ភ្នំពេញ ៖ ស្ត្រីម្នាក់ត្រូវបានម្ចាស់ចម្ការសាវម៉ៅ២នាក់ប្តីប្រពន្ធ បានធ្វើការឃាត់ខ្លួន និងដកសោម៉ូតូ បន្ទាប់ពីតាមទាន់ស្តែងៗ លួចចូលបេះស្លឹកសាវម៉ៅរបស់ពួកគាត់អស់មួយដៃ ដែលពួកគាត់បានចោទប្រកាន់ថា សឹងខ្ទេចអស់មួយដើមទៅហើយ។
តាមវីដេអូឃ្លីបមួយដែលត្រូវបានគេបង្ហោះចែកចាយពាសពេញបណ្តាញសង្គម បានបង្ហាញសកម្មភាពម្ចាស់ចម្ការ២នាក់ប្តីប្រពន្ធនោះ បន្ទាប់ពីដកសោរម៉ូតូ បានបញ្ជាឲ្យស្ត្រីរូបនោះដែលពោរពេញទៅដោយទឹកមុខស្រពាប់ស្រពោន និងកូនស្រីតូៗ២នាក់ ចុះចេញពីម៉ូតូ យកស្លឹកសាវម៉ៅដែលបានកាត់អស់១ដៃ យកទៅដាក់នៅកន្លែងដើមវិញ។ ខណៈពេលនោះផងដែរ ស្ត្រីរូបនោះបានសារភាពថា គាត់ទើបតែចូលមកកាច់យកស្លឹកសាវម៉ៅនេះជាលើកទី១ប៉ុណ្ណោះ ។ គាត់បានសម្រេចចិត្តលួចកាច់ស្លឹកសាវម៉ៅ១ដៃបែបនេះ គឺដើម្បីយកទៅដាក់តាំងអមជាមួយផ្លែសាវម៉ៅរបស់គាត់ ដែលទិញគេពីស្រែអំបិល (អត់មានស្លឹក) ដើម្បីឲ្យទៅឃើញស្រស់ប៉ុណ្ណោះ។
សកម្មភាពរបស់ប្តីប្រពន្ធជាម្ចាស់ចម្ការ បានធ្វើបែបនេះគឺជាការត្រឹមត្រូវហើយ ដើម្បីព្រមានដល់អ្នកដទៃ កុំឲ្យធ្វើបែបនេះទៀត។ ប៉ុន្តែ ទោះយ៉ាងណា សម្រាប់ចំណុចមួយដែលហាក់ដូចជាជ្រុលពេកហើយនៃវីដេអូនេះ មានបងប្អូនជាច្រើននៅក្នុងបណ្តាញសង្គម បានបញ្ចេញមតិហួសចិត្តថា គ្រាន់តែស្លឹកសាវម៉ៅមួយដៃសោះ បានដកសោម៉ូតូ ហើយសុទ្ធតែឲ្យគ្នាស្បថងាប់ចោលកូនទៀត ពិតជាមានចិត្តចង្អៀតចង្អល់ខ្លាំងពេកហើយ ព្រោះគ្រាន់តែកាច់ស្លឹក១ដៃប៉ុណ្ណោះ កុំឲ្យតែកាច់ដើម…៕ ដោយ៖ លឹម ហុង
