Friday, December 2, 2022

ឃាត់ខ្លួន​បុរស​២​នាក់​ ជាមួយនឹង​ថ្នាំញៀន​ទម្ងន់​ជាង​១​គីឡូក្រាម លាក់​ក្រោម​កែប​ម៉ូតូ​

spot_img

​ភ្នំពេញ ៖ បុរស​ពីរ​នាក់​ដែល​ជា​មុខសញ្ញា​ជួញដូរ​សារធាតុ​ញៀន​ខុសច្បាប់​ត្រូវ​នគរបាល​ខណ្ឌ​ដង្កោ​ឃាត់ខ្លួន​និង​ឆែកឆេរ​រកឃើញ​ថ្នាំ​ញៀន​ចំនួន​៥​កញ្ចប់​ថង់​ធំ​មាន​ទម្ងន់​ជាង​១​គីឡូក្រាម នៅ​ព្រឹក​ថ្ងៃទី​៨ ខែ​កុម្ភៈ ឆ្នាំ​២០១៨ ត្រង់​ចំណុច​ផ្លូវ​បេតុង ស្ថិត​ភូមិ​ម័ល សង្កាត់​ដង្កោ ខណ្ឌដង្កោ រាជធានី​ភ្នំពេញ​។​

​លោក​វរសេនីយ៍ឯក ជឹម ស៊ីថា អធិការ​ខណ្ឌ​បានឲ្យដឹងថា ជនសង្ស័យ ឈ្មោះ នុត លី​ណា អាយុ​៣១​ឆ្នាំ មុខរបរ​មិន​ពិតប្រាកដ ស្មនាក់​នៅ​ស្នាក់​នៅផ្ទះ​ជួល​ភូមិ​ទួល​ពង្រ សង្កាត់​ចោមចៅ​ខណ្ឌ​ពោធិ៍​សែន​ជ័យ រាជធានី​ភ្នំពេញ និង​ឈ្មោះ យឹម ប៊ុនឆៃ អាយុ​២៨​ឆ្នាំ មុខរបរ​មិន​ពិតប្រាកដ ស្នាក់នៅ​ផ្ទះជួល សង្កាត់​បឹង​សាឡាង ខណ្ឌ​ទួលគោក រាជធានី​ភ្នំពេញ​។ ក្នុងពេល​ឃាត់ខ្លួន​សមត្ថកិច្ច​បាន​ចាប់​យក​វត្ថុតាង ម្ស៉ៅ​ក្រាម​ពណ៌​ស​ថ្លា​ចំនួន​៥​កញ្ចប់​ថង់​ធំ ជា​ថ្នាំ​ញៀន ម៉ូតូ​១​គ្រឿង ម៉ាក​ហុង ដា​សេ​១២៥ ពណ៌​ខ្មៅ ពាក់​ស្លាក​លេខ​ភ្នំពេញ 1GM-2632 ។​

​មុនពេល​កើតហេតុ កម្លាំង​ប៉ុស្ដិ៍នគរបាល​រដ្ឋបាល​ដង្កោ សហការ​ជាមួយ​កម្លាំង​សមត្ថកិច្ច​នគរបាល​ខណ្ឌដង្កោ ដឹកនាំ​ដោយ​លោក​វរសេនីយ៍ឯក ជឹម ស៊ីថា អធិការ​នគរបាល​ខ​ស​ណ្ឌ​ដង្កោ បាន​ចុះ​បង្ក្រាប​ករណី​ជួញដូរ ដោយ​ខុសច្បាប់​នូវ​សារធាតុ​ញៀន ត្រង់ចំណុច ផ្លូវ​បេតុង ស្ថិតនៅ​ភូមិ​ម័ល សង្កាត់​ដង្កោ ខណ្ឌដង្កោ រាជធានី​ភ្នំពេញ ធ្វើការ​ឃាត់ខ្លួន​ជនសង្ស័យ​ចំនួន​២​នាក់ ហើយ​សមត្ថកិច្ច​ឆែកឆេរ​រក​ឈើ​ញ​ម្ស៉ៅ​ក្រាម​ថ្នាំញៀន​ពណ៌​ស​ថ្លា​ចំនួន​៥ កញ្ចប់​ធំ ដែល​ជនសង្ស័យ​ឈ្មោះ​ញឹម ប៊ុនឆៃ បាន​លាក់ទុក​នៅក្នុង​កែប​ម៉ូតូ​។

​បច្ចុប្បន្ន​ជនសង្ស័យ​រួមជាមួយ​វត្ថុតាង ឃាត់ខ្លួន​នៅ​អធិការដ្ឋាន​នគរបាល​ខណ្ឌដង្កោ ដើម្បី​កសាង​សំណុំរឿង​បញ្ជូន​ទៅ​សាលាដំបូង​រាជធានី​ភ្នំពេញ ៕​ ដោយ​៖​បញ្ញា​ស័ក្តិ​