ភ្នំពេញ៖យុវជនប្រុសស្រីពីរនាក់ បានបើករថយន្តក្នុងល្បឿនលឿន មិនប្រយ័ត្នក៏ជ្រុលទៅបុកទ្រូងនាគពុះចែកផ្លូវ ពេញទំហឹងបណ្តាលឲ្យបាក់អស់បីកង់ ចំណែក ឯរថយន្តរងការខូចខាតផ្ទៃខាងមុខទាំងស្រុង។
ហេតុការណ៍នេះដែរកើតឡើងនៅវេលាម៉ោង ១ និង ១០នាទីរំលងអធ្រាត្រឈានចូល ថ្ងៃទី ៨ ខែតុលា ឆ្នាំ ២០២០ តាមបណ្តោយផ្លូវព្រះមុនីវង្ស កែងនឹងផ្លូវ ៣៦០ ក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ។
ប្រភពព័ត៌មានពីប្រជាពលរដ្ឋនៅកន្លែងកើតហេតុបានឲ្យដឹងថា មុនពេលកើតហេតុគេឃើញយុវជនប្រុសស្រីពីរនាក់ បើករថយន្តម៉ាក starex មួយគ្រឿងពណ៌ខ្មៅ ដែលពាក់ផ្លាកលេខ ភ្នំពេញ 2-AV 0052 ធ្វើដំណើរក្នុងទិសដៅពីត្បូង មកជើងក្នុងល្បឿនលឿន ខណៈមកដល់ចំណុចកើតហេតុ ក៏ជ្រុលទៅបុកទ្រូងនាគពុះចែកផ្លូវពេញទំហឹងបណ្តាលឲ្យបាក់អស់បីកង់ រងការខូចខាតយ៉ាងដំណំ ។
ចំណែកឯនាក់បើកបរថយន្តក៏រត់គេចខ្លួនបាត់ស្រមោល បន្សល់ទុកតែរថយន្តនៅកន្លែងកើតហេតុ។
ក្រោយពេលកើតហេតុសមត្ថកិច្ចមូលដ្ឋាន សហការជាមួយនឹងជំនាញទាក់ទងទៅខាងចរាចរណ៍ក្រុង ឱ្យចុះមកធ្វើការវាស់វែង និងធ្វើកំណត់ហេតុយករថយន្ដទៅរក្សាទុកនៅខាងចរាចរណ៍ផ្លូវគោក រង់ចាំដោះស្រាយនៅពេលក្រោយ៕ដោយ៖សាមេត
