ភ្នំពេញ៖ រដ្ឋលេខាធិការដ្ឋានអាកាសចរណ៍ស៊ីវិល(SSCA), ក្រុមហ៊ុន Boeing Company និងស្ថានទូតសហរដ្ឋអាមេរិកប្រចាំនៅកម្ពុជា កាលពីថ្ងៃម្សិលមិញ បានពិភាក្សាលើការរៀបចំផ្តល់សច្ចាប័នអនុសញ្ញា Cape Town ស្តីពី ផលប្រយោជន៍អន្តរជាតិនៅក្នុងចលនទ្រព្យ (ទ្រព្យសកម្ម)។
អនុសញ្ញាអន្តរជាតិ Cape Town ត្រូវបានរៀបចំឡើងរួមគ្នាដោយវិទ្យាស្ថាន UNIDROIT និងអង្គការ ICAO ហើយបានអនុម័តនៅទីក្រុង ខេបថោន ប្រទេសអាហ្វ្រីកខាងត្បូងនៅថ្ងៃទី១៦ ខែវិច្ឆិកា ឆ្នាំ២០០១ ដែលមានគោលបំណងសម្របសម្រួលដល់ការផ្តល់ហិរញ្ញប្បទានជាទ្រព្យសកម្ម ឬការជួលអាកាសយាន និងសម្ភារៈបរិក្ខារអាកាសចរណ៍។
ថ្វីបើអនុសញ្ញាអន្តរជាតិនេះជាទូទៅត្រូវបានគេប្រើភាគច្រើននៅក្នុងវិស័យអាកាសចរណ៍ស៊ីវិលក៏ដោយ ក៏អនុសញ្ញានេះអាចអនុវត្តបានផងដែរចំពោះវិស័យផ្សេងៗទៀត ស្របតាមពិធីសារខុសៗគ្នានៃអនុសញ្ញា ដូចជា រថភ្លើង អាវកាស រ៉ែ កសិកម្ម និងបរិក្ខារសំណង់ជាដើម ហើយរហូតមកទល់ពេលនេះមានប្រទេសចំនួន៧៨ប្រទេសហើយដែលបានចុះ ផ្តល់សច្ចាប័នគិតត្រឹមខែកក្កដាឆ្នាំ២០២០នេះ និងដោយឡែកមានប្រទេសចំនួន១៦ នៅអាស៊ីបានផ្តល់សច្ចាប័ន រួមមានៈ Afganistan, Australia, Bangladesh, China, Fiji, India, Indonesia, Kazakstan, New Zealand, Malaysia, Mongolia, Myanmar, Pakistan, Singapore, Tajikistan and Vietnam។
កិច្ចពិភាក្សាមានការចូលរួមដោយ លោក ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល និង លោក Patrick Murphy អគ្គរដ្ឋទូតអាមេរិកប្រចាំនៅកម្ពុជា ដោយមានការចូលរួមពីតំណាងក្រសួង ស្ថាប័ន រដ្ឋពាក់ព័ន្ធមួយចំនួន ដូចជា ទីស្តីការគណៈរដ្ឋមន្ត្រី ក្រសួងការបរទេសនិងកិច្ចសហប្រតិបត្តិការអន្តរជាតិ ក្រសួងសេដ្ឋកិច្ចនិងហិរញ្ញវត្ថុ ក្រសួងយុត្តិធម៌ ក្រសួងសាធារណការនិងដឹងជញ្ជូន ក្រសួងទេសចរណ៍ ក្រសួងពាណិជ្ជកម្ម រដ្ឋលេខាធិការដ្ឋានអាកាសចរស៊ីវិល គយនិងរដ្ឋាករ ក្រុមហ៊ុន ប៊ូអ៊ីង និងក្រុមហ៊ុនអាកាសចរកម្ពុជាអង្គរអ៊ែរ។
កិច្ចប្រជុំពិភាក្សាថ្ងៃនេះគឺផ្តោតជាសំខាន់ទៅលើ អត្ថប្រយោជន៍ផ្នែកសេដ្ឋកិច្ចសម្រាប់ព្រះរាជាណាចក្រកម្ពុជា បន្ទាប់ពីចុះហត្ថលេខារួមមានៈ-ការកាត់បន្ថយថ្លៃចំណាយលើការខ្ចី និងការទទួលហិរញ្ញប្បទានសម្រាប់ក្រុមហ៊ុនអាកាសចរណ៍និងកិច្ចប្រតិបត្តិការអាកាសយាន, កាត់បន្ថយថ្លៃចំណាយលើការជួលឬការទិញអាកាសយាននិងគ្រឿងបរិក្ខារ, បង្កើនជម្រើសហិរញ្ញប្បទាន,តម្លៃសំបុត្រមានតម្លៃទាបជាងមុន, ជួយសម្រួលដល់ក្រុមហ៊ុនអាកាសចរណ៍ក្នុងស្រុក មានលទ្ធភាពអាចប្រកួតប្រជែងជាមួយក្រុមហ៊ុនអាកាសចរណ៍ផ្សេងទៀត នៅលើទីផ្សារអន្តរជាតិតាមរយៈឱកាសទទួលបានហិរញ្ញប្បទានសមភាព។
កិច្ចពិភាក្សាទី២ ផ្តោតលើឧត្តមានុវត្តន៍ក្នុងការរៀបចំផ្តល់សច្ចាប័នលើអនុសញ្ញា។ ក្រៅពីកិច្ចប្រជុំពិភាក្សាអនុសញ្ញានេះ ថ្នាក់ដឹកនាំទាំងពីរក៏បានលើកឡើងផងដែរ អំពីកិច្ចការទូទៅពាក់ព័ន្ធនឹងស្ថានការបច្ចុប្បន្ន ដូចជាជំងឺកូវីដ-១៩ ស្ថានទូតអាមេរិកប្រចាំកម្ពុជា ក៏បានសន្យានឹងពង្រឹងទំនាក់ទំនងជាមួយកម្ពុជាបន្ថែមទៀត លើវិស័យអាកាសចរណ៍តាមរយៈការជួយជាអ្នកជំនាញ និងជួយដល់ការកសាងនូវឯកសារចាំបាច់មួយចំនួន៕
ដោយ៖CEN
