Kingsley Conan បានតែតបញ្ចូលទីយ៉ាងស្អាតនៅនាទី៥៩ ដែលបានមកពីការបញ្ជូនបាល់ពីស្លាបខាងស្តាំដោយខ្សែការពារ Josua Kimmich។ Coman បានសំពងអតីតក្លឹបរបស់ខ្លួន PSG ហើយវាក៏ជាលទ្ធផលដែលបានជួយឲ្យក្លឹប ផ្កាយក្រហម Bayern Munich លើកពានទ្វីបអឺរ៉ុបទៀតផង។
វាជាជ័យជំនះលើកទី៦ហើយដែលក្លឹបមានមូលដ្ឋាននៅទីក្រុង Munich មួយនេះសម្រេចបានក្នុងវគ្គផ្តាច់ព្រ័ត្រ European Cupឬ Champions League។ Bayern ជាក្លឹបតែមួយគត់ដែលអាចលើកពានដោយគ្មានចាញ់សូម្បីតែម្តងក្នុងចំណោម១១ប្រកួតនារដូវកាល ២០១៩-២០នេះ។
អ្នកចាត់ការ Hans-Dieter Flick របស់ក្រុម Bayern តាមពិតទៅគ្រាន់តែជាអ្នកចាត់ការបណ្តោះអាសន្នប៉ុណ្ណោះក្រោយការបណ្តេញលោក Niko Kovac ចេញពីតំណែងកាលដើមរដូវកាល២០១៩-២០ ប៉ុន្តែអ្វីដែលកាន់តែអស្ចារ្យបំផុតនោះគឺគាត់បាននាំ Bayern លើកពានចំនួនបីហើយ Bundesliga DFB Pokal និង យប់មិញនេះ Champions League ហើយរឿងមួយទៀតលោក Flick បានចូលរួមក្នុងចំណោមអ្នកចាត់ការវ័យចំណាស់បំផុតទីបួនដែលបានលើកពាន Champions League ក្នុងវ័យ៥៥ឆ្នាំ។
សូមបញ្ជាក់ថា ការប្រកួតវគ្គផ្តាច់ព្រ័ត្រនេះបានធ្វើឡើងនាទីក្រុង Lisbon ប្រទេស ព័រទុយហ្គាល់ ក្នុងកីឡដ្ឋាន Estadio da Luz របស់ក្លឹប Benfica ៕ ដោយ ៖វិច្ឆិកា
