ស្ត្រីជាម្តាយជនជាតិចិនម្នាក់ បានកំពុងបង្ករលកកំហឹងយ៉ាងខ្លាំងក្លា ពីសំណាក់អ្នកប្រើប្រាស់បណ្តាញសង្គម បន្ទាប់វីដេអូឃ្លីបមួយត្រូវបានគេចែករំលែកបង្ហាញស្ត្រីរូបនេះ បានចងដៃជើងកូនប្រុសរបស់ខ្លួន រួចលើកដាក់ម៉ូតូ ដើម្បីជាការដាក់ទណ្ឌកម្ម។
ទោះយ៉ាងណា ស្ត្រីជាម្តាយរូបនេះ ត្រូវបានប៉ូលិសធ្វើការឃាត់ខ្លួន ខណៈកំពុងជិះម៉ូតូដឹកកូនប្រុសដែលដៃជើងកំពុងជាប់ចំណងខ្សែ និងស្រែកយំដង្ហោយឲ្យគេឯងជួយគួរឲ្យអាសូរបំផុត។
ពេលប៉ូលិសសួរនាំមូលហេតុ ស្ត្រីរូបនេះពុំបានប្រាប់នោះឡើយ តែបានស្រែកខ្លាំងៗដាក់ប៉ូលិសកុំចេះដឹងរឿងគ្រួសាររបស់នាង និងសូម្បីដេញប៉ូលិសឲ្យចាកចេញពីផ្លូវម៉ូតូរបស់ខ្លួនទៀតផង។
តែយ៉ាងណា ស្ថិតក្នុងស្ថានភាពដ៏គួរឲ្យអាសូរបែបនេះ ប៉ូលិសពុំអាចអនុញ្ញាតឲ្យស្ត្រីរូបនេះបន្តដំណើរបានឡើយ ហើយទីបំផុត ពួកគេក៏បានជួយសង្គ្រោះក្មេងប្រុសរងគ្រោះ។ បន្ទាប់មក ម្តាយ និងកូនប្រុសនោះ ក៏ត្រូវបានយកទៅប៉ុស្តិ៍ ហើយប៉ូលិសធ្វើការណែនាំ អប់រំស្ត្រីជាម្តាយ កុំឲ្យធ្វើរឿងឃោរឃៅបែបនេះទៀត ប្រសិនបើកើតឡើងជាលើកទី២ នឹងត្រូវប្រឈមនឹងផ្លូវច្បាប់។
ជាមួយគ្នានេះផងដែរ អ្នកប្រើប្រាស់បណ្តាញសង្គម ដែលពោរពេញដោយកំហឹងបានលើកឡើងធ្ងន់ៗថា៖ «សូមឲ្យប៉ូលិសចាប់ស្ត្រីនេះដាក់គុកអស់មួយជីវិតទៅ ព្រោះថាស្ត្រីរូបនេះគឺជាម្តាយម្នាក់ដែលមានចិត្តសាហាវណាស់ បង្កើតគេមកហើយ តែបែរជាប្រើហិង្សាដាក់ទណ្ឌកម្មកូនបែបនេះ ហេតុអ្វីមិនប្រដែប្រដៅកូននៅក្នុងវិធីដ៏ល្អ?»៕ ដោយ៖ លឹម ហុង