មែនស៊ីធី បានទៅវគ្គ៨ក្រុមចុងក្រោយក្នុងពានរង្វាន់ យូហ្វាឆែមពានស៍លីគ បន្ទាប់ពីទទួលជ័យជម្នះលើក្រុមស្តេចស រៀល ម៉ាឌ្រីដ សរុបលទ្ធផលទាំងពីរជើង ៤-២។ កាលពីនៅរាជធានី ម៉ាឌ្រីដ ប្រទេសអេស្ប៉ាញ ស៊ីធី បានយកឈ្នះម្តងរួចមកហើយក្នុងលទ្ធផល ២ទល់នឹង១ និងលើកទីពីរនេះ ស៊ីធី នៅតែឈ្នះ រៀល ដដែលក្នុងផ្ទះខ្លួនឯងនាកីឡដ្ឋាន អ៊ីធីហេត ទីក្រុង មែនឆេសស្ទើរ ក្នុងលទ្ធផល ២-១ ដូចគ្នាទៅនឹងជើងទីមួយដែរ ដូច្នេះហើយ ស៊ីធី នឹងលេងវគ្គ៨ក្រុមចុងបន្តទៀតដោយនឹងត្រូវប៉ះ លីយ៉ុង។
សូមបញ្ជាក់ផងដែរថាទាំង២គ្រាប់របស់ មែនស៊ីធី គឺជាកាដូបានមកការបង្កកំហុសដ៏ធ្ងន់ធ្ងររបស់ខ្សែការពារសញ្ជាតិបារាំង រ៉ាហ្វ៉ាអ៊ែល វ៉ារ៉ាណេ របស់ក្រុម រៀល ម៉ាឌ្រីដ គ្រាប់ទាំង២ខាងលើនេះកើតឡើងនៅនាទីទី ៩ ដែលស៊ុតចូលដោយ រ៉ាហីម ស្ទើលីងនិងនៅនាទីទី៦៨ស៊ុតចូលដោយ ហ្កាប្រ៊ៀល យរស៊ូស ចំណែក រៀល ស៊ុតមួយគ្រាប់តដៃវិញបានដែរ ដោយការតែតក្បាលបញ្ចូលទីយ៉ាងល្អ ពីសំណាក់កីឡាករសញ្ជាតិបារាំង ការីម ប៊េនហ្សេម៉ា នៅនាទីទី២៨៕ ដោយ៖ វិច្ឆិកា
