ភ្នំពេញ៖ ធនាគារ ជីប ម៉ុង និងក្រុមហ៊ុនដឹកជញ្ជូនអ្នកដំណើរ TADA ថ្ងៃ២៩ កញ្ញា ២០២០ បានចុះអនុស្សរណៈនៃការយោគយល់គ្នាលើសេវាកម្មទូទាត់តាមប្រព័ន្ធឌីជីថល ដើម្បីផ្តល់ជម្រើសបន្ថែមដល់អ្នកធ្វើដំណើរតាម TADA អាចទូទាត់ថ្លៃសេវាតាមកម្មវិធីទូរស័ព្ទដៃ Chip Mong Bank App បាន។
ការចាប់ដៃគូរវាងក្រុមហ៊ុនទាំងពីរ គឺឆ្លុះបញ្ចាំងអំពីការប្ដេជ្ញាចិត្តខ្ពស់ក្នុងការផ្ដល់អត្ថប្រយោជន៍ ភាពងាយស្រួល និងភាពទាន់សម័យជូនអតិថិជន។
លោក វ៉ែន កំសាន្ត អ្នកគ្រប់គ្រងជាន់ខ្ពស់ផ្នែក Eco-system និងភ្នាក់ងារធនាគារ ជីប ម៉ុង បាននិយាយថា៖ «ភាពជាដៃគូនេះនឹងអនុញ្ញាតឲ្យអតិថិជនអាចធ្វើការទូទាត់ថ្លៃធ្វើដំណើររបស់ក្រុមហ៊ុន TADA តាមរយៈកម្មវិធីទូរស័ព្ទដៃ ជីប ម៉ុង ប៊ែង បានកាន់តែងាយស្រួល និងមានសុវត្ថិភាពខ្ពស់ដោយមិនចាំបាច់មានសាច់ប្រាក់សុទ្ធតាមខ្លួន ព្រមទាំងទទួលបានការផ្តល់ជូនពិសេសៗ»។
លោក ជីម ប៉ូលី អ្នកគ្រប់គ្រងទូទៅរបស់ក្រុមហ៊ុន TADA បានបញ្ជាក់ថា ការចាប់ដៃគូនេះមិនត្រឹមតែជួយសម្រួលដល់អតិថិជនរបស់ធនាគារ ជីប ម៉ុង ឬអ្នកប្រើប្រាស់ TADA ឲ្យកាន់តែ ងាយស្រួល ចំណេញពេលវេលា និងមានសុវត្ថិភាពខ្ពស់ប៉ុណ្ណោះទេ ប៉ុន្តែជាកម្លាំង ចលករមួយជំរុញវិស័យទូទាត់ដោយមិនប្រើប្រាស់ក្រដាស់ប្រាក់ឲ្យកាន់តែទំលំទូលាយថែមទៀតនៅកម្ពុជា។
ដើម្បីអបអរភាពជាដៃគូនេះ អតិថិជនទាំងអស់នឹងទទួលបានការបញ្ចុះតម្លៃរហូតដល់៣០០០រៀល នៅពេលទូទាត់ថ្លៃធ្វើដំណើរជាមួយក្រុមហ៊ុន TADA តាមកម្មវិធីទូរស័ព្ទដៃ Chip Mong Bank App។ ការផ្តល់ជូនពិសេសនេះនឹងធ្វើឡើងចាប់ពីថ្ងៃទី១ ខែតុលា រហូតដល់ដំណាច់ឆ្នាំ២០២០នេះ៕
ដោយ៖CEN
