ភ្នំពេញ ៖ កាលពីដើមខែសីហា ឆ្នាំ២០២០ កន្លងទៅនេះ មានរឿងដ៏គួរឲ្យអាណិតខ្លោចចិត្តបំផុតមួយ ដោយទារិកាម្នាក់ត្រូវបានកម្មករប្រមូលសំរាម បានប្រទះឃើញនៅលើគំនរសំរាម ស្ថិតនៅជាប់នឹងបង្គោលភ្លើងមួយកន្លែង ជិតមជ្ឈមណ្ឌលម៉ូឌែន២ ផ្លូវជាតិលេខ២ សង្កាត់ចាក់អង្រែក្រោម ដោយពុំគេពុំដឹងថា ឪពុកម្តាយចិត្តអប្រិយរូបណាយកគ្នាមកបោះចោលបែបនេះតាំងពេលណានោះទេ។
ទោះយ៉ាងណា ទារិកានេះពិតជាជីវិតថ្លៃណាស់ ដែលនៅមានជីវិត ហើយត្រូវបានប្តីប្រពន្ធចិត្តធម៌មួយដែលជាអ្នករស់នៅក្បែរនោះ សម្រេចចិត្តយកទៅចិញ្ចឹមចាត់ទុកដូចពៅបង្កើតរបស់ពួកគាត់អ៊ីចឹង ហើយពួកគាត់ពិតជារំភើបត្រេកអរ លាយឡំនឹងទឹកភ្នែកដ៏រំជួលចិត្តបំផុត ព្រោះតែអាណិតខ្លាំងពេក។
យ៉ាងណាមិញ ក្រោយពីបានឃើញបែបនេះ ឃើញថាមានបងប្អូនសប្បុរសជាច្រើន ដែលសម្តែងនូវក្តីអាណិតអាសូរ ក្នុងនោះក៏មានអ្នកនាង ឱក សុគន្ធកញ្ញា និងស្វាមី ចុះទៅជួបទារិកានោះដោយផ្ទាល់ នៅផ្ទះឪពុកម្តាយចិញ្ចឹម និងព្រមទាំងបានជូនជាថវិកាមួយចំនួន និងសម្ភារៈប្រើប្រាស់សម្រាប់ទារិកា ទៅដល់ពួកគាត់ ដើម្បីជួយសម្រាលនៅក្នុងការចំណាយបានខ្លះ នៅក្នុងការមើលថែចិញ្ចឹមបីបាច់ទារិកាដ៏អភព្វម្នាក់នេះ។
ទោះជាយ៉ាងណា ទារិកាដ៏មានបុណ្យម្នាក់នេះ ឃើញថាបានប្រែសាច់ឈាម និងមានមុខមាត់ស្រស់ថ្លាផូផង់គួរឲ្យស្រឡាញ់ខ្លាំងណាស់ បន្ទាប់ពីម្តាយចិញ្ចឹមចិត្តធម៌បានរើសមកពីក្នុងគំនរសំរាម ដែលគិតមកទល់ពេលនេះមានអាយុ១ខែហើយ។
ជាមួយគ្នានេះផងដែរ តាមរយៈទំព័រហ្វេសប៊ុក PoPo BeautyPlus DW បានបង្ហោះវីដេអូ រូបភាពជាច្រើនសន្លឹកបង្ហាញពីទិដ្ឋភាពលោកជំទាវ ប៉ុល មុន្នីរ័ត្ន បានមកជួបទារិកាជាលើកទី២ និងភ្ជាប់សាររៀបរាប់ដ៏គួរឲ្យរំជួលចិត្តថា៖ «ថ្ងៃដែលក្មួយស្រីត្រូវគេ យកមកបោះបង់ចោលនៅគំនរសំរាម ម៉ាក់មីងបាន មកមើលក្មួយម្ដងហើយ ពេលនេះ ម៉ាក់មីងធ្វើតាមការសន្យាណា ម៉ាក់មីងមកលេងក្មួយស្រី ក្នុងថ្ងៃនេះកក់ខែបានមួយខែ ហើយម៉ាក់មីងបានយករទេះរួមទាំងខោ ទឹកនោម ទឹកដោះគោ និងថវិកាឱ្យម៉ាក់ៗក្មួយទៀត ម៉ាក់មីងពិតជាអាណិតក្មួយណាស់ ដែលត្រូវម្ដាយចិត្តអប្រិយយកមកបោះចោលនៅគំនរសំរាមបែបនេះ តែដោយជីវិតក្មួយថ្លៃ នឹងសំណាង ដែលមានបងស្រីបានឃើញនិងដឹងទាន់ពេលវេលា ក៏បានជួយជីវិតក្មួយមកពីគំនរសំរាមទាន់ពេល ដូចនេះ ម៉ាក់មីងពិតជាអាណិតស្រឡាញ់ក្មួយណាស់ ម៉ាក់មីងសូមជូនពរអោយក្មួយ មានតែសុខភាពល្អ សំណាងល្អ និងជួបតែរឿងល្អក្នុងជីវិតរហូតទៅណា អរគុណបងស្រីនិងប្អូនប្រុសដែលជួយជីវិតក្មួយផងណា»។
ក្នុងនោះផងដែរ គណនីហ្វេសប៊ុកឈ្មោះ ពូ ឈីវ ក៏បានបង្ហោះសាររំភើបចិត្តយ៉ាងដូច្នេះថា៖ «អូនបាន១ខែហើយ អ៊ំពូមីងយាយតាអើយ ថ្ងៃនេះអូនមកវត្ត» ៕ ដោយ៖ លឹម ហុង
