ថ្មីៗនេះ រឿងរ៉ាវមួយបានកំពុងក្លាយជាប្រធានបទក្តៅគគុក នៅលើបណ្តាញទំនាក់ទំនងសង្គម ដោយលោកឧត្ដមសេនីយ៍ទោ អ៊ុក កុសល ស្នងការនគរបាលខេត្ដកំពង់ធំ ត្រូវបានមន្ដ្រីនគរបាលនារីដែលជាកូនចៅ បានរួមគ្នាដាក់ពាក្យបណ្ដឹងប្ដឹងទៅកាន់សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រី នៃក្រសួងមហាផ្ទៃ ស្ដីពីបទបៀតបៀនកេរ្ដិ៍ភេទយ៉ាងធ្ងន់ធ្ងរ។
នេះបើយោងតាមរយៈគេហទំព័រហ្វេសប៊ុកលោក ផែង វណ្ណៈ បានលើកឡើងឱ្យដឹងថា៖ «ត្រីឆ្ដោស៊ីកូនឯង? លោកឧត្ដមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ ដែលទើបតែទទួលបានការព្រមានពីសម្ដេចក្រឡាហោម ស ខេង កាលពីចុងខែមីនា ឆ្នាំ២០២០ ដោយសារតែខ្វះការយកចិត្តទុកដាក់គ្រប់គ្រង និងដឹកនាំ ឥឡូវនេះត្រូវបានមន្ត្រីនគរបាលជានារីៗនាំគ្នាផ្ដិតមេដៃ ប្ដឹងមកសម្ដេចក្រឡាហោម ស ខេង ជាថ្មីម្ដងទៀតពីបទបៀតបៀនកេរ្តិ៍ភេទធ្ងន់ធ្ងរ។ តាមរយៈលិខិតពីរទំព័រចុះថ្ងៃទី៣០ ខែកក្កដា ឆ្នាំ២០២០ ដែលមានស្នាមមេដៃមន្ត្រីនគរបាលជានារីៗ បែកធ្លាយដល់អ្នកសារព័ត៌មាន បានរៀបរាប់ថា លោកឧត្ដមសេនីយ៍ទោ អ៊ុក កុសល បានប្រើអំណាចជាមេបៀតបៀនកេរ្តិ៍ខ្មាសចំពោះពួកនាងដែលពួកនាងមិនអាចអត់ទ្រាំបាន។ លោកឧត្ដមសេនីយ៍ទោ អ៊ុក កុសល មិនអាចសុំការទំនាក់ទំនងបានទេដោយសារតែទូរស័ព្ទចូលគ្មានអ្នកលើក»៕ ដោយ៖ លឹម ហុង
