ភ្នំពេញ៖ សម្តេចវិបុលសេនាភក្តី សាយ ឈុំ ប្រធាន ព្រឹទ្ធសភា បានធ្វើការអប់រំណែនាំឯកឧត្តម ណយ ស្រូន សមាជិកព្រឹទ្ធសភាប្រចាំភូមិភាគទី៨ ឱ្យឈប់ពាក់ព័ន្ធនឹងដី៥៣១ហិកតា នៅភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរីនេះតទៅទៀត។
នៅថ្ងៃទី៧ ខែតុលា ឆ្នាំ២០២០នេះ អ្នកនាំពាក្យព្រឹទ្ធសភាបានចេញសេចក្តីបំភ្លឺមួយ ពាក់ព័ន្ធនឹងករណី លោក ណយ ស្រូន សមាជិកព្រឹទ្ធសភាភូមិភាគ៨ ដែលពាក់ព័ន្ធនឹងបញ្ហាដីធ្លី ៥៣១ហិកតា នៅភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី។
អ្នកនាំពាក្យព្រឹទ្ធសភា បានបញ្ជាក់ថា ដើម្បីជម្រាបជូនសាធារណជនឱ្យបានយល់កាន់តែច្បាស់លាស់ថែមទៀត ទៅលើករណីឯកឧត្តម ណយ ស្រូន សមាជិកព្រឹទ្ធសភាប្រចាំភូមិភាគទី៨ ដែលពាក់ព័ន្ធក្នុងការរៀបចំឯកសារកាន់កាប់ដីទំហំ ៥៣១ ហិកតា នៅភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរី អ្នកនាំពាក្យព្រឹទ្ធសភាសូមធ្វើការ បញ្ជាក់បន្ថែមដូចតទៅ៖
១-ឯកឧត្តម សាយ សួន ពុំទាន់បានគ្រប់គ្រង និងប្រើប្រាស់ដីទំហំ ៥៣១ហិកតាខាងលើនេះឡើយ ទើបតែស្ថិតក្នុងដំណើរការដំបូងនៃការដាក់ពាក្យស្នើសុំកាន់កាប់ដីនេះ ទៅអាជ្ញាធរមានសមត្ថកិច្ចតែប៉ុណ្ណោះ ហើយអាជ្ញាធរមានសមត្ថកិច្ចក៏ពុំទាន់អនុញ្ញាតនៅឡើយដែរ។
២-អនុវត្តតាមចំណាររបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចុះថ្ងៃទី២ ខែកញ្ញា ឆ្នាំ២០២០ នៅលើលិខិតលេខ៖ ១៦៥៣លស ចុះថ្ងៃទី៣១ ខែសីហា ឆ្នាំ ២០២០ របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស្តីពីការពាក់ព័ន្ធ ជាមួយនឹងឯកឧត្តម សាយ ស្រូន ដើម្បីធ្វើការអប់រំណែនាំនោះ សម្តេចវិបុលសេនាភក្តី សាយ ឈុំ ប្រធាន ព្រឹទ្ធសភា បានធ្វើការអប់រំណែនាំឯកឧត្តម ណយ ស្រូន ឱ្យឈប់ពាក់ព័ន្ធនឹងដីនេះតទៅទៀត។ សាមីជន បានយល់ព្រមទទួលអនុវត្តតាមការណែនាំរបស់ថ្នាក់ដឹកនាំព្រឹទ្ធសភា។ ក្នុងក្របខ័ណ្ឌស្ថាប័ន ថ្នាក់ដឹកនាំមាន សិទ្ធិគ្រប់គ្រាន់ដើម្បីអប់រំណែនាំសមាជិករបស់ខ្លួនឱ្យប្រព្រឹត្តត្រឹមត្រូវតាមច្បាប់ជាធរមាន។ វិធានការ អប់រំណែនាំរបស់ស្ថាប័នពុំរារាំងដល់ការអនុវត្តច្បាប់នោះទេ ប្រសិនបើសាមីខ្លួនត្រូវបានរកឃើញនូវកំហុស ណាមួយពាក់ព័ន្ធនឹងផ្លូវច្បាប់។
៣-ក្នុងនាមជាសមាជិកព្រឹទ្ធសភា ឯកឧត្តម សាយ ស្រូន ត្រូវគោរពប្រតិបត្តិតាមរដ្ឋធម្មនុញ្ញ និងច្បាប់ជា ធរមាននៃព្រះរាជាណាចក្រកម្ពុជាព្រមទាំងច្បាប់ស្តីពី លក្ខន្តិកៈសមាជិកព្រឹទ្ធសភា និងបទបញ្ជាផ្ទៃក្នុងព្រឹទ្ធសភា៕ដោយ៖កូឡាប
