ភ្នំពេញ៖ បុរសម្នាក់សង្ស័យស្រវឹងជោកជាំបើកបររថយន្តឡិច ស៊ិស RX300 មួយគ្រឿងក្នុងល្បឿនលឿន បានជ្រុលចង្កូតទៅបុករថយន្ត២គ្រឿង ដែលកំពុងចតនៅមុខផ្ទះបណ្តាលឲ្យខ្ទេចរួចជ្រុល ខ្ទាតទៅប៉ះម៉ូតូមួយគ្រឿងទៀតចូលក្រោមរថយន្ត ចំណែកឯបង្គោលថ្ម និងបង្គោលដាក់ស្លាកត្រូវបានបាក់អស់ទាំង២ដើម ក្នុងហេតុការណ៍នោះដែរបណ្តាលឲ្យមានមនុស្សរងរបួសធ្ងន់ស្រាល២នាក់ទៀត ត្រូវបានបញ្ជូនទៅមន្ទីរពេទ្យ។ ហេតុការណ៍បានកើតឡើងនៅវេលាម៉ោង១១និង៣០នាទី ត្រូវនឹងថ្ងៃទី៣០ខែកញ្ញាឆ្នាំ២០២០ នៅតាមបណ្តោយផ្លូវលេខ២ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
បើយោងតាមប្រភពីកន្លែងកើតហេតុបានឲ្យដឹងថា មុនពេលកើតហេតុគេឃើញមានរថយន្តបង្កម៉ាកឡិវស៊ីស ពណ៌ខ្មៅផ្លាកលេខភ្នំពេញ 2-K-94 87 បើកបរដោយបុរសម្នាក់ក្នុងស្តានភាពស្រវឹងធ្លាក់ភ្នេក បើកបររថយន្តបើកបក្នុងល្បឿនយ៉ាងលឿនពីជើងទៅត្បូង ពេលមកដល់ចំណុចកើតហេតុ រថយន្តបង្កខាងលើមិនបានបង្អង់ល្បឿន ក៏ជ្រុលទៅបុករថយន្ត២គ្រឿងដែលម្ចាស់ចតទុកមុខផ្ទះ បន្តទៅបុកទាំងបង្គោលភ្លើងទាំងម៉ូតូ ទើបរថយន្តនោះអស់ល្បឿនទៅមុខលែងរួច ឃើញដូច្នោះអ្នកបើកបររថយន្តបង្កមិនបានទទួលខុសត្រូវទេស្រាប់តែចុះពីលើរថយន្តរត់គេចខ្លួនបាត់ស្រមោល ដោយបន្សល់ទុករថយន្តនៅកន្លែងកើតហេតុ ។
ក្រោយពេលកើតហេតុសមត្ថកិច្ចមូលដ្ឋានសហការគ្នាជាមួយជំនាញចុះមកដល់រូចបានទាក់ទងទៅខាងជំនាញចរាចរណ៍ក្រុងឲ្យចុះមកវាស់វែងនិងធ្វើកំណត់ហេតុយករថយន្តទាំង ៣ គ្រឿងនិងម៉ូតូយកទៅរក្សាទុករង់ចាំដំណោះស្រាយទៅតាមផ្លូវច្បាប់៕ ដោយ៖ សា មេត
