ក្លឹបបាល់ទាត់ FC BARCELONA មានឈ្មោះពេញគឺ Futbol Club Barcelona ជាក្លឹបបាល់ទាត់អាជីពរបស់ប្រទេស អេស្ប៉ាញ ដែលមានមូលដ្ឋាន នៅទីក្រុង បារសេឡូណា ស្ថិតនៅតំបន់ កាតាឡូញ៉ា ប្រទេសអេស្ប៉ាញ។ បង្កើតឡើងដំបូងនៅថ្ងៃទី២៩ វិច្ឆិកា ឆ្នាំ ១៨៩៩ រយៈពេល ១២០ឆ្នាំកន្លងមកហើយ។ មានកីឡដ្ឋានផ្ទាល់ខ្លួនឈ្មោះថា ខាំនូ (Camp Nou) សមត្ថភាពផ្ទុកទស្សនិកជនបាន ៩៩៣៥៤នាក់ ប្រធានក្លឹប លោក ចូសិប ម៉ារីយ៉ា បារតូម៉ូ (Josep Maria Bartomeu) គ្រូបង្វឹកលោក គីកេ សេតីអង់ (Quique Setien) ។
ដោយត្រូវបានបង្កើតឡើងក្នុងឆ្នាំ ១៨៩៩ របស់ក្រុមវិស្វករវ័យក្មេងចម្រុះជាតិសាសន៍មាន ស្វីស អង់គ្លេស អេស្ប៉ាញ និងក្រុមកីឡាករបាល់ទាត់ ដែលដឹកនាំដោយ ជួន ហ្កាំពើ (Joan Hamper) ក្លឹបនេះបានក្លាយនិម្មិតសញ្ញាដែលតំណាងឲ្យវប្បធម៌នៃជនជាតិ កាតាឡាន់ និង ពួក កាតាឡាន់ និយម ដូចដែលមានក្នុងបាវចនាថា”មិនមែនត្រឹមតែជាក្លឹបមួយនោះទេ” (“Més que un club”) ឬជាភាសាអង់គ្លេស(“More than a club”) ហើយក្លឹបនេះបច្ចុប្បន្នមានតម្លៃជាក្លឹបកីឡាថ្ងៃបំផុតទី៤នៅក្នុងពិភពលោក ដែលគិតជាសាច់ប្រាក់ប្រមាណជា ៤,០៦ ពាន់លានដុល្លារ និងជាក្លឹបមានជាងគេបំផុតគិតលើលក្ខខណ្ឌនៃប្រាក់ចំណេញប្រចាំឆ្នាំ ៨៤០,៨ លានយូរ៉ូ។ បទភ្លេងសម្រាប់គោរពទង់ក្លឹបមានចំណងជើងជាភាសា អេស្ប៉ាញថា កង់ទ៍ឌែលបារសា (Cant del Barça) ដែលនិពន្ធដោយលោក ហ្សូម៉េ ពីកាសនិងលោក ចូសិប ម៉ារីយ៉ា អេស្ពីណា។
តាមកំណត់ត្រាដែលបានចារទុកក្នុងក្លឹបបានឥដឹងថា បារសេឡូណា ឈ្នះពានសំខាន់ៗក្នុងស្រុកចំនួន៧៤ ដោយក្នុងនោះ ឡាលីហ្កា២៦ កូប៉ាឌែលរ៉េយ៍៣០ ស៊ុពើកូប៉ាដឺអេស្ប៉ញ៉ា១៣ កូប៉ា អេវ៉ា ឌូអាតេ៣និង កូប៉ា ដឺឡា លីហ្កា២។ នៅក្នុងលក្ខណៈអន្តរជាតិពួកគេឈ្នះពាន ទ្វីបអឺរុបនិងទូទាំងពិភពលោកចំនួន២០ ក្នុងនោះមាន ឆែមពានស៍លីគ៥ យូហ្វាខាប់វីននើខាប់៤ យូហ្វាស៊ុពើខាប់៥ អ៊ីនធើ-ស៊ីធី ហ្វែរខាប់៣ និង FIFA CLUB WORLD CUP ៣។ បារសេឡូណា ត្រូវបានគេចាត់ដាក់ចំណាត់ថ្នាក់ទីមួយ នៅក្នុងសហព័ន្ធស្ថិតិនិងប្រវត្តិសាស្ត្របាល់ទាត់អន្តរជាតិ សម្រាប់ឆ្នាំ ១៩៩៧ ២០០៩ ២០១១ ២០១២ និងឆ្នាំ២០១៥។ បច្ចុប្បន្នក្លឹបនេះកំពុងកាន់កាប់ចំណាត់ថ្នាក់ទី៣ ក្នុងតារាងចំណាត់ថ្នាក់របស់ យូហ្វា។ គូប្រជែងតាំងពីបរមបុរាណរបស់ បារសេឡូណា គឺ រៀលម៉ាឌ្រីដ ហើយនៅពេលដែលពួកគេប៉ះគ្នាក្នងលីគត្រូវបានគេឲឈ្មោះថា អ៊ែលក្លាស៊ីកូ (El Clásico)។
បារសេឡូណា គឺជាក្លឹបមួយស្ថិតក្នុងចំណោមក្លឹបដែលមានគេគាំទ្រច្រើនបំផុតក្នុងលោក ហើយក៏ជាក្លឹបដែលគេតាមដានច្រើនបំផុតលើបណ្តាញផ្សព្វផ្សាយពត័មាន។ កីឡាករ បារសា ច្រើនណាស់ដែលធ្លាប់ទទួលបានពាន បាឡុងដ័រ (Ballin d’Or) រហូតដល់១២នាក់ ដែលរួមមាន ចូហាន់ គ្រុយ និងព្រមទាំងកីឡាករមួយចំនួន ដែលឈ្នះពានរង្វាន់កីឡាករល្អបំផុតប្រចាំឆ្នាំ របស់ពិភពលោក៧ដង ដោយអ្នកឈ្នះរួមមាន រ៉ូណាល់ដូ រ៉ូម៉ារីយ៉ូ រ៉ូណាល់ឌីញ៉ូនិង រីវ៉ាល់ដូ។ ក្នុងឆ្នាំ២០១០ កីឡាករ៣នាក់ដែលចេញមកពីថ្នាលយុវជនរបស់ក្លឹប មាន លីយ៉ូនែល ម៉េស៊ី អង់ដ្រេ អ៊ីនីស្តា និង ហ្សាវី ត្រូវបានគេជ្រើសរើសជាកីឡាករ៣នាក់ល្អបំផុត របស់ពិភពលោកក្នុងពាន បាឡុងដ័រ។
អ្វីដែលល្បីរន្ទឺជាប្រវត្តិសាស្ត្រនោះ គឺក្រោមការគ្រប់គ្រងរបស់លោក ប៉េប ហ្គាដីយ៉ូឡា ក្នុងរយៈពេលត្រឹម៤ឆ្នាំ ក្លឹបឈ្នះពានសំខាន់ៗចំនួន១៤ និងត្រូវបានគេចាត់ទុកជាក្រុមដែលអស្ចារ្យបំផុតគ្រប់សម័យកាល៕
ប្រភព៖វីគីភីឌា
ដោយ ៖វិច្ឆិកា
