ក្លឹបបាល់ទាត់នៅលីគកំពូលអ៊ីតាលីសេរីអេ ក្រុមដែលមានរហស្សនាមថា ពស់យក្សខ្មៅ ខៀវ Inter Milan បានបង្ហោះលើបណ្តាញសង្គម Twitter របស់ខ្លួនថា បានចុះកិច្ចព្រមព្រៀងរួចរាល់ក្នុងការផ្ទេរយកកីឡាករសញ្ជាតិ ឈីលី Arturo Vidal ពីក្លឹបអ្នកមានបុណ្យ FC Barcelona ហើយកាលពីថ្ងៃអង្គារ។
Vidal បានចួលរួមជាមួយ Barça កាលពីឆ្នាំ២០១៨ដោយចាកចេញពីក្រុមផ្កាយក្រហម Bayern Munich និងបានបង្ហាញខ្លួនសម្រាប់ក្រុមដែលមានមូលដ្ឋាននៅតំបន់កាតាឡាន់សរុប ៩៦ប្រកួតគិតគ្រប់កម្មវិធីទាំងអស់ដោយស៊ុតចូល១១គ្រាប់ និងបោះបាល់ឲ្យមិត្តរួមក្រុមស៊ុតបញ្ចូលទីបាន១០ដង។ នៅពេលឥឡូវនេះវាជាលើកទីពីរហើយសម្រាប់ Vidal ដែលនឹងរួបរួមជាមួយអតីតអ្នកចាត់ការរបស់គាត់ Antonio Conte នៅក្រុម Inter Milan។
ក្នុងការបង្ហោះលើបណ្តាញ Twitter កាលថ្ងៃអង្គារថ្វីត្បិតក្លឹបមិនបានបញ្ចេញតម្លៃផ្ទេរក៏ដោយ តែត្រូវបានគេដឹងតាមរយៈការបង្ហោះលើគេហទំព័រផ្លូវការណ៍របស់ក្លឹប FC Barcelona ថា ការផ្ទេរនេះគឺមានតម្លៃ១លានអឺរ៉ូ និងមានមានប្រាក់ឧបត្ថមផ្សេងៗទៀតអាស្រ័យលើទម្រង់លេងរបស់គាត់។
សូមបញ្ជាក់ថា Arturo Vidal ធ្លាប់ត្រូវបានលោក Conte ទិញយកមករួមក្រុម Juventus ម្តងហើយកាលឆ្នាំ២០១១ ដែលពេលនោះគាត់ជាអ្នកចាត់ការក្លឹប ហើយពេលនេះជាលើកទីពីរដែលអ្នកទាំងពីររួបរួមគ្នាសាជាថ្មី៕ ដោយ ៖ វិឆ្ឆិកា
