ភ្នំពេញ៖ នៅមុននេះបន្តិច នារសៀលថ្ងៃទី២២ ខែកញ្ញា ឆ្នាំ២០២០ មានហេតុការណ៍គ្រោះថ្នាក់ចរាចរណ៍មួយបានកើតឡើង រវាងរថយន្ត Range Rover ស៊េរីទំនើប១គ្រឿង និងរថយន្តស្ទួច១គ្រឿង បង្កឲ្យមានការភ្ញាក់ផ្អើល ស្ថិតនៅចំណុចសាលាវិទ្យាល័យជាស៊ីម តាមបណ្តោយផ្លូវ២៧១ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ
បើតាមព័ត៌មានបឋម បានឲ្យដឹងថា ករណីគ្រោះថ្នាក់ចរាចរណ៍នេះ គឺបង្កឡើងដោយរថយន្តស្ទួចពាក់ស្លាកលេខ ភ្នំពេញ 3D-0405 បានកៀររថយន្ត Range Rover ពាក់ផ្លាកលេខ ភ្នំពេញ 2AZ-5558 Rangrover ស៊េរីទំនើប បណ្តាលឲ្យកោសឆ្កូតចាប់ពីផ្នែកខាងក្រោយរហូតបាក់ធ្លាក់កញ្ចក់មុខ។
ប៉ុន្តែ បើតាមអ្នកបើកបររថយន្តស្ទួចបានប្រាប់ឲ្យដឹងថា រថយន្តទាំងពីរបានបើកស្របទន្ទឹមគ្នា ប៉ុន្តែ រថយន្ត Range Rover បានគេចពីសិស្សសាលាជិះម៉ូតូ ក៏ជ្រុលមកប៉ះឡានរបស់គាត់ បណ្តាលឲ្យកៀរឆ្កូតមួយល្វែងតួរថយន្តផ្នែកខាងស្តាំតែម្តង។
ទោះយ៉ាងណា ក្រោយពីចរចាគ្នាដោយចិត្តត្រជាក់មួយសន្ទុះ ម្ចាស់រថយន្ត Range Rover ពុំបានទាមទារសំណងការខូចខាតនោះទេ បន្ទាប់ពីតៃកុងឡានស្ទួចបានសុំទោស ដើម្បីបញ្ចប់រឿងកុំឲ្យរំខានដល់សមត្ថកិច្ច៕ ដោយ៖ លឹម ហុង
