កំពង់ធំ៖នាយឧត្តមសេនីយ៍ សន្ដិបណ្ឌិត នេត សាវឿនបានដាក់បទបញ្ជាឲ្យ គណៈបញ្ជាការឯកភាពខេត្តកំពង់ធំ និងស្នងការដែលត្រូវតែងតាំងថ្មីត្រូវចេះព្យាករណ៍នូវសភាពការដែលកើតមានឡើងនៅពេលខាងមុខ ជាពិសេសពួកឧទ្ទាមអមិត្តមិនដែលបោះបង់បំណងបំផ្លាញរាជរដ្ឋាភិបាលស្របច្បាប់ តែងតែដឹកនាំឲ្យមានបាតុកម្ម ។
ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិថ្លែងបែបនេះ នៅព្រឹកថ្ងៃទី២១ ខែកញ្ញា ឆ្នាំ២០២០នេះ ក្នុងពិធីប្រកាសផ្ទេរភារកិច្ច និងតែងតាំងមុខតំណែង ស្នងការ នៃស្នងការដ្ឋាននគរបាលខេត្តកំពង់ធំ ។
ក្នុងអង្គពិធី ឯកឧត្តម នាយឧត្តមសេនីយ៍ សន្ដិបណ្ឌិត នេត សាវឿន បានមានប្រសាសន៍ថា ខេត្តកំពង់ធំ គឺជាខេត្តមួយដែលនៅចំកណ្តាលប្រទេស និងជាខេត្តសេដ្ឋកិច្ចសំខាន់ទាំងផ្នែកកសិកម្ម ឧស្សាហ៍កម្ម ជលផល ជាពិសេសក៏សំបូរទៅដោយធនធានរ៉ែធម្មជាតិផងដែរ។ ប៉ុន្តែនៅមានបញ្ហាប្រឈមខ្លះដែរ ដូចជាបញ្ហាបទល្មើសនេសាទ បទល្មើសព្រៃឈើ ទំនាស់សហគមន៍ និងបទល្មើសបំផ្លាញធនធានធម្មជាតិ ប៉ុន្តែក្នុងនាមគណៈបញ្ជាការខេត្តអាចធ្វើការទប់ស្កាត់បាន។ រីឯបញ្ហាសន្តិសុខ និងសុវត្ថិភាព ពិសេសគ្រោះថ្នាក់ចរាចរណ៍ និងបទល្មើសផ្សេងៗមានការកើនឡើងផងដែរ ដូច្នេះត្រូវរួមគ្នាដោះស្រាយ។
ឯកឧត្តមអគ្គស្នងការនគរបាលជាតិ បានជម្រុញឲ្យស្នងការថ្មី ត្រូវរួមគ្នាគិត រួមសហការគ្នា គិតពីបញ្ហាប្រយោជន៍ជាតិជាធំ ដើម្បីស្តារកិត្តិយស និងបម្រើប្រជាពលរដ្ឋជាធំ ទន្ទឹមនឹងនោះ គណៈបញ្ជាការឯកភាពខេត្ត និងស្នងការដែលត្រូវតែងតាំងថ្មីត្រូវចេះព្យាករណ៍នូវសភាពការដែលកើតមានឡើងនៅពេលខាងមុខ ជាពិសេសពួកឧទ្ទាមអមិត្តមិនដែលបោះបង់បំណងបំផ្លាញរាជរដ្ឋាភិបាលស្របច្បាប់ តែងតែដឹកនាំឲ្យមានបាតុកម្ម ជាពិសេសគឺមិនអនុញ្ញាតឲ្យជនទាំងនោះមកបំផ្លាញសន្តិភាព និងសេចក្តីសុខប្រជាពលរដ្ឋនោះឡើយ។ ត្រូវការពារឲ្យបានដាច់ខាតនូវសន្តិភាពដែល សម្តេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានខិតខំនាំយកបានដោយលំបាក។ ក្នុងនាមជាស្នងការថ្មីត្រូវជួយដោះស្រាយបញ្ហាទុក្ខកង្វល់របស់ប្រជាពលរដ្ឋ ហើយអ្វីដែលជាទុក្ខព្រួយរបស់ប្រជាពលរដ្ឋ គឺករណីបទល្មើស លួច ឆក់ ប្លន់នៅក្នុងមូលដ្ឋាន ត្រូវតែអនុវត្តនូវគោលនយោបាយភូមិ-ឃុំ មានសុវត្ថិភាព ជួយទប់ស្កាត់បញ្ហាគ្រឿងញៀន ទប់ស្កាត់កុំអោយមានការរីករាលដាលមកដល់ទីជនបទ។ ត្រូវរួមគ្នាជួយដោះស្រាយសំដៅកាត់បន្ថយអត្រាគ្រោះថ្នាក់ចរាចរណ៍ដែលជាក្តីកង្វល់របស់ប្រជាពលរដ្ឋ ត្រូវជួយផ្សព្វផ្សាយអប់រំច្បាប់ និងអប់រំដល់អ្នកដែលប្រើប្រាស់ផ្លូវទាំងអស់ដើម្បីអោយពួកគាត់បានយល់ និងរួមចំណែកក្នុងការកាត់បន្ថយគ្រោះថ្នាក់ចរាចរណ៍។
ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន បានផ្តាំផ្ញើឲ្យស្នងការថ្មីត្រូវធ្វើជាសេនាធិការគ្រប់ជ្រុងជ្រោយដល់គណៈបញ្ជាការឯកភាពខេត្ត ដើម្បីបំពេញការងារ សំដៅការពារសន្តិសុខ សុវត្ថិភាព និងសណ្តាប់ធ្នាប់ជូនប្រជាពលរដ្ឋក្នុងខេត្តទាំងមូល ដោយអនុវត្តតាមគោលនយោបាយ ភូមិ ឃុំ មានសុវត្ថិភាព។
ត្រូវលើកកម្ពស់សេវាចាំបាច់ដើម្បីបម្រើជូនប្រជាពលរដ្ឋ ការបំពេញលិខិតស្នាមរដ្ឋបាល និងធ្វើកិច្ចការដោយស្មោះត្រង់ដោយឥតលក្ខខណ្ឌ និងទទួលខុសត្រូវ មិនកោសរូសចាត់ទុកប្រជាពលរដ្ឋជាឪពុកម្តាយ មេប៉ុស្តិ៍នគរបាលរដ្ឋបាលត្រូវបំពេញកិច្ចការដោយចេញពីបេះដូងដើម្បីអោយពលរដ្ឋមានភាពកក់ក្តៅ ជាពិសេសអោយពួកគាត់មានភាពជឿជាក់លើនគរបាល។ ត្រូវអនុវត្តវិន័យចំពោះមន្ត្រីនគរបាលណាដែលប្រព្រឹត្តកំហុស ដោយមិនមានការលើកលែងជាដាច់ខាត។
ត្រូវពង្រឹងសាមគ្គីភាព និងលើកទង់សាមគ្គីផ្ទៃក្នុង សហការគ្នាក្រោមដំបូលរាជរដ្ឋាភិបាល ក្រសួងមហាផ្ទៃ ដើម្បីទទួលបានភាពជោគជ័យ ក្នុងការអនុវត្តគោលនយោបាយភូមិ ឃុំ មានសុវត្ថិភាព និងយុទ្ធនាការសំខាន់ៗរបស់រាជរដ្ឋាភិបាល។ ត្រូវលុបចោលនូវជំងឺតួឯក ជំងឺដណ្តើមស្នាដៃ និងការដណ្តើមមុខមាត់។
គួរជម្រាបថា លោកឧត្តមសេនីយ៍ទោ ម៉ែន លី ស្នងការ នៃស្នងការដ្ឋាននគរបាលខេត្តឧត្តរមានជ័យ ត្រូវបានផ្ទេរភារកិច្ច និងតែងតាំមុខតំណែងជាស្នងការ នៃស្នងការដ្ឋាននគរបាលខេត្តកំពង់ធំ ជំនួសលោកឧត្តមសេនីយ៍ទោ អ៊ុក កុសល ដែលត្រូវបានផ្លាស់ប្ដូរភារកិច្ច៕ ដោយ៖កូឡាប
