ព្រះសីហនុ៖ កម្លាំងសមត្ថកិច្ចខេត្តព្រះសីហនុ កំពុងធ្វើការស៊ើបអង្កេតទៅលើករណីផ្ទុះអាវុធនៅកណ្តាលក្រុងព្រះសីហនុ ដែលបានបណ្តាលឱ្យបុរសម្នាក់ចេះអ្នករត់ម៉ូតូកង់បីបានស្លាប់ក្នុងថ្លុកឈាមបន្ទាប់ពីត្រូវគ្រាប់កាំភ្លើង និងសមត្ថកិច្ច២នាក់រងរបួស។
នៅព្រឹកថ្ងៃចន្ទ ទី២៨ខែកញ្ញា ឆ្នាំ២០២០ លោក វរសេនីយ៍ឯក តី វិសាល អធិការនគរបាលក្រុងព្រះសីហនុ នៃស្នងការដ្ឋាននគរបាល ខេត្តព្រះសីហនុបានដឹកនាំមន្ត្រីក្រោមឱវាទ ចុះទៅសួរសុខទុក្ខដល់កងកម្លាំងដែលរងរបួសក្នុងហេតុការណ៍ផ្ទុះអាវុធកាលពីនៅវេលាម៉ោង ០០និង៤៥នាទី រំលងអធ្រាត្រ ថ្ងៃទី២៧ ខែកញ្ញា ឆ្នាំ២០២០ មានករណីផ្ទុះអាវុធបាញ់រះ នៅចំណុចអតីតហាងនំហេបភីប៊ឺហ្គើ (កែងផ្សារពាណិជ្ជកម្ម) ស្ថិតក្នុងភូមិ៣ សង្កាត់លេខ២ ក្រុងព្រះសីហនុ ខេត្តព្រះសីហនុ ក្នុងនោះដែរ លោកអធិការ បានយកគ្រឿងឧបភោគ បរិភោគ និងថវិកា មួយចំនួនជូនដល់កងកំលាំងដែលរងរបួស កំពុងសំរាកព្យាបាលនៅមន្ទីរពេទ្យ។
នាព្រឹកថ្ងៃទី២៨ ខែកញ្ញា ឆ្នាំ២០២០នេះ ស្នងការដ្ឋាននគរបាលខេត្តព្រះសីហនុបានចាត់តំណាងអោយលោកវរសេនីយ៍ទោ ជុំ សុគន្ធី អធិការរង នៃអធិការដ្ឋាននគរបាលក្រុងព្រះសីហនុ នាំយកថវិកា ចំនួន ៤,០០០,០០០ រៀល (បួនលានរៀល) ជូនក្រុមគ្រួសារសពលោក ហែម រិទ្ធិ នៅវត្តសំរោង ឃុំសំរោងក្រោម ស្រុកបន្ទាយមាស ខេត្តកំពត។
ករណីផ្ទុះអាវុធនេះបានកើតឡើងនៅម៉ោងជាង១២យប់រំលងអធ្រាត្រឈានចូលថ្ងៃទី២៧ ខែកញ្ញា បង្កឡើងដោយជនជាតិខ្មែរចំនួន៣នាក់ ក្នុងនោះសមត្ថកិច្ចបានធ្វើការឃាត់ខ្លួនជនសង្ស័យម្នាក់។
លោកឃាង ភារម្យ អ្នកនាំពាក្យរដ្ឋបាលខេត្តព្រះសីហនុបានថ្លែងប្រាប់កាសែតក្នុងស្រុកថា ក្នុងនាមជាគណៈបញ្ជាខេត្ត គឺយើងបានដាក់ការយកចិត្តទុកដាក់ខ្លាំងបំផុតទៅលើការពង្រឹងសន្តិសុខសុវត្ថិភាពជូនបងប្អូនប្រជាពលរដ្ឋក្នុងខេត្តព្រះសីហនុផង ទាំងភ្ញៀវទេសចរ និងអ្នកវិនិយោគ គឺយើងយកចិត្តទុកដាក់ខ្ពស់ណាស់ ហើយគ្រប់បទល្មើស ស្ទើរតែគ្រប់បទល្មើសទាំងអស់ គឺយើងអាចបង្ក្រាបបាន។
សមត្ថកិច្ចបានកំណត់មុខសញ្ញាជនដៃដល់ហើយនិងកំពុងឈានទៅស្វែងរកការចាប់ខ្លួនខណៈក្រុមជនខ្មាន់កាំភ្លើងទាំងនោះកំពុងរត់គេចខ្លួន៕ ដោយ៖កូឡាប