ភ្នំពេញ៖ ឯកឧត្តម វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ នៅថ្ងៃទី៣០ខែកញ្ញាឆ្នាំ២០២០នេះ បានចេញរបាយការណ៍ស្តីពីលទ្ធផលនៃការងារបង្កបង្កើនផលស្រូវរដូវវស្សាឆ្នាំ២០២០ និង
លទ្ធផលនៃការនាំចេញផលិតផលកសិកម្ម ៩ខែដើមឆ្នាំ២០២០។
ឯកឧត្តមរដ្ឋមន្ត្រី បានលើកឡើងថា លទ្ធផលនៃការងារបង្កបង្កើនផលស្រូវរដូវវស្សាឆ្នាំ២០២០ គិតមកទល់ ថ្ងៃទី៣០ ខែកញ្ញា ឆ្នាំ២០២០ ការងារបង្កបង្កើនផលស្រូវរដូវវស្សា នៅទូទាំងប្រទេសសម្រេចធ្វើការស្ទូងនិងព្រោះបានសរុបចំនួន ២.៧១៤.២១៦ ហិកតា ស្មើនឹង ១០៤,៨៧% នៃផែនការចំនួន ២.៥៨៨.១៣០ ហិកតា លើសឆ្នាំ២០១៩ចំនួន ៧០.២១៧ ហិកតា ។ តាមរយៈលទ្ធផលដែលសម្រេចបានខាងលើ ក្នុងនោះមាន៖ ស្រូវស្រាលចំនួន ៨២៨.៧៣៣ ហិកតា, ស្រូវកណ្តាលចំនួន ១.៣៨៥.០៦៦ ហិកតា, ស្រូវធ្ងន់ចំនួន ៤៤៦.៣០១ ហិកតា, ស្រូវចម្ការចំនួន ២០.៦៦៨ ហិកតា និង ស្រូវឡើងទឹកចំនួន ៣៣.៤៤៨ ហិកតា ។ ទន្ទឹមនឹងនេះ យើងបានប្រមូលផលស្រូវស្រាលដើមរដូវវស្សាបានជាបណ្តើរៗ បានចំនួន ៤៣៦.២៨៧ ហិកតា ទទួលបរិមាណផលសរុបចំនួន ១.៦៦២.០៦១ តោន លើសឆ្នាំមុនចំនួន ២៤៦.៦១៨ តោន ទិន្នផលគិតជាមធ្យមទទួលបាន ៣,៨១០ តោនក្នុងមួយហិកតា ។
ឯកឧត្តម វេង សាខុន បានលើកឡើងបន្តថា ការនាំចេញផលិតផលកសិកម្ម ឆ្លងកាត់ច្រកចេញចូលតែមួយ និងមិនបានឆ្លងកាត់
ចំពោះការនាំចេញផលិតផលកសិកម្ម ក្នុងរយៈពេល ៩ខែ ឆ្នាំ២០២០ ក្រសួងបានពិនិត្យឃើញថាមានការកើនឡើងល្អប្រសើរ គឺមានបរិមាណសរុប ចំនួនជាង ៥,៨ លាន តោន ដែលក្នុងនេះមានផលិតផលសំខាន់ៗមួយចំនួនដូចខាងក្រោម៖
1) អង្ករ សម្រេចបាន ៤៨៨.៧៧៥ តោន មានកំណើន ២២,៦៣% ដែលធៀបទៅនឹងរយៈ៩ខែដើមឆ្នាំ២០១៩ (៣៩៨.៥៨៦ តោន) បាននាំចេញទៅកាន់ ៦០ ប្រទេស។
2) ស្រូវ សម្រេចបាន ១.៣៩២.៣០៦ តោន, ថយចុះប្រមាណជា ១៧% ធៀបប្រៀបទៅឆ្នាំ២០១៩, នាំចេញទៅកាន់ប្រទេសវៀតណាម (ក្រៅផ្លូវការ)។
3) គ្រប់ស្វាយចន្ទី សម្រេចបាន ២០៤.២០៨ តោន មានកំណើន ២០,៥%, នាំចេញទៅកាន់ប្រទេសវៀតណាម, ជប៉ុន, រុស្សី, ចិន, ហុងកុង, បារាំង, កូរ៉េ, តួកគី, បង់ក្លាដេស និងថៃ។
4) គ្រាប់ពោត សម្រេចបាន ១៩៣ ៩៥០ តោន បាននាំចេញទៅកាន់ប្រទេសថៃ, កូរ៉េ និងកោះតៃវ៉ាន់
5) ចេកស្រស់ សម្រេចបាន ២៣៥ ១៧១,៦៣ តោន មានកំណើន ២២៥,៦៩%, បាននាំចេញទៅកាន់ប្រទេស ចិន វៀតណាម និងជប៉ុន ។
6) ក្រូចថ្លុង សម្រេចបាន ១៥ ១៥០ តោន ទៅកាន់ប្រទេសថៃ ។
7) ដំណាប់ស្វាយ សម្រេចបាន ៤.៩៩៨,៦៤ តោន, បាននាំចេញទៅកាន់ប្រទេស ចិន, ជប៉ុន, ថៃ, កូរ៉េ, ហ្វីលីពីន និងវៀតណាម។
8) ដំឡូងមីស្រស់ សម្រេចបាន ១.៧៨០.៤៩៦ តោន, បាននាំចេញទៅកាន់ប្រទេស វៀតណាម និងថៃ ទាំងផ្លូវការ និងក្រៅផ្លូវការ ។
9) ចំណិតដំឡូងម៉ីក្រៀម សម្រេចបាន ១ ២០២ ៦៤៤,៨១ តោន បាននាំចេញទៅកាន់ប្រទេសថៃ និងវៀតណាម (ផ្លូវការ)។
10) ម្សៅដំឡូងមី សម្រេចបាន ១២ ០០២ តោន បានថយចុះ ៥៦,៧២%, បាននាំចេញទៅកាន់ប្រទេស ឥណ្ឌា, ចិន, ប៊ែលហ្សិក, ហូឡង់, ប៉ាគីស្ថាន, ឆេក, ក្រូអាត និងអ៊ីតាលី។
11) ស្វាយស្រស់ សម្រេចបាន ៦២ ៩២០,៥៦ តោន មានកំណើន ១៥៨,៨៣%, បាននាំចេញទៅកាន់ប្រទេស ថៃ, វៀតណាម, បារាំង, រុស្សី, កូរ៉េ និងហុងកុង ។
12) ម្រេច សម្រេចបាន ៤.១២១,៩៥ តោន មានកំណើន ១២៣,៧៦%, បាននាំចេញទៅកាន់ប្រទេស ជប៉ុន, ប៊ែលហ្សិក, ហូឡង់,បារាំង, អាល្លឺម៉ង់, ស្វីស, វៀតណាម, អាមេរិច, រុស្ស៊ី, អង់គ្លេស, ឥណ្ឌា, បេឡារូស, កូរ៉េ, ឆេក, ណូវែហ្សែឡង់, អូស្ត្រាលី, ថៃ, តៃវ៉ាន់, ស៊ុយអ៊ែត, សិង្ហបុរី និងប្រទេសអូស្ត្រាលី។
13) ម្ទេសស្រស់ ៥៥.១៥៤,៦០ តោន និងម្ទេសក្រៀម ១ ៥០០ តោន មានកំណើនទ្វេដង ធៀបប្រៀបទៅនឹងឆ្នាំ២០១៩, បាននាំចេញទៅកាន់ប្រទេសថៃ ។
14) បន្លែ សម្រេចបាន ៨៧,៥៧ តោន នាំចេញទៅកាន់ប្រទេសបារាំង, ឆេក និងប្រទេសហូឡង់ ។
ទន្ទឹមនឹងនេះ កម្ពុជាក៏មានផលិតផលកសិកម្មជាច្រើនមុខដទៃទៀត ដែលបាននាំចេញ ៕ដោយ៖កូឡាប
