ភ្នំពេញ៖ បុរសម្នាក់ជាជនជាតិខ្មែរ-ឥស្លាម ដែលពាក់ព័ន្ធករណីនាំពលករទៅធ្វើការខុសច្បាប់ នៅប្រទេសអារ៉ាប់ប៊ីសាអូឌីត កាលពីអំឡុងឆ្នាំ២០០៤ ត្រូវបានកម្លាំងនគរបាល នៃនាយកដ្ឋានប្រឆាំងការជួញដូរមនុស្ស និងការពារអនីតិជន ចាប់ខ្លួន យោងតាមពាក្យបណ្តឹងរបស់ជនរងគ្រោះចំនួន២នាក់ កាលពីថ្ងៃទី៧ ខែកុម្ភៈ ឆ្នាំ២០១៨ ពេលជនសង្ស័យកំពុងធ្វើដំណើរនៅក្នុងភូមិសាស្ត្រ សង្កាត់ច្រាំងចំរេះ២ ខណ្ឌឫស្សីកែវ រាជធានីភ្នំពេញ។
មន្ដ្រីនគរបាលប្រឆាំងការជួញដូរមនុស្ស បានឲ្យដឹងថា ជនសង្ស័យឈ្មោះ អ៊ីស្មាអែល ពិនឧស្ម័ន អាយុ៤៤ឆ្នាំ ជនជាតិខ្មែរ-ឥស្លាម មុខរបរធ្វើស្លាកលេខរថយន្ត ទីកន្លែងកំណើត ភូមិត្រពាំងឈូក ឃុំបឹង ស្រុកបារាយណ៍ ខេត្តកំពង់ធំ បច្ចុប្បន្នស្នាក់នៅផ្ទះលេខ៣៦H ផ្លូវលំ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ ត្រូវជាក្មួយបង្កើត លោក អះម៉ាត់ យ៉ះយ៉ា អតីតរដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា ។
សង្ស័យឈ្មោះ អ៊ីស្មាអែល ពិនឧស្ម័ន និងវត្ថុតាង កំពុងស្ថិតក្នុងចំណាត់ការរបស់សាលាដំបូងរាជធានីភ្នំពេញ រីឯជនសង្ស័យឈ្មោះ អះម៉ាត់ យ៉ះយ៉ា និងបក្ខពួក សមត្ថកិច្ចកំពុងស្នើសុំដីកា ស្វែងរកចាប់ខ្លួន ដើម្បីយកមកផ្តន្ទាទោសតាមច្បាប់។
ចំណែក ជនរងគ្រោះទាំងអស់ដែលទៅធ្វើការងារជាជំនួយការមេផ្ទះនៅប្រទេសអារ៉ាប៊ីសាអូឌីត ទើបតែសង្គ្រោះបានចំនួន២នាក់ប៉ុណ្ណោះ ដោយមានការអន្តរាគមន៍ពី លោក អូស្មាន ហាស្សាន់ រដ្ឋមន្ដ្រីប្រតិភូអមនាយករដ្ឋមន្ដ្រី និងជារដ្ឋលេខាធិការក្រសួងការងារ សហការជាមួយក្រសួងការបរទេស និងសហប្រតិបត្តិការអន្តរជាតិ ហើយបានវិលត្រឡប់មកកម្ពុជាវិញ។
សូមបញ្ជាក់ថា អំឡុងឆ្នាំ២០០៤ ជនសង្ស័យអ៊ីស្មាអែល ពិនឧស្ម័ន បានឃោសនាក្នុងភូមិថា ឈ្មោះ អះម៉ាត់ យ៉ះយ៉ា ត្រូវជាពូរបស់ខ្លួន ត្រូវការជ្រើសរើសពលការិនីបញ្ជូន ទៅធ្វើការជាជំនួយការមេផ្ទះ នៅប្រទេសអារ៉ាប់ប៊ីសាអូឌីត ប្រាក់ឈ្នួល២២០ដុល្លារ កិច្ចសន្យាការងាររយៈពេល២ឆ្នាំ ចំពោះឯកសារបែបបទ លិខិតឆ្លងដែន និងសោហ៊ុយធ្វើដំណើរលោកអះម៉ាត់ យ៉ះយ៉ា ជាអ្នកចំណាយ។ ជនសង្ស័យបានអូសទាញពលរដ្ឋចំនួនជាង២០នាក់ នាំទៅប្រគល់ឲ្យលោក អះម៉ាត់ យ៉ះយ៉ា ស្នាក់នៅផ្ទះលេខ៣៤ ផ្លូវលេខ៧០ សង្កាត់ស្រះចក ខណ្ឌដូនពេញ ពេលនោះជនរងគ្រោះ ត្រូវបានលោក អះម៉ាត់ យ៉ះយ៉ា ធ្វើឯកសារក្លែងក្លាយ ហើយបានបញ្ជូនទៅធ្វើជាស្ត្រីបម្រើតាមផ្ទះ នៅប្រទេសអារ៉ាប់ប៊ីសាអូឌីត ។ នៅប្រទេសអារ៉ាប់ប៊ីសាអូឌីត ជនរងគ្រោះត្រូវបានថៅកែកេងប្រវ័ញ្ចកម្លាំងពលកម្ម បិទសិទ្ធិសេរីភាព ហើយត្រូវបានគេលក់បន្តទៅឲ្យថៅកែផ្សេងទៀតឲ្យធ្វើការងារផ្ទះនិងរងការរំលោភផ្លូវភេទ និងមិនទទួលបានប្រាក់ឈ្នួល ៕ ដោយ៖បញ្ញាស័ក្តិ
