ភ្នំពេញ៖ បុរសម្នាក់ឈ្មោះ ផន ឌីម៉ង់ ដែលប្រើប្រាស់ហ្វេសបុកផេកឈ្មោះ Srey Mom Online បានធ្វើការឡាយវីដេអូចាស់ករណីអគ្គិភ័យលើបណ្ដាញសង្គមហ្វេសប៊ុក ត្រូវបានសមត្ថកិច្ចនៃស្នងការដ្ឋាននគរបាលរាជធានីភ្នំពេញ កោះហៅឲ្យចូលខ្លួនមកបំភ្លឺ និងបានសារភាពកំហុសជាសាធារណ: នាព្រឹកថ្ងៃទី៣ ខែតុលា ឆ្នាំ២០២០នេះ ។
ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ សហការជាមួយការិយាល័យប្រឆាំងបទល្មើសបច្ចេកវិទ្យា បានធ្វើការកោះហៅបុរសម្នាក់ឈ្មោះ ផន ឌីម៉ង់ ដែលបានយកព័ត៌មានចាស់ករណីអគ្គិភ័យមកឡាយឡើងវិញ ដែលធ្វើឲ្យប្រជាពលរដ្ឋមានការយល់ច្រឡំ ជាពិសេសបង្កឲ្យមានចលាចលនៅក្នុងសង្គមជាតិ ។
បុរសម្នាក់ឈ្មោះ ផន ឌីម៉ង់ ជាម្ចាស់ផេក Facebook ឈ្មោះ Srey Mom Online ដែលបានយកវីដេអូចាស់ករណីឆេះអគារ អិន ៨ ដែលបាន កើតឡើងតាំងពីថ្ងៃទី២៦ ខែកញ្ញា ឆ្នាំ២០២០ នៅខណ្ឌបឹងកេងកង យកមកធ្វើការបង្ហោះ ឡាយជាវីដេអូ (Live Stream) កាលពីថ្ងៃទី០២ ខែតុលា ឆ្នាំ២០២០ វេលាម៉ោង ១៣:៣០ នាទី នៅរាជធានីភ្នំពេញ ក្នុងគោលបំណងចង់ឲ្យមានភាពទាក់ទាញខ្លាំងមកលើ Page របស់គាត់ ដែលធ្វើឲ្យសាធារណជនមានការភាន់ច្រឡំ និងបង្កការរំខាន់ដល់ការអនុវត្តន៍ភារកិច្ចរបស់អង្គភាពបង្ការ និងពន្លត់អគ្គិភ័យទៀតផង។
ផ្អែកតាមច្បាប់ ជននេះត្រូវមានទោស និងទទួលការផាកពិន័យ ប៉ុន្តែដោយមានការយោគយល់ពីឯកឧត្តម ឧត្តមសេនីយ៍ឯក ស្នងការនគរបាលរាជធានីភ្នំពេញ ឲ្យអនុវត្តត្រឹមកម្រិតអប់រំណែនាំ៕ ដោយ : កូឡាប