ក្រុម Bayern Munich ត្រូវបានក្រុមមកពីអេស្ប៉ាញ Sevilla ដែលជាម្ចាស់ពាន UEFA Europa League ឆ្នាំ២០២០ ស៊ុតប៉េណាល់ទីនៅនាទី១៣នាំមុខមុនដោយកីឡាករសញ្ជាតិអាហ្សង់ទីន លូកាស អូកាំប៉ូស។ ក្រោយត្រូវក្រុម Sevilla នាំមុនក្រុម Bayern ប្រឹងប្រែងសម្រុកខ្លាំងមែនទែនរហូតដល់នាទី៣៤ទើប Leon Goretzka តាមស្មើបានវិញដោយការបញ្ជូនបាល់យ៉ាងស្អាតពីកីឡាករសញ្ជាតិប៉ូឡូញ រ៉ូប៊ើត ឡេវ៉ាន់ដូវស្គី។
ចូលដល់វគ្គទីពីរក្រុមពីអាល្លឺម៉ង់មួយនេះ នៅតែដាក់សម្ពាធលើក្រុមពីអេស្ប៉ាញដដែល តែធ្វើអ្វីមិនកើតបានត្រឹមនៅពីមុខទីប៉ុណ្ណោះ លទ្ធទាំងពីរវគ្គស្មើគ្នា១ទល់១ ដូច្នេះលោកអាជ្ញាកណ្តាលមកពីអង់គ្លេស Anthony បានបន្ថែមម៉ោងពិសេស(Extra Time) ១៥នាទីពីរដង។
លេងបានដល់នាទី១៤ចុងម៉ោងវគ្គពិសេសទី១នេះ កីឡាករបម្រុងសញ្ជាតិអេស្ប៉ាញបានតែតបញ្ចូលយ៉ាងល្អនៅនាទី១០៤ ធ្វើឲ្យ Bayern ជាអ្នកនាំមុខ២ទល់១វិញម្តង។ ចូលដល់វគ្គពិសេសទីពីរគ្មានអ្វីប្រែប្រួលនោះឡើយ ចប់ម៉ោងក្រុមមកពីអាល្លឺម៉ង់ Bayern Munich លើកពាន UEFA Super Cup ឆ្នាំ២០២០។
គួរដឹងថា ការប្រកួតរវាងក្រុមទាំងពីរធ្វើឡើងនាកីឡាដ្ឋាន Puskas Arena ក្នុងទីក្រុង ប៊ុយដាប៉េះ ប្រទេសហុងគ្រី ត្រូវបានអនុញ្ញាតឲ្យអ្នកគាំទ្រចូលរួមលើកដំបូងក្រោយរឹតបន្តឹងមិនឲ្យចូលអំឡុង COVID-19 ដោយក្នុងនោះមានអ្នកចូលទស្សនា២ម៉ឺននាក់ ដោយក្រុមមកពីអាល្លឺម៉ង់ មានអ្នកគាំទ្រ១ពាន់នាក់ រីឯក្រុមមកពីអេស្ប៉ាញមានអ្នកគាំទ្រ៥រយនាក់ សមត្ថភាពផ្ទុកអ្នកទស្សនាពេញលេញរបស់កីឡាដ្ឋាននេះ មានរហូតដល់ ៦ម៉ឺន២ពាន់៧រយដប់ពីរនាក់៕ ដោយ ៖ វិឆ្ឆិកា
