ភ្នំពេញ៖ អ្នកនាំពាក្យរាជរដ្ឋាភិបាលកម្ពុជា បានថ្លែងថា ក្រសួងសេដ្ឋកិច្ចអាមេរិក បានដកស្រង់សម្តីរបស់លោកទៅសរសេរបំភ្លៃខុសពីការពិតទាំងស្រុង របស់ខ្ញុំផ្ទាល់ ដែលនិយាយថា «រមណីយដ្ឋានរបស់គីរីសាគរ ដែលអាចកំលាយទៅជាមូលដ្ឋានទ័ពបរទេស គឺជាព័ត៌មានប្រឌិត»ហើយលោកស្នើឲ្យស្ថាប័ននេះ ពិនិត្យខ្លឹមសារឡើងវិញផងដែរ។
តាមរយៈផេកហ្វេសប៊ុកផ្លូវការនៅថ្ងៃទី១៦ ខែកញ្ញា ឆ្នាំ២០២០ លោក ផៃ ស៊ីផាន អ្នកនាំពាក្យរាជរដ្ឋាភិបាលកម្ពុជា បានសម្តែងការសោកស្តាយយ៉ាងខ្លាំង ដែលការសរសេរក្នុងខ្លឹមសារ របស់ក្រសួងសេដ្ឋកិច្ចអាមេរិកប្រឌិតបែបនេះ ហើយលោកចាត់ទុកថា ទង្វើនេះធ្វើឲ្យប៉ះពាល់កិត្តិយសលោក ដែលជាមន្ត្រីរាជរដ្ឋាភិបាលកម្ពុជាទៀតផង។
លោក ផៃ ស៊ីផាន បានបញ្ជាក់ថា៖ «គួរសោកស្ដាយ នូវរបាយការណ៍របស់ស្ថាប័នហិរញ្ញវត្ថុសហរដ្ឋអាមេរិក ដែលធ្វើការចោទប្រកាន់តាមរយៈអង្គហេតុ នៃរបាយការណ៍របស់ខ្លួន គឺប្រាសចាកពីការពិតទាំងស្រុង។ ជាពិសេសពាក់ព័ន្ធនឹងពាក្យសម្តីរបស់ខ្ញុំផ្ទាល់ ដែលនិយាយថា «រមណីយដ្ឋានរបស់គីរីសាគរ ដែលអាចកំលាយទៅជាមូលដ្ឋានទ័ពបរទេស គឺជាព័ត៌មានប្រឌិត» ដែលខ្ញុំពុំអាចទទួលយកបាននោះទេ»។ អាស្រ័យហេតុនេះ ស្ថាប័នហិរញ្ញវត្ថុសហរដ្ឋអាមេរិក គួរតែពិនិត្យមើលសារជាថ្មីម្តងទៀត នៃអង្គហេតុនូវការចោទប្រកាន់របស់ខ្លួន ដែលពាក់ព័ន្ធនឹងកិតិ្តយសរបស់ខ្ញុំផ្ទាល់ និងការពិត»។
ក្រសួងសេដ្ឋកិច្ចអាមេរិក កាលពីថ្ងៃទី១៥ ខែកញ្ញា ឆ្នាំ២០២០ បានចេញសេចក្តីថ្លែងការណ៍ថា នឹងដាក់ទណ្ឌកម្មទៅលើគម្រោងរបស់ក្រុមហ៊ុន Union Development Group នៅកម្ពុជា ដោយស្របតាមច្បាប់ The Global Magnitsky Human Rights និងបទបញ្ជារដ្ឋបាលពាក់ព័ន្ធរបស់រដ្ឋាភិបាលសហរដ្ឋអាមេរិក៕ដោយ៖កូឡាប