្សេងៗទៀត ដែលបានផ្តល់ការគាំទ្រដល់បេសកកម្មការទូតរបស់ឯកឧត្តម នាពេលកន្លងមក។
ឯកឧត្តមឧបនាយករដ្ឋមន្ត្រី បានថ្លែងអំណរគុណចំពោះបែលហ្សិក ដែលបានរួមចំណែកក្នុងការអភិវឌ្ឍ នៅកម្ពុជា នាពេលកន្លងមក ក្នុងវិស័យមួយចំនួនដូចជា អប់រំ សុខាភិបាល និងការបោសសំអាតមីន ក៏ដូចជា ការរួមចំណែកក្នុងដំណើរការសាលាក្តីខ្មែរក្រហមផងដែរ។ ទន្ទឹមនេះ ឯកឧត្តមឧបនាយករដ្ឋមន្ត្រី ក៏បានថ្លែង អរគុណផងដែរចំពោះបែលហ្ស៊ិក ដែលចាត់ទុកកម្ពុជាជាប្រទេសមួយ ក្នុងចំណោមប្រទេសអាទិភាពទាំង ៣០ សម្រាប់ទទួលជំនួយអភិវឌ្ឍន៍។
ពាក់ព័ន្ធនឹងការងារកិច្ចសហប្រតិបត្តិការទ្វេភាគី និងពហុភា គឺ ឯកឧត្តមឯកអគ្គរាជទូតបាន លើកឡើងថា បែលហ្សិកមានបំណងជួយអភិវឌ្ឍន៍តំបន់ប្រសាទព្រះវិហារ និងបានចាត់ទុកប្រាសាទព្រះវិហារ ជាសម្បត្តិទេសចរណ៍វប្បធម៌មានសារៈសំខាន់សម្រាប់កម្ពុជា និងមានសក្តានុពលក្នុងការទាក់ទាញភ្ញៀវទេសចរ មិនចាញ់ប្រាសាទអង្គរវត្តឡើយ។
ដោយកម្ពុជា និងបែលហ្សិក ទើបបានចុះហត្ថលេខាលើអនុស្សរណៈយោគយល់គ្នា ស្តីពីការបង្កើត កិច្ចពិគ្រោះយោបល់ទ្វេភាគីរវាងក្រសួងការបរទេសនៃប្រទេសទាំងពីរ ឯកឧត្តមឧបនាយករដ្ឋមន្ត្រី បាន ជំរុញឲ្យមានការរៀបចំកិច្ចពិគ្រោះយោបល់ទ្វេភាគីលើកទី១ នៅភ្នំពេញ ឬព្រុចសែល បន្ទាប់ពីវិបត្តិកូវីដ-១៩ មានការថមថយទៅវិញ ដើម្បីពិភាក្សាលើកិច្ចសហប្រតិបត្តិការផ្សេងៗ រួមទាំងគម្រោងខាងលើផងដែរ។
ភាគីបែលហ្ស៊ិក ក៏បានស្នើកម្ពុជាពិចារណាឲ្យមានការចរចាកិច្ចព្រមព្រៀងស្តីពីការផ្លាស់ប្តូរទណ្ឌិត រវាង កម្ពុជា និងបែកហ្សុកផងដែរ។
ឯកឧត្តមឯកអគ្គរាជទូត បានជម្រាបជូនអំពីចំណាប់អារម្មណ៍ របស់ សហភាពអឺរ៉ុប ចំពោះកិច្ច សហប្រតិបត្តិការជាមួយ នឹងគណៈកម្មការទន្លេមេគង្គ។ ជាការឆ្លើយតប ឯកឧត្តមឧបនាយករដ្ឋមន្ត្រី បានគូស បញ្ជាក់ពីសារៈសំខាន់នៃកិច្ចសហប្រតិបត្តិការអភិវឌ្ឍតំបន់ទន្លេមេគង្គ ដែល ជា ទន្លេធំមួយក្នុងចំណោមទន្លេធំៗលើពិភពលោក។ បច្ចុប្បន្ននេះ មានយន្តការសហប្រតិបត្តិការ ប្រទេសមួយចំនួនដូចជា ចិន ជប៉ុន សាធារណរដ្ឋកូរ៉េ សហរដ្ឋអាមេរិក និងឥណ្ឌា។ ជាច្រើនជាមួយបណ្តាក្នុងក្របខ័ណ្ឌអង្គការសហប្រជាជាតិ ភាគីទាំងពីរក៏បានពិភាក្សាគ្នាផងដែរ អំពីការចូលរួមរបស់កម្ពុជា ក្នុងការថែរក្សាសន្តិភាពនៅក្នុងបណ្តាប្រទេស ដូចជា លីបង់ ម៉ាលី អាហ្វ្រិកកណ្តាល ស៊ូដង់ និងស៊ូដង់ ខាងត្បូង។ ទន្ទឹមនឹងនេះ ឯកឧត្តមឧបនាយករដ្ឋមន្ត្រី ក៏បានគូសបញ្ជាក់ផងដែរអំពីសារៈសំខាន់នៃពហុភាគី និយម។ ជាទីបញ្ចប់ ឯកឧត្តមឧបនាយករដ្ឋមន្ត្រី ក៏បានអបអរសាទរ និងជូនពរឯកឧត្តមឯកអគ្គរាជទូតឲ្យទទួលបានជោគជ័យក្នុងភារកិច្ចថ្មី និងត្រៀមផ្តល់កិច្ចសហការល្អដល់ឯកអគ្គរាជទូតថ្មី ដែលនឹងចូលកាន់តំណែងក្នុងពេលឆាប់ៗខាងមុខនេះ៕ ដោយ៖បញ្ញាស័ក្តិ
