ឧត្តរមានជ័យ៖ នៅថៃ្ង២៣ ខែកញ្ញាឆ្នាំ២០២០ មន្ត្រីឧទ្យានុរក្សស្នាក់ការអូរអំបិល បានសហការជាមួយកម្លាំងល្បាតប្រចាំនៅស្នាក់ការ អង្គការអភិរក្សសត្វព្រៃកម្ពុជា និងអនុរក្សសត្វដំរី បានចុះល្បាតចាប់ពីចំណុចប៉ុស្តិ៍អូរកូនតឹង ដល់ចំណុចប៉ុស្តិ៍កប់គង បានប្រទះឃើញជនសង្ស័យពីរនាក់ ដាក់អន្ទាក់ចាប់សត្វព្រៃ (ជ្រូកព្រៃ) ស្ថិតនៅក្នុងដែនជម្រកសត្វព្រៃគូលែនព្រហ្មទេព មន្ត្រីយើងបានឃាត់ខ្លួនជនសង្ស័យយកមកស្នាក់ការអូរអំបិល និងបញ្ជូនមកមន្ទីរបរិស្ថានខេត្តឧត្តរមានជ័យ ដើម្បីកសាងសុំណុំរឿងតាមនីតិវិធីច្បាប់ស្តីពីតំបន់ការពារធនធានធម្មជាតិ។
មន្ទីរបរិស្ថានខេត្តឧត្តរមានជ័យ បានឲ្យដឹងថា ជនសង្ស័យទាំងពីរមានឈ្មោះ និងអាសយដ្ឋានដូចខាងក្រោម៖ ១-ឈ្មោះ សួង សាក់ ភេទប្រុស អាយុ២៤ ឆ្នាំ រស់នៅក្នុងភូមិ ត្រាំសសរ ឃុំស្រែណូយ ស្រុកវ៉ារិន ខេត្តសៀមរាប ២-ឈ្មោះ វ៉ន វៀង ភេទប្រុស អាយុ ២៣ឆ្នាំ រស់នៅ ភូមិ ត្រាំសសរ ឃុំស្រែ ណូយ ស្រុកវ៉ារិន ខេត្តសៀមរាប៕ ដោយ៖បញ្ញាស័ក្តិ