ភ្នំពេញ៖ ស៊ុន កណ្ណិកា តារាហ្វេសប៊ុកដែលបានវិវត្តខ្លួនមកជាថៅកែជំនួញ Online ក្រោយរៀបការជាមួយលោកផ្កាយ៣ ថ្មីៗនេះស្រាប់តែរងការរិះគន់ដូចព្យុះពីអ្នកលេងបណ្តាញសង្គមហ្វេសបុក ដោយសារបានបង្ហោះរូបភាពលុយដុល្លារទាំងដុំៗ និងទម្លាយឆាតជាមួយកូនក្រុមបាញ់លុយចូលកុងធនាគារបស់ខ្លួនម្តង១លានដុល្លារ។
តាមរយៈគនណីហ្វេសប៊ុកមួយដែលមានឈ្មោះថា Maadam Yoo បានបង្ហោះឆាតផ្ទាល់ខ្លួនរបស់នាងជាមួយអ្នកនាង ស៊ុន កណ្ណិកា ពីការវេរលុយដែលមានចំនួនរហូតដល់ទៅ១លានដុល្លារ។ ដោយក្នុងនោះអ្នកនាង ស៊ុន កណ្ណិកា បានសរសេរថា “សប្បាយចិត្តណាស់ព្រឹកនេះ ទទួលបានហើយ លុយ១លានដុល្លារដែលបងបាញ់មក”។
ក្រោយបង្ហោះមិនបានប៉ុន្មាននាទីផងក៏មានអ្នកលេងបណ្តាញសង្គមជាច្រើនផ្ទុះសំណើច និងចោទជាសំណួរចាក់ដោតថា “បាញ់តាមធនាគារអី ណែនាំផង ព្រោះអត់ដឹងថាលានដុល្លារបាញ់បាន” ហើយក៏មានអ្នកតបនិងខំមិននោះថា “ ពាក្យក្នុងចិត្ត ក្រែងលោគេបាញ់រំលោះទេដឹង” ឯអ្នកខ្លះទៀតក៏បានខំមិនលេងសើចបែបឌឺដងថា “តែអាចិត្រជិតផ្ទះខ្ញុំវាអត់សប្បាយទេ ព្រោះវាទើបតែប្រឡងធ្លាក់កាលពីយប់មិញ”។
គួរបញ្ជាក់ថា មូលហេតុដែលបណ្តាលឱ្យផ្ទុះការរិះគន់និងហួសចិត្តបែបនេះ ដោយសារតែគេដឹងថា ជាទូទៅគ្រប់ធនាគារទាំងអស់ អាចវេរលុយចេញចូលត្រឹមតែ២ម៉ឺនដុល្លារប៉ុណ្ណោះក្នុងមួយថ្ងៃ ហើយការបង្ហោះបែបនេះគឺវាជាការបំភ្លើសខុសពីការពិត។
យ៉ាងណាក៏ដោយអ្នកលេងបណ្តាញសង្គមខ្លះនិយាយថា វាគ្រាន់តែជាយុទ្ធសាស្ត្ររបស់អ្នកលក់អនឡាញ ដែលចូលចិត្តប្រើច្បាប់ស្រូបទាញស្រមើស្រមៃ លុយតិចឱ្យចេញលុយច្រើនតែប៉ុណ្ណោះ គ្រាន់តែគេមិនបានបកស្រាយឱ្យច្បាស់ដើម្បីទាក់ទាញការ like share ពីអ្នកលេងបណ្តាញសង្គម៕ ដោយ៖ កូលាប ក្រហម
