ខេត្តព្រះសីហនុ៖លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុឲ្យដឹងនៅល្ងាចថ្ងៃ២ខែកញ្ញាឆ្នាំ២០២០ថា នគរបាលបានបំបែកសំណុំរឿងបទល្មើស ចាប់បង្ខាំងមនុស្សខុសច្បាប់ និងជំរិតទារប្រាក់ មួយករណីទៀត ចាប់ខ្លួនជនសង្សយ័ចំនួន៧នាក់ ក្នុងនោះមានជនជាតិចិនចំនួន៣នាក់ និងជនជាតិខ្មែរចំនួន៤នាក់ ដកហូតរថយន្តមួយគ្រឿង ,ម៉ូតូ២គ្រឿង និងឯកសារពាក់ព័ន្ធមួយចំនួនទៀត ព្រមទាំងជួយរំដោះជនរងគ្រោះ ដែលជាជនជាតិចិនចំនួន៣នាក់ដោយសុវត្ថិភាព។
លោកឧត្តមសេនីយ៍ទោស្នងការបញ្ជាក់តាមរបាយការណ៍ថា នៅយប់រំលងអធ្រាត្រឆ្លងចូលថ្ងៃទី១០ ខែកញ្ញា ឆ្នាំ២០២០ កម្លាំងជំនាញផែននគរបាលព្រហ្មទណ្ឌ បានទទួលបណ្តឹងពីបុរសជនជាតិចិនម្នាក់ឈ្មោះ Gao MingShuai ថា មិត្តភក្តិរបស់គាត់ឈ្មោះ Wen QiLiang ភេទប្រុស ជនជាតិចិន ត្រូវបានក្រុមជនសង្ស័យចាប់យកទៅបង្ខាំងទុកនៅកន្លែងមួយមិនស្គាល់ រួចជំរិតទារប្រាក់ចំនួន១០.០០០ដុល្លារ ។
បន្ទាប់ពីទទួលបណ្តឹងរួច នគរបាលបានធ្វើការស្រាវយ៉ាងយកចិត្តទុកដាក់ រហូតដល់ព្រឹកថ្ងៃទី១០ ខែកញ្ញា ឆ្នាំ២០២០ ទើបកំណត់បានទីតាំងបង្ខាំងជនសង្ស័យស្ថិតនៅចំណុចផ្ទះសំណាក់វួយអ៊ីណា ក្រុមទី១៦ ភូមិ១សង្កាត់២ ក្រុង-ខេត្តព្រះសីហនុ បន្ទាប់មកកម្លាំងជំនាញផែននគរបាលព្រហ្មទណ្ឌ បានរាយការណ៍ជូនឯកឧត្តមព្រះរាជអាជ្ញានៃអយ្យការអមសាលាដំបូងខេត្តព្រះសីហនុ ហើយឯកឧត្តម ព្រះរាជអាជ្ញាបានឯកភាពឲ្យកម្លាំងសមត្ថកិច្ចចុះទៅប្រតិបត្តិការនៅកន្លែងកើតហតុ ភ្លាមនោះកម្លាំងជំនាញផែននគរបាលព្រហ្មទណ្ឌ បានសហការជាមួយកម្លាំងអធិការដ្ឋាននគរបាលក្រុង , កម្លាំងប៉ុស្តិ៍រដ្ឋបាលសង្កាត់លេខ២ ចុះទៅប្រតិបត្តិការ ជួយរំដោះជនរងគ្រោះចំនួន ៣នាក់ ភេទប្រុស ជនជាតិចិន និងឃាត់ខ្លួនជនសង្ស័យទាំង៧នាក់ ភេទប្រុស នាំយកមកកាន់ស្នងការដ្ឋាននគរបាលខេត្តព្រះសីហនុ ។
ជនរងគ្រោះមានឈ្មោះដូចខាងក្រោម៖ ១.ឈ្មោះ He Wei ភេទប្រុស អាយុ៣១ឆ្នាំ ជនជាតិចិន មុខរបរ បុគ្គលិកក្រុមហ៊ុន មានទីលំនៅរាជធានីភ្នំពេញ ។ ២.ឈ្មោះ He A Kun ភេទប្រុស អាយុ២៩ ឆ្នាំ ជនជាតិចិន មុខរបរ អ្នកលក់សំបុត្រយន្តហោះ មានទីលំនៅរាជធានីភ្នំពេញ ។ ៣.ឈ្មោះ Gao MingShuai ភេទប្រុស អាយុ២៩ឆ្នាំ ជនជាតិចិន មុខរបរ បុគ្គលិកខារ៉ាអូខេ មានទីលំនៅភូមិ៤ សង្កាត់៤ ក្រុង-ខេត្តព្រះសីហនុ ។
ជនសង្ស័យចំនួន៧នាក់ មានឈ្មោះដូចខាងក្រោម៖ ១.ឈ្មោះ Cheng PengYun ភេទប្រុស អាយុ៣១ឆ្នាំ ជនជាតិ ចិន មុខរបរ អ្នកនាំភ្ញៀវលេងល្បែង ស្នាក់នៅភូមិ1សង្កាត់២ ក្រុង-ខេត្តព្រះសីហនុ ។ ២.ឈ្មោះ Chen FuLi ភេទប្រុស អាយុ៣២ឆ្នាំ ជនជាតិ ចិន មុខរបរ ក្រុមចងការប្រាក់ (ផ្នែកយាម) ស្នាក់នៅភូមិ1សង្កាត់២ ក្រុង-ខេត្តព្រះសីហនុ ។ ៣.ឈ្មោះ Hai QuanShan ភេទប្រុស អាយុ៣២ឆ្នាំ ជនជាតិ ម៉ុងហ្គោលី (ចេះភាសាចិន) មុខរបរ ក្រុមចងការប្រាក់(ផ្នែកទារប្រាក់) ស្នាក់នៅភូមិ១សង្កាត់២ក្រុង-ខេត្តព្រះសីហនុ ។ ៤.ឈ្មោះ ង៉ែត ពើត ភេទប្រុស អាយុ៣៥ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិ៥ សង្កាត់១ ក្រុង-ខេត្តព្រះសីហនុ ។ ៥.ឈ្មោះ ខៀវ សុវណ្ណា ភេទប្រុស អាយុ៣២ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិ១ សង្កាត់៣ ក្រុង-ខេត្តព្រះសីហនុ ។ ៦.ឈ្មោះ ស្រ៊ី ហួត ភេទប្រុស អាយុ៣៤ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិ១សង្កាត់១ ក្រុង-ខេត្តព្រះសីហនុ ។ ៧.ឈ្មោះ ង៉ែត ហេង ភេទប្រុស អាយុ៣៥ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិ៣ សង្កាត់១ ក្រុង-ខេត្តព្រះសីហនុ ។
វត្ថុតាងចាប់យកបានរួមមាន៖ រថយន្តមួយគ្រឿងម៉ាកស្តារិច ពណ៌ទឹកប្រាក់ ពាក់ផ្លាកលេខភ្នំពេញ 2BE-9670 ម៉ូតូ២គ្រឿង ម៉ាកSmash Revo ចំនួន១គ្រឿង និងម៉ាក Duke ចំនួន១គ្រឿង លិខិតខ្ចីប្រាក់២សន្លឹក (ភាសាខ្មែរ១សន្លឹក ភាសាចិន ១សន្លឹក) ពិលឆក់១ ដំបងឆក់ ១ និងស្ព្រៃបាញ់ភ្នែក ១ ។
ជនសង្ស័យនិងវត្ថុតាង កម្លាំងជំនាញកំពុងកសាងនីតិវិធី បញ្ជូនទៅសាលាដំបូងខេត្តព្រះសីហនុ ផ្តន្ទាទោសតាមច្បាប់៕ ដោយ៖បញ្ញាស័ក្តិ
