ភ្នំពេញ៖ ថ្មីៗនេះ មានរឿងដ៏គួរឲ្យហួសចិត្តមួយ ក្រោយពីបានដឹងថា ក្រុមកាសែតអនឡាញមួយ បានទៅគោះលុយសឹងរាល់ពីហាងមួយ W Ktv នៅចំហៀង ម៉ុងឌីយ៉ាល់។ ហើយបើតាមសាច់ញាតិហាងខាងលើ បានប្រាប់ឲ្យដឹងថា ក្រុមនោះជាអ្នកកាសែតអនឡាញ មានឈ្មោះថា «កបិលមហាព្រហ្ម»។
ទាក់ទងនឹងរឿងនេះ បើតាមលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានបង្ហោះកាលពីព្រឹកថ្ងៃទី២៩ ខែសីហា ដោយលោកបានរៀបរាប់ឲ្យបងប្អូនមហាជនជ្រាបថា៖ មានមនុស្សបានសុំប្តឹង ចំពោះក្រុមព័ត៌មានonline មួយបានមកអុកឡុក កោសរូស ហាងបងប្អូនខ្លួនគឺឈ្មោះ W Ktv ដែលមានទីតាំងនៅចំហៀង ម៉ុងឌីយ៉ាល់។ Page នោះ មានឈ្មោះកបិលមហាព្រហ្ម។
សាច់ញាតិខាងលើរៀបរាប់បញ្ជាក់លោក ខៀវ កាញារីទ្ធ ឲ្យដឹងថា៖ «វាមកឡាំប៉ា រាល់អាទិត្យឲ្យលុយវារាល់អាទិត្យ ។ ពេលនេះ ទ្រាំលែងបានហើយ សូមលោកពូ ជួយដោះស្រាយផង កុំឲ្យខូចដល់អ្នកព័ត៌មានល្អៗអី»។
ទាក់ទងនឹងករណីខាងលើនេះ លោករដ្ឋមន្ត្រីក្រសួងព័ត៌មានក៏បានបញ្ជាក់ថា នេះជាបណ្តឹងដែលលោកទទួលបានទាំងព្រឹក ហើយលោកក៏បានសម្តែងការទាំងហួសចិត្តថា៖ «តើអ្នកដែលយកឈ្មោះកាសែត ទៅរកស៊ីរបៀបនេះចេះខ្មាសអៀនខ្លះទេ?»៕ ដោយ៖ លឹម ហុង
